Les Chroniques de Sire Jean Froissart/Livre I, Partie II/Chapitre CXXXV
CHAPITRE CXXXV.
Quand le prince de Galles et le duc de Lancastre, qui se tenoient à Calais de-lez le roi de France, virent que le terme passoit, et que le paiement point ne s’approchoit, si eurent volonté de retourner en Angleterre, et mirent ordonnance en ce ; et laissèrent le roi en la garde de quatre moult suffisans chevaliers, messire Regnault de Cobehen, messire Gautier de Mauny, messire Guy de Briane, et messire Roger de Beauchamp. Et payoit le roi de France ses frais et les frais de ces seigneurs et de leurs gens : si montèrent grand’foison bien le terme de quatre mois qu’ils furent à Calais.
Or vous parlerons d’aucuns chevaliers Anglois, capitaines des garnisons qui se tenoient en France et étoient tenus deux ou trois ans paravant, ainçois que paix se fit. Cils qui avoient appris à guerroyer et à hérier le pays, furent moult courroucés de ces nouvelles, quand ils eurent commandement du roi d’Angleterre qu’ils se partissent ; mais amender ne le purent. Si vendirent les plusieurs leurs forteresses à ceux du pays d’environ et en reçurent grand argent, et puis s’en partirent. Et les aucuns ne s’en voulurent mie partir, car ils avoient appris à piller et à faire guerre ; si firent comme paravant, sous ombre du roi de Navarre ; et ce furent ceux qui se tenoient sur les marches de Normandie et de Bretagne. Mais messire Eustache d’Aubrecicourt qui se tenoit dedans la ville de Athigny, quand il s’en partit, la vendit bien et cher à ceux du pays. Or prit-il simplement ses convens, dont il fut depuis mal payé ; et si n’en eut autre chose.
Si s’en partirent tous ceux qui tenoient forteresses en Laonnois, en Soissonnois, en Picardie, en Brie, en Gâtinois et en Champagne. Si retournoient les aucuns qui avoient assez gagné, en leurs pays, ou qui étoient tannés de guerroyer ; et les plusieurs se retraioient en Normandie devers les forteresses Navarroises. Or vint cil paiement de ces six cent mille francs en la ville de Saint-Omer ; et fut là tout coi et arrêté en l’abbaye que on dit de Saint-Bertin, sans porter plus avant ; car les aucuns hauts barons de France, qui élus et nommés étoient pour être hostagiers et entrer en Angleterre, refusoient et ne vouloient venir avant, et en faisoient grand danger. De quoi si l’argent fût payé et délivré en la ville de Calais aux Anglois, et les seigneurs de France ne voulsissent entrer en ostagerie, ainsi que convens et ordonnances de traités se portoient, la dite somme de florins fût perdue, la paix fût brisée, et le roi de France remené arrière en Angleterre. Sur ces choses avoit bien avis et manière de regarder.