Les oeuvres poétiques de Clovis Hesteau de Nuysement 1578/Nous sommes engendrez
XXIX.
Nous sommes engendrez des almes deitez,
Nous avons Jupiter & le Ciel pour noz peres,
Nous avons la Nature & la Terre pour meres,
Mais deux astres regnoient à noz nativitez.
Des peres nous tirons noz immortalitez,
Des meres noz travaux & noz peines ameres,
Des astres noz destins & noz desseins contraires,
Qui causent d'un chacun les infœlicitez.
Si le sage mortel peut surmonter son astre,
Ne me pers te perdant par un mesme desastre :
Qui fuit l'amour d'un Dieu au Ciel n'est son tresor.
Les bien-heureux jumeaux par s'aimer toujours vivent,
Fais donc que nos destins & leurs sorts s'entresuivent :
Lors je seray Pollux & tu seras Castor.