Le Roman du Renart - D. M. Méon - 1826/2
Si coume Renart manja le poisson aus charretiers.
Seignor, ce fu en cel termine
Que li doz tens d’esté define
Et yver revient en saison,
Que Renart fu en sa maison.
Sa garison a despendue,
Ce fu mortel desconvenue :
N’ot que doner ne que despendre,
Ne ses detes ne pooit rendre ;
N’a que vendre ne qu’acheter,
Ne s’a de coi reconforter.
Par besoing s’est mis à la voie,
Tot coiement que nus nel’ voie
S’en vet parmi une jonchiere
Entre le bois et la riviere.
A tant fet et tant a erré,
Qu’il entre en un chemin ferré :
El chemin se croupi Renarz,
Si coloie de toutes parz ;
Ne set sa garison où querre,
Et la fain li fet sovent guerre,
Ne set que fere, si s’esmaie.
Lors s’est couchiez lez une haie,
Ilec atendra aventure.
Atant ez-vos grant aléure
Marchéanz qui poisson menoient,
Et qui de vers la mer venoient.
Harenz frès orent à plenté,
Que bise avoit auques venté
Trestoute la semaine entiere ;
Et bons poissons d’autre maniere
Orent assez granz et petiz
Dont lor paniers furent garniz.
Que de lamproies et d’anguilles
Qu’il orent acheté as villes
Bien fu chargie la charrete.
Et Renart qui le siecle abete,
Fu bien loing d’eus près d’une archie,
Qant vit la charrete chargie
Et d’anguilles et de lamproies.
Fichant musant parmi ces voies
Cort au devant por els deçoivre,
Ainz ne s’en porent aparçoivre.
Lors s’est couchiez enmi la voie :
Or oez conment les desvoie.
En un gason s’est ventrilliez,
Et conme mort apareilliez
Renart qui tot le monde engingne,
Les eulz clot et les denz rechingne,
Si tenoit s’alaine en prison.
Oïstes mès tel traïson !
Illeques est remès gesanz.
Atant es-vos les marchéanz,
De ce ne se prenoient garde.
Le premier le vit, si l’esgarde,
Si apela son compaignon,
Vez là ou Gorpil ou Tesson.
Li uns le voit, si s’escria,
C’est un Gorpil, va, sel’ pren, va,
Filz à putain, gart ne t’eschat.
Or saura-il trop de barat
Renart s’il ne lesse l’escorce.
Li marchéant d’aler s’esforce,
Et ses conpains venoit après.
Qant il furent de Renart près,
Le Gorpil trovent enversé,
De toutes parz l’ont reversé,
Pincent le col et puis la coste,
Il n’ont pas péor de tel oste.
Li uns a dit, quatre sols vaut,
Li autre a dit, assez plus vaut,
Ainz valt cinc sols à bon marchié.
Ne somes mie trop chargié,
Jetons le en nostre charete ;
Vez con la gorge a blanche et nete.
A cest mot se sont avancié,
En la charete l’ont chargié,
Et puis se sont mis à la voie.
Li uns à l’autre en fait grant joie
Et dient jà n’en feront el,
Mès enquenuit à lor ostel
Li reverseront la gonele.
Or ont-il auques la favele,
Mès Renart n’en fet que sourire,
Que moult a entre fere et dire.
Sor les paniers se gist adenz
Si en a un overt as denz,
Et si en a, bien le sachiez,
Plus de trente harenz sachiez.
Auques fu vuidiez li paniers,
Qu’il en menja moult volentiers.
Onques n’i quist ne sel ne sauge,
Encor ançois que il s’en auge
Getera-il son ameçon,
Il n’en ert mie en soupeçon.
L’autre panier a asailli,
Son groig i mist, n’a pas failli
Qu’il n’en traisist fors des anguiles.
Renart qui sot de tantes guiles,
Troi hardiaus mist entor son col,
De ce ne fist-il pas que fol.
Son col et sa teste passe outre,
Les hardeillons moult bien acoutre
Desor son dos que bien s’en cuevre :
Dès or puet-il bien lessier ueve[1].
Or li estuet enging porquerre
Conment il vendra jus à terre ;
N’i trove planche ne degré.
Agenoilliez s’est tot de gré
Por esgarder à son plaisir
Conment il puisse jus saillir :
Lors s’est un petit avanciez,
Des piez devant s’estoit lanciez
De la charete enmi la voie,
Entor son col porte sa proie.
Après qant il ot fet son saut,
As marchéanz dist, Diex vos saut ;
Cil hardel d’anguilles sont nostre,
Et li remanant si est vostre.
Et qant li marchéant l’oïrent,
A merveilles s’en esbaïrent,
Si escrient, vez le Gorpil.
Cil saillirent au charretil
Où il cuiderent Renart prendre,
Mès il ne volt pas tant atendre.
Li premier dist, qant ce regarde,
Si m’aïst Diex, mauvese garde
En avomes pris, ce me semble.
Tuit fierent lor paumes ensemble,
Las ! dist li uns, con grant domage
Avons éu par nostre outrage !
Moult estion fol et musart
Trestuit qui créion Renart.
Les paniers a bien soufaichiez,
Si les a auques alegiez,
Que deus granz anguilles enporte :
La male passion le torde !
Ha ! font li marchéant, Renart,
Moult par estes de male part :
Mau bien vos puissent-eles fere !
Et Renart lor prist à retrere,
Vos dites ce qu’il vos plera,
Je sui Renart qui s’en taira.
Li marchéant vont après lui,
Mès il nel’ bailleront mès hui,
Car il ot trop ignel cheval.
Ainz ne fina parmi un val
Tant que il vint à son plaissié.
Lors l’ont li marchéant lessié
Qui por mauvès musart se tienent,
Recréant sont et si s’en vienent,
Et cil s’en va plus que le pas,
Qui passé ot maint mauvès pas,
Et vint à son ostel tout droit
Où sa mesnie l’atendoit
Qui assez avoit grant mesese.
Renart i entre par la hese,
Encontre lui sailli sa fame
Hermeline la preude dame,
Qui moult estoit cortoise et franche,
Et Percehaie et Malebranche
Qui estoiént ambedui frère.
Cil se lievent contre lor pere
Qui s’en venoit les menuz sauz,
Gai et joienz et liez et bauz,
Les anguilles entor son col ;
Mès qui que le tiegne por fol,
Après lui a close la porte
Por les anguilles qu’il enporte.