Le premier acte du synode nocture (éd. 1608)/Harangve dv Vespille Diaulus
HARANGUE DU VESPILLE
& Maſtrope generaliſé Diaulus.
Ar ma nerueuſe braquette (mes freres & charitables
ſœurs) vous eſtes encores bien de voſtre
pays : Hé qui Diable ſe fuſt iamais perſuadé que
vos furieux eſprits ſe fuſſent laiſſé emporter à
cette ſorte de Manie, vous nous accõmodez par le
ſang bregoy bien, de nous fluſter ainſi pour le Careſme
futur, laiſſez-moy faire de par Dieu, laiſſez-moy
faire, & n’allez point allembicquants de la façon
vos lunatiques ceruelles, qui ne ſont point ſi
bien tymbrées, qu’elles n’acheuent de ſe mettre au
deſſus de E la & gamma, vt : ſi vous voulez perſiſter
de donner carriere à ces forcenneries, & puis ie
me recommande, & nous voila le cul à terre entre
deux ſelles, & tous nos deſſeins foutus ſans que
noſtre pauure haire de Pietre ophthalmique hermocrate,
ny tous nos maiſtres à double ſangle, & ſourfaix
meßieurs nos medecins Cenomans nous puiſſent redreſſer.
Non, par mon illuſtre Braquemard, ils ne
ſçauroient, euſſent-ils toute la ſcience & experience
d’Hypocrate & Galien infuſe en leur caboche :
A propos de Galien ſçauez-vous ce qu’il dict en ie
ne ſçay quel liure de l’vſage de ſes parties, & apres,
ou deuant luy (il ne m’en chaut) vn autre fouille-merde
nommé Acée, au chapitre cent quatrieſme
de la troiſieſme Tetrabile : Ventre beuf, qu’ils diſcourent
methodiquement de cette colere, & noire
Bile, & par vifues raiſons prouuent qu’elle cauſe
tous ces Symptomes ſuiuants, Strangulations, palpitations,
Syncopes, conuulſions, manies, Reſueries, fureurs de
matrices, tres longs ſommeils, eſtonnements, mouuements
deſordonnez, palles ou paillardes couleurs, fleurs blanches,
ſterilité, mole, douleurs cholicques, douleurs de
reins, nauſées, vomiſſements, inflammations, abſés, chancres,
Scyrrhe, inflation, hydropiſie, Rhagadies, verruës,
Eryſipeles, Carcinomes, condylomes, Hemorrhoydes, tumeurs,
vlceres, fiſtulles, & autres maux infinis, & vous
y allez frotter : ie ſuis par la vertu Dieu exempt des
gardes de ce biais la, pour n’eſtre pas femme, comme
beaucoup de ce genre ſçauent, & deſquelles
aucunes ſont icy aſſiſtantes par le bail que ie
leur ay paſſé de mes lettres ſcellées à la grande Chancellerie
en queuë de cire rouge, cramoiſie & violette : Toutefois
ieu ſans villanie, & n’ay de matrice aucune
que par emprunt & change ou traficq de mon Memigmeniſte
meſtier, mais ie me donne à celuy qui n’a
point de blanc en l’œil, aliàs Tracquenard de ſainct
Michel, ſi quand cela ſeroit, ie ne faiſois bien eſquifuer
ces pernicieuſes melancholies fantaſtiquées, ſi
ie les ſentois approcher tant ſoit peu de mon Philogine
entendement. Cancre ; quels tyrans de voſtre
ſexe, Beatus vir. C’eſt donc à vous à y ſonger pour
vous meſmes ſi vous voulez, & enſuiure vn meilleur
chemin ſi vous aymez voſtre ſanté : pour moy
ie donneray bon ordre de n’entrer en ces Diableſques
accez là, voire par le digne froc magiſtral de
noſtre frere Onopenis, voire voire da : viue touſiours
per omnia ſecula ſeculorum la iolie petite galanteſque
humeur chirurgique, viue & reuiue ſans fin le larronneſque
Amour ſes feux, carquois, & fleches, & le polit
coup de piſtolet generatif entre deux vertes &
vne meure, entre deux huis & vne porte, & entre
deux planchers & vne paillaſſe. Ie ne donnerois
pas vn Viedaſe du reſte, pas ſeulement vn foutre d’aſe
pour tremper la ſouppe à nos ſœurs feſſues les iours
de Vendredis blancs de l’année Biſſextile. Et auſſi ie
vous ſupplie, ne ſeroit-ce pas eſtre plus fol qu’vne
douzaine de choux à pomme que de ſe laiſſer trãſporter
en ces precipices leſquels attraiſneroiẽt plus
de dilayement à nos deſirs que de viſteſſe & promptitude
plus d’incommodité que de commodité,
l’impetuoſité miniſtrant toutes eſpeces de mal-heurs :
Car lon deſcouuriroit incontinent noſtre
tranſport, & deſia les plus cler-voyants iugent d’iceluy
par le mauuais ordre que nous y apportons,
n’y ayãt perſonne qui ignore que Calianthe ne nous
a iamais intereſſez en quelque choſe que ce ſoit,
veu que ce n’eſt qu’vn ieune homme qui ne commence
qu’a entrer au monde, & à gouſter ce que
c’eſt, & qu’outre plus, il n’a iamais demeuré entre
nous, mais d’vn coſté & d’autre en vne partie des
meilleures villes de la France beaucoup eſloignées
de celle-cy, vous iurant qu’vn certain & de nos amis
(lequel ie Seringuois dernierement pour vn Priapiſme
qui luy eſtoit de fortune ſuruenu) m’acertena
qu’il n’y a que dix-huict mois, quand il reuinſt des
vniuerſitez, qu’il ne congnoiſſoit le quart meſme de
ſes parents de deça. Vous iugez maintenant ex vnque
leonem, & voyez qu’elle conſequence ſeroit
celle la, & qui nous intereſſeroit doublement ſans la
mocquerie que nous encourerions meſme des petits
enfans, il nous eſt offert vne de beaucoup plus
facile, courte & ſerieuſe voye & ne vous donnez
point de peine : Car moy ſeul i’entreprens de luy
faire vuider les arſons au premier choc de mon
bois, couuert de tel corſelet, & halecret bardé de tel chanfrain,
haubergeon, brigandin, armet, morion, maille, gouſſet,
gorgerin, plaſtron, haulbert, pauois, bouclier, greues,
& Saleret, qu’il ne ſera en ſon pouuoir de recongnoiſtre
celuy qui luy aura donné vne ſi rude atteinte.
Ie ſuis garny d’vn certain vnguẽt incõgneu
à pluſieurs, qui en ſoy cache & recele de merueilleuſes
proprietez, & par lequel ie ſçay qu’a ſon premier
appareil, il n’y aura nerf qui ne ſoit diſſould,
os diſloqué & veine qui ne ſoit rompuë & briſée :
La familiarité qui m’eſt acquiſe, il y a long temps
auec le Comis, fera que i’auray bien toſt ſondé la
playe pour profonde qu’elle ſoit, & comme ie iugeray
de ſes qualitez, mes appoſitions ſeront ou attirantes
& aperitiues, ou deſſeichantes & lenitiues :
Et puis mon exercice à latere me communique
quelque choſe de plus ſingulier que non pas à vous
autres. Car de ce coſté là ie me repute ſans iactance
l’vn des meilleurs chaudronniers de toute la Prouince
ſoit à anſe ou à trepied, ie n’en crains homme
fuſt-il des meilleures & plus antiques races de
Beaumont : Si ie voulois m’eſtendre au diſcours
d’vn ſeul ſecret de ce mien dernier eſtat (Car ce n’eſt
plus meſtier, non, depuis ie ne ſçay combien d’années
que lon l’a erigé en chef de tous les autres) ie
vous montrerois bien quantas vires habeat, & que ie
ſuis à antepoſer à toute la compagnie, les parois de
ma boutique qui ſont Diaphanes, me concedent
cette preeminence là.
Comme Diaulus acheuoit ces paroles la Mere Abeſſe Niobé, voyant qu’il ſe vouloit enfourner & enfoncer en la dignité eminence, proprieté, faculté, vertu & effet du ſecond de ſes eſtats, & qu’a grande peine lon l’en pourroit retirer, ſi on l’y laiſſoit prendre dauantage de pied, veu la nature des barbiers qui eſt extremement babillarde, iazarde & enquerante, comme deſireux de ſçauoir toutes nouuelles, lui fiſt ſigne qu’il ſe teuſt, ou du moings qu’il euſt à prendre ſes concluſions : luy qui eſtoit en beau chemin deſirant inuentorier ab ouo, ad poma, comme l’on dict, tout ce qu’il y auoit de raiſons en ſon memorial pour taſcher à deſiecter ſœur Diaphonia de ſa nouuelle charge de Lieutenande generalle des Tribades propetides en l’execution ruineuſe des biens, vie & honneur de Calianthe, & s’inſtaller, s’il pouuoit en ſa place, voulut pourſuiure ſon propos, mais quand il veit la iuſſion reiterée de l’Abeſſe, il ſe miſt en plus grande colere, criant en voix Stantorée, comment n’eſt-il pas permis icy de deduire ce que l’on veut ? le parler me ſera-t-il denié ? & n’auray ie point plaine liberté de conclurre à ce que ie reſpire, comme à faict le Pere Conſequutus & cette bonne beſte d’Erinnys ? Ie ſçay bien que ſi on me porte à tant ſoit peu d’emotion que ie deſcouuriray les parties honteuſes de quelques vnes. A ces mots toute l’aßiſtance craignant chacun pour ſoy, & ne deſirant reſſembler les femmes de ces anciens Perſes qui preſenterent leurs moulles d’humanité à leurs enfants & parents qui fuyoient de la bataille, commencea à crier & ſiffler fort & ferme, & bien que Harpetirade meſme hurlaſt à pleine teſte pour impoſer ſilence, & que Niobé d’autre coſté commandaſt qu’on euſt à ſe taire, il ne fut toutefois poſſible de les appaiſer, tellement que ledit Diaulus ſuoit comme vn verolé, qui eſt ſoubs le cheualet, orageoit comme quarante-trois Diables, eſcumoit comme vn verrat, & voyant que ſon theme s’eſtoit eſgaré parmy le tumulte, il commancea à crier le plus hault qu’il luy fut poſſible. Mes freres & ſœurs, ie vous ſupplie au moings que ſi quelqu’vne de vous autres ſent des inflammations, ou autres douleurs aux outils de Nature que ie ne perde point ma chalandiſe, & que vous n’alliez à d’autres.
Et là-deſſus content, gay, dru, buby, vioge, allegre, galland, eſbaudy, gallois, gaillard, gent, friſque, poupin, mignon, eſcarbillat, reſiouy, & bruſque, il feiſt en l’air vne vireuolté capriolée en platte forme vn pet, vn rot & vn ſifflet : faiſant la nicque & la fique à tous ceux & celles qui le regardoient, proteſtant au reſte qu’il ne s’en ſoucioit non plus d’eux tous, que d’vn crieur de lardoüeres en Careſme : & que par les ciſeaux de ſon maiſtre eſtuit, qui eſtoit ſon grand iuron, les rouignons en ſeroient teſtonnez. A tant pile, nade, iocque fore. Somme, le ſilence reprenant ſa place dans les bouches Synodales, ſœur Philenis, qui auoit laiſſé paſſer ſon rang par meſgarde, & dont elle eſtoit encores toute courrouſſée habillée en ſon de-nuict auec vne cotte de camelot per-vert bordé à trois bandes de tripe de velours de couleur blaffarde ſe leua, & ayant faict quatre reuerences à cul-ouuert, à ſçauoir deux deuant la chaiſe Abatiale, & les deux autres à la face de la Compagnie, Cocq-aſnonna beccaßiquement & fatidiquement de ce biaïs.