Les Chroniques de Sire Jean Froissart/Livre I, Partie II/Chapitre CXX
CHAPITRE CXX.
Le roi d’Angleterre et son ost reposèrent dedans Tonnerre cinq jours, pour la cause des bons vins qu’ils avoient trouvés, et assailloient souvent au châtel ; mais il étoit bien garni de bonnes gens d’armes, desquels messire Baudouin d’Ennekins maître des arbalétriers étoit leur capitaine. Quand ils furent bien refraîchis et reposés en la ville de Tonnerre, ils s’en partirent et passèrent la rivière d’Armençon ; et laissa le roi d’Angleterre le chemin d’Aucerre à la droite main et prit le chemin de Noyers[1] ; et avoit telle intention que d’entrer en Bourgogne et d’être là tout le carême. Et passa lui et tout son ost dessous Noyers, et ne voulut oncques que on y assaillît, car il tenoit le seigneur prisonnier de la bataille de Poitiers. Et vint le roi et tout son ost à gîte à une ville qu’on appelle Mont-Réal, sur une rivière que on dit Sellettes[2]. Et quand le roi s’en partit, il monta celle rivière et s’en vint loger à Guillon sur Sellettes[3] ; car un sien écuyer qu’on appeloit Jean de Arleston, et s’armoit d’azur à un écusson d’argent, avoit pris la ville de Flavigny qui siéd assez près de là, et avoit dedans trouvé de toutes pourvéances pour vivre, le roi et tout son ost, un mois entier. Si leur vint trop bien à point, car le roi fut en la ville de Guillon dès la nuit des cendres[4] jusques en-my carême. Et toujours couroient ses maréchaux et ses coureurs le pays, ardant, gâtant et exillant tout entour eux ; et refraîchissoient souvent l’ost de nouvelles pourvéances.