Le Roman du Renart - D. M. Méon — 1826/60
Einsi comme li Rois Nobles fait assaillir Maupertuis.
Lors conmande que on assaille
Li Rois Nobles de toutes pars.
Al assaut acourt li lupars
Et o lui Ysengrins li leus ;
Tibiers li cas n’i vint pas seus,
Ke o lui vint Raous ses fius,
Dont vint Boskés li escurieus,
Et si i vint li tors Bruians
Et od lui li sainglers Bauçans,
Bruns li ors et ses fius Bruniaus :
Wanemers i vint li pourciaus.
A l’assaut vint Robués li bués
Ki cauciés ot ses sollers nués ;
Anieus li bugles i fu,
Ki lor gietoit le griois fu.
Soumeleus li loirs i ala,
Cil i traist moult et i lança ;
Si fist Froibiers li crekeillons
Et Espinars li ireçons,
Et Felenes li pors espins.
Od lui Dans Grignars li mastins
Et li siens freres Roeniaus,
Takés et Hustins li caiaus
Qui va là : li kiens à l’assaut
Se met, tout entor trepe et saut,
Et Fuellés li brakes glatist,
Et Ferrans le roncis hanist,
Il et Moriaus li bons cevaus,
K’en tentist li mons et li vaus.
Al assaut vint l’asnes Timers
Et si doi fil, cascuns ert bers.
Al assaut vint Pelés li ras,
Cius fist merveilles haut et bas,
Et od lui Cantecler li cos
Ki ne trueve nului tant os
Ki s’ose nés metre as cretiaus.
Ki lors vist geter mangouniaus
Et traire quariaus d’arbalestre,
Ainc mais nus ne vit gerre nestre
Si crueuse pour aussi poi.
Cil dedens giétent caude poi,
Ole caut et ardant metal ;
Mais à Renart avint trop mal,
Car Noirons li fouans foui
Si c’une grant tour abati :
De çou ot Nobles le cuer lié,
Et Renart l’en ot coroucié.
Atant es Hardi le lupart
Ki crie, or cha, Dieus i ait part,
A cel lés ert li castiaus pris.
Adont oïssiés hus et cris
Si grans que au mien ensient
On n’i oïst pas Dieu tounant.
Lors fist Renars tout sans atendre
L’arc à tour en la grant tor tendre :
Au descokier fiert le lupart
En le quisse, et fiert d’autre part
Et ataint Roi Noblon où pié,
Si que il l’a forment blecié,
Dont fist li Rois tantost souner
Le retrait, et laissier ester
L’assaut, car li Rois ert navrés
Et li lupars. Cascuns portés
Fu lors as tentes et couciés,
Cascuns ert moult mesaaisiés.
Ses mires fist li Rois venir
Pour lui et li lupart garir.
Trives requist Renars tandis
Viers le Roi sans plus quinse dis.
Volentiers li Rois li douna.
Tandis Renars se rehourda
Et moustre bien et fait sanlans
Que jà jour n’ert vis recréans
El pensé qu’il ne violt moustrer
K’il s’en bée à fuïr par mer,
S’ira es Illes d’Orient
Et es Illes viers Occident,
En Etyope et en Turkie,
Et es Illes viers Barbarie ;
Et en Europe ira ausi,
Et es Illes viers miedi
Por sodoiiers et en Aufrike,
Et en Cezile tiere rike,
En Aise et en Septentrïon.
Il ne remanra region
El monde sodoiiers ne quiere,
Gens ara de tante maniere
Od lui et tant dou sien donra,
Que cascuns od lui acourra.
Sace li Rois que que nus die,
A le guerre ne faurra mie
A nul jour tant c’ait vie el cors.
Atant es vous devant lui lors
Le messagier le Roi Noblon,
C’on nomme Duuin le coulon ;
Renart de par le Roi bailla
Une letre et il le puira
Son capelain tantost à lire.
Quant l’ot parluite, si souspire
Li capelains. Renars li rueve
K’il die en haut çou k’il i trueve,
Et cius dist, sire, jel’ otri.
Lors conmença à dire ensi.