Les rais de l’Eternel sont sainctes actions
Seconde partie des Muses françoises, Texte établi par Despinelle, chez Matthieu Guillemot, (p. 256).
SONNET.
Les rais de l’Eternel ſont ſainctes actions,
Les raions de ce Tout s’appellent des natures,
Et les rais plus brillans de nous ſes creatures,
Sont ſciences & arts noz meditations,
Trimegiſte, di moi, ces longues paßions
Que ie porte en mon flanc ſoubs les viues batures
De l’Amour mon ſeigneur, ſont-ce point les poinctures
Des rais plus eſclatans de ſes perfections ?
Non, ce n’eſt qu’vn poison, vne racine immonde
Qui bourgeonne au terroir de noſtre petit monde,
Qui tient comme vn Lion, noſtre eſprit abbatu :
Les rayons de l’Amour ſont des très-douces flammes,
Qui fomentent touſiours les plus diuines ames,
Et lui-meſme n’eſt rien qu’vn lien de vertu.
A. D. V.