Les Souspirs amoureux de F B de Verville 1589/De mes humbles souspirs je benis l’abondance
XL.
De mes humbles souspirs je benis l'abondance,
Et de mes tristes yeux j'advoüe le devoir,
Je veux que ce qui tient en moy quelque pouvoir,
Tesmoigne la douleur du doux mal qui meslance.
Je me veux bien-heureux perdre en la souvenance
De mes chastes desirs, & jamais ne me voir
Libre de mes passions, mais à tousjours avoir
D'amour les traicts cruels en mon cœur sans defence.
La peine que me donne un mal si aggreable,
Me rendant or' constant & ores miserable
Fait que dedans mon feu il me plaist de perir.
Que j'y trespasse donc, las non ! mais que mon ame
S'esteinde & puis s'allume aux rayons de ma flame,
Car j'y veux vivre encore pour encor y mourir.