Le Roman du Renart - D. M. Méon - 1826/12
Si conme Ysengrin parti la terre aus deus moutons.
Or vos redirai d’Ysengrin
Qui se remist en son chemin,
Car il s’en voloit repairier.
Qant il ala esbanoier
Les brebiz oit es chans beller,
Cele part emprent à aler.
Si con il fu dou bois issuz,
Deus moutons a es chans véuz,
L’un fu Belin, l’autre Bernart,
Moult les amoit sire Tiehart :
Au chief du champ s’esbanéoient
Et de lor cornes se hurtoient.
Que qu’il fesoient leur mellée
Lor bergiere s’en iert alée,
Li bergiers les ot oubliez,
Iluec s’en erent outre alez.
Li vilain qui moult par sot peu
La male garde pest le Leu,
Si entre Bernart et Belin
Ne se gardent voir d’Ysengrin ;
Se cil ne sont et sage et cointe
Mar i fu fete cele pointe.
Belin si fu le plus coarz,
Premierement parla Bernarz,
Bien veingniez-vos, biau sire Leus.
Je ne vos salu mie andeus,
Jà beste ne saluerai
Puis que je mengier la vodrai.
Sire Ysengrin, nos savons bien
Que nos somes ambedui tien
Et que andui nos mengeras
De quel eure que tu vodras ;
Mès se toi plet par ta franchise,
Primes nos fai tant de servise
Entre nos deus met acordance,
Si tendra leu à grant vaillance :
Qar il dist que cest chans est siens
Et je redi que il est miens ;
Sire, se vos le partisiez
Et el champ bien nos méissiez
Si que g’en éusse ma part,
Et l’autre en doinsissiez Bernart,
Dont poez fere vo plaisir
De nos deus et toz vo desir.
Dist Ysengrin, moult volentiers,
Or me dites conment premiers.
Sire, soiez en la foriere,
Chascuns de nos se traie ariere,
Et devant vos vendron corant.
Cil qui premier vendra avant,
De tant con il plus tost corra,
La greingnor part du champ ara.
Dist Ysengrin, et je l’otroi,
Or vos traiez en sus de moi ;
Belin ira de çà à destre,
Et Bernart ira à senestre.
Belins estoit le plus igniax
Qui estoit le plus jovenciax ;
Mès Bernart estoit plus senez
Por ce qu’il estoit li ainz nez.
Conmunément sont esloingniés
Si con li Leus l’ot desresnié.
Il lor a dit, seignor, movez,
Fetes le miex que vos povez.
Belin s’esmuet de grant ravine,
Qant vint au Leu, ses cornes cline,
Par grant vertu fiert Ysengrin
Si qu’il le giete tout sovin
Tout estendu de l’autre part.
Au relever es-vos Bernart
Qui le fiert en l’autre costé,
Devers Belin le r’a gité :
Qatre costes li ont brisié,
A bien petit l’ont mort lessié,
Puis si s’en tornent à itant,
Du Leu s’en vont escharnissant.
Il se pasme plus de cent foiz,
Si est angoisseus et destroiz ;
Le sanc li saut à grant randon
Par mi le nez à grant foison.
Qant il fu un poi acoisiez,
De pasmoison est repairiez :
Ha ! las, dist-il, dolenz chaitis,
Con sui maléurez tout dis !
La costume ai à l’esprevier
Qui l’aloe vet tant chacier
Que il la prent par tost voler,
Et puis si l’en relet aler :
Le vif déable, li seignor
M’avoient fet partisséor ;
Et que devoit à moi tenir
De terre doner et partir !
Ceste branche est bone et petite
Et bien fete, s’ele est bien dite.