Les oeuvres poétiques de Clovis Hesteau de Nuysement 1578/O bien heureux bessons
LXIII.
O bien-heureux bessons que le grand œil du monde,
Delaissant le Taureau visite en ce beau moys :
Heureux & plus qu'heureux, & trois & quatre fois,
Beaux astres adorez sur la Terre & sur l'onde.
Or que par vostre aspect la Terre se fait blonde
Sous les espics crestez, & ore que les voix
De mille & mille oiseaux font retentir les bois,
Et que nature en tout se monstre plus feconde.
Si vous avez pouvoir d'eschauffer par dehors
Faites tant que voz rets penetrent dans les corps,
Influant sur les cueurs une amitié jumelle :
Vous n'estes dans le Ciel que pour avoir aymé,
Helas rendez le cueur de madame animé,
Nous muant comme vous en planette immortelle.