Mais de Maience n’en fu nes uns claimés.
« Segnor, dist l’abes, ce sachiés de verté,
« Quant à la mort est l’hom aproïsmés,
« Des suens pechiés nes un ne vuelt celer,
« Que il n’en die tote la verité.
« J’ai la roïne oïe au confesser ;
« Tos ses pechiés m’a gehis et contés, (*)
« Si truis ge bien, à ce qu’ele ot ovré,
« De tel forfait la puet on encorper
« Si com par ele ne fu dis ne pensés. (*)
« D’une autre rien m’a ele acertené,
« Si com enceinte de fil o de fille ert. (*)
« Dont, gentis rois, gardés que vos ferés ;
« Que d’ele ocire seroit plus grans pechiés
« Que n’en ot cil qui Dieu ot acusé,
« Dont il en fu sor la crois encloés. »
Naimes l’oï, si l’entendi asés.
A ces paroles qu’il oit l’abé conter
A conéu tote la vérité,
Et que la dame, quant la vont encorper,
Encorpée est à tort et à pechié.
« Sire emperere, dist Naimes de Baivier,
« Se vos volés par mon conseil ovrer,
