Le Roman du Renart - D. M. Méon - 1826/16
C’est de Prestre Martin et du Lou Ysengrin.
Seignor, ce dient li devin,
Il est escrit en parchemin
Que cil a sovent mau matin
Qui près de lui a mau voisin :
Je le vos di por Ysengrin
Et por un prestre dant Martin.
Viellarz estoit auques li prestres,
Ne fu onques de letres mestres ;
Plus savoit de truie enfondue
Que de letre desporvéue.
Prestres Martins estoit moult sages
De bien norrir par ces erbages
Brebis dont il ot maint fromage ;
Mès moult li fist plusors domage
Li Leus, mal ait toz ses lignages !
Près de lui estoit es boscages,
Si li a fait sovent anui,
Qar il manoit moult près de lui,
Sovent li fesoit ses oeilles
Non per, s’eles erent pareilles,
Et sovent les rapareilloit
Se non pareilles les trovoit.
Moult ert dolent prestre Martin
De ce dont ert liez Ysengrin.
Prestre Martin se porpensa
C’une grant fosse chevera ;
Qant fete fu à sa devise
Une perche a par desus mise,
Sor la perche met une cloie
Tot à conpas la contre moie,
A la perche l’a bien fremée,
La fosse a tote acovetée.
Un aignel lia sor la perche,
Se Ysengrin par là s’adrese
Et l’aignel en voille porter,
De sa cloie l’estuet tumer,
Et jà si tost n’i montera
Con il en la fosse cherra.
Qant il l’ot bien apareillié,
Alé s’en est, si l’a lessié.
Ysengrin qui grant fain endure
Se lieve à une nuit oscure
Qant toute gent se dort ségure,
Et est venuz grant aléure
Là où seut prendre sa pasture.
L’aignel trove par aventure ;
Qant vit l’aignel, si fist grant joie
De ce qu’il a encontré proie :
Or n’a péur que nus le voie,
Séurement s’en va sa voie.
Sitost con monta sor la cloie
Chaüz est enz, car ele ploie :
Ysengrin voit que il est pris,
De l’eschaper n’est-il pas fis.
Ha ! las, dist-il, dolent, chaitis,
Con covoitise m’a sorpris !
Et puis-je bien dire et jurer
Que de ci ne puis eschaper :
Or m’estovra chier comparer
La brebiz que m’en vit porter ;
Cil dit moult bien qui set conter
C’une foiz doit le pot verser.
Li Prestres fu toz trespensez
Et cele nuit toz esgarez,
C’onques la nuit ne pot dormir.
Sitost con il vit esclarcir
Il lieve sus ignelement,
Une maçue en sa main prent,
A la fosse vint, par le treu
Si a dedenz véu le Leu.
Qant il le voit grant joie en fait,
La perche et la cloie sus trait ;
Puis se deffuble par grant ire,
A Ysengrin conmence à dire :
Sire Ysengrin, or vos vaudrai
Ce que je tant pramis vos ai ;
Aprendré vos à cest baston
Conment Prestres Martins a non.
Li Prestres lieve la maçue,
Et Ysengrin l’a bien véue,
En la teste le volt ferir,
Et Ysengrin sot bien guenchir,
A cele foiz nel’ toucha mie,
Car il sot trop de l’escremie.
Prestre Martin est aïrez,
En autre sens s’est porpensez :
En avalant le baston mist
Desor le Leu et si li dist,
Enz en mon cuer forment me dueil
S’à cestui cop ne vos crief l’ueil :
Qant ot ce dit le baston boute.
Ysengrin qui le coup redoute,
Garde à son oil, le baston prent,
Et le Prestre vers lui le tent ;
A ses deus mains le sache fort,
De çà en là li Leus s’estort,
Le baston li cuide esrachier.
Qui donc véist Prestre esforcier
Par bien tenir cele maçue,
Li Leus d’autre part s’esvertue ;
Moult s’esforçoient anbedui
Chascun dou baston trere à lui.
Si con nos conte l’escripture,
Au Prestre avint une aventure,
Que la terre est soz lui fondue,
Desoz ses piez li est chéue.
Il s’en vet enz o le baston,
Or a Ysengrin compaingnon :
L’uns fu deçà, l’autre delà,
De péor l’un l’autre esgarda.
Moult ot Ysengrin grant péor,
Mès li Prestre ot assez graignor.
Il a conmencié son sautier
Par toz les moz à verseillier,
Et puis dist conmandacion
Que Diex le gart de la prison.
Ceste sept siaume disoit plus,
Miserere mei Deus ;
Pater noster disoit enclin.
Sor le col li saut Ysengrin ;
Li Prestres chaï demi-mort,
Et Ysengrin s’en va moult tost
Par bois, par chans aussi se fiche.
Li prestres remest en la briche ;
Prestre Martin ne rit, ne muit,
Et Ysengrin moult tost s’en fuit ;
A lui-méismes rit assez
De ce qu’il est si eschapez
Et qu’il li sailli seur le dos
Qant en la fosse l’ot enclos.
Si serjant l’en orent tost tret,
Puis se rient de ce qu’a fet.
Puis bien vos dire et aconter
Que onques messe ne sautier
Ne chanta puis de bon entent
Ne par si bon entendement
Conme il fist ovec Ysengrin,
Tant con il fu en son engin.