Le Roman du Renart - D. M. Méon — 1826/48
Einsi comme Rois Nobles assaut Maupertuis et com si fil se font lever à glaives sur les murs, et Renart et si fil leur sont venu au devant.
Or tost as armes, chevalier,
Je conmant que cascuns assaille
A Malpertruis. Lors la piétaille
I court errant lancier et traire.
Entour eus font grant luminaire
De cierges, d’estrain et de gluis,
Car encore estoit noire nuis.
Einsi conme sour l’ajournée
Cil dedens de grant randounée
Se deffendent com gent apris
De guerre, et de courous empris.
Moult fu l’assaus aspres et durs,
Tibiers li cas s’ahiert as murs,
Et si doi fil por esprover
Lor cors et d’iaus faire parler.
Tant rampent qu’il sont as cretiaus,
Od eus li singes Cointeriaus
Et Martins ses fius ki derriere
Ne fu, mais devant la baniere
Le Roi, portoit as murs la poie,
Lors crie en haut, bien vuet c’on l’oie,
Aïe ! pris est li castiaus.
Renart ki moult estoit isniaus,
D’un fausart tel cop li douna
C’où fons dou fossé le rua,
Et tous les autres ki ramperent,
C’aval el fossé se trouverent ;
Mais nesuns d’eus n’i fu bléciés,
Car il céurent sour lor piés.
De ciaus li os forment s’esmaie,
Et Belins li moutons s’assaie
Au mur hurter por effondrer,
Il et si fil pour esprouver
Lor force ; et Bauçans li sainglers,
Avec lui pourciaus Wanemers.
A leur musiaus vont deffouant
Le terral : l’escurieus salant
Va sus et jus. Ki lors véist
Morel le ceval com hanist
Et fiert as murs des piés desriere
Il et Ferrans que avis ere
Que déussent le mur abatre.
Qui lors le grifon vist esbatre
Et voler deseure les murs,
C’à le fuite li plus séurs
Se mist, mais li grifons en prist
Dis et puis en prison les mist,
Et puis ravole de recief,
Mais Renart le prist à meskief,
Qu’il le feri de son fausart
Un tel cop que il li depart
Jus les maistres coutiaus del ele.
Dolor sent c’onques mais jour tele
Ne senti ains puis k’il fu nés,
Car plus de dis fois s’est pasmés.
Quant pot parler à cief de piece,
Dist, n’est nus que il ne meskiece
A le fois, et tant va li pos
A l’iauwe qu’il brise. Li os
S’esmaie moult fort dou grifon :
Plains de courous, de grant randon
S’enbat l’ostrisses, un en prist
Desus les murs esrant l’ocist,
Et l’aubert dou dos li menga.
Plus de quatorze en mehaigna
Ançois que il laissast son vol ;
Mais Renart le feri où col
De son fausart, jus li éust
Caupée le tieste, ne fust
L’aubiers dont ot le gave plaine
K’il ot mengié. Moult se demaine
Mehaus li agace et espreke.
Lors s’assist sour une breteske
Ele et Vrediaus li papegais :
D’estris, de tences et de plais
Assalent, moult mainent grant noise.
Timers li asnes ne s’acoise
Il et si fil de recaner
Por ceus dou castiel estouner.
Bruiaus li tors i prist à muire
Por ceus dedens grever et nuire.
Lors prist Roeniaus à usler
Il et Grignars. Lors au brouster
Se prisent li chievre et li bous
Por plus grever Renart le rous.
Cascuns assaut au mius k’il set,
Et Ysengrins ki Renart het,
Les amoneste de bien faire.
Entre Alixandre et le roi Daire
N’ot assaut onques tant felon.
Ki lors véist Rinoceron
L’Unicorne conme il s’efforce
Que li castiaus soit pris à force,
Hardis li lupars vistement
Assaut Nobles hardiement.
Li fius le Roi et Leoniaus
Ses freres moult de lor aviaus
I ont, car as glaives se font
Dou castiel sour les murs amont
Gieter ; mais Roussiaus et Grinbiers
Vienent de tors et de traviers
Et lor gent, et cil se deffendent
Sour les murs et fier estor rendent
A ciaus dedens, et reculer
Les font un arpent, et c’est cler
S’il éussent à tans secours
Éu, li castiaus et li bours
Fust pris par eaus à ceste fie.
Et quant il virent point d’aie
N’aroient, si se retornerent,
Et jus des murs s’adevalerent ;
Mais au descendre, de caillaus
Furent convoiiet et de paus
De quesne, mais onques navré
N’en furent, s’en ont Dieu loé.
Li Rois fait le retrait souner,
Lors laissent tuit l’assaut ester ;
Lassé estoient durement,
Car il orent moult longuement
Assali très l’aube crevant
Jusques à miedi sounant,
Si estoient moult travillié.
A lor tentes deshaubergié
Se sont et au mengier assis.
En aus n’avoit ne ju ne ris,
Car li plusior furent navré,
Et si en i ot maint tué ;
Et Renart des siens i pierdi
Des plus prisiés cent et demi.
Au Roi requiert trives deus mois,
Volentiers li douna li Rois
Pour les mors faire ensevelir
Et les navrés faire garir
Li douna jour si longuement.
Les trieves tindrent fermement
D’une part et d’autre. Tandis
A fait Renart que renforcis
Est Malpertruis ; ses murs refaire
Fist et grande vitaille atraire
En son castiel por douze ans vivre.
Li gent Renart tout à delivre
Aloient vendre et acater
En l’ost. Tandis recarpenter
Fist ses engiens Nobles li Rois,
Que li ot ars li fus grigois,
Et si fait refaire sen pont
Et sen bierfroi en contremont
Recarpenter et redrecier,
Et ses armes r’aparillier.
Tandis qu’il furent à repos,
Li Rois ses sodoiers lor sols
Retailla le tierc et tolli,
Dont sa Cours moult en afoibli.
Li plus grant de lui s’estrangierent
Par courous et si le laissierent.
De son conmun peule pierdi
Le tierc u plus, et si vous di
Que par le conseil le faisoit
Ysengrin qui çou li looit.
Par mauvais consillier à Court
Souvent tes usages a court
Dont li sires piert los et pris,
Et avoec ses millors amis.
Par mauvais consel mains hosteus
Est hounis. Tu, hom ki es teus
Ke tu as grant tiere à baillier,
Onques ne fai ton conseillier
D’ome ki ne soit de boin non,
Et soit de boine estrassion
Issus, et qu’il soit caritaules
A tous, et dous et amiaules,
Et k’il soit sages et discrès,
Et puis que tu si fait le sès
Croire et cremir et puis amer
Le dois, ne jà n’aies amer
Cuer sour lui por riens c’on t’en die,
Nus n’est sour qui on ne mesdie.
Mais au jour d’ui li grant signor
N’aiment nului for le blandour,
L’escars, le mesdisant, l’aver,
Ceaus font en lor osteus monter
Si que li signeur en avalent,
Por çou que li sage qui valent
Les laissent, car ne puet durer
Larges cuers por riens à l’aver.
Si que moult vaut, je n’en dout mie,
Grans sire qui boine maisnie
Tient entour lui en son ostel,
Car ne puet en millor chatel
Metre son or ne son argent,
Car Dieus, li mondes et la gent
L’en sevent gré et mieus l’en vient
Sa cose ; et au jour d’ui avient
Que li mauvais est amontés
Ains que li boins, dont c’est pités.
Kiconques fait dou sierf signor,
Lui et son regne en grant dolour
Met, et au roi Daire paru
Par ses siers c’ot amontés, fu
Ocis et escilliés ses regnes.
Tu, grans sires, c’au jour d’ui regnes,
Pren garde à çou, pas ne folie
Hom ki par autrui se castie.
Sires ki mauvais conseil croit,
Lui méismes avant deçoit :
Li Rois Nobles par çou pierdi,
Car li mius de s’ost le guerpi ;
C’onques princes escars n’avers
A bien ne vint, mais com li mers
Flue, doit sor les boins fluer
Li siens et largement douner
Doit à tous, et s’il est escars,
Des boins ert petite sa pars,
Et des mauvais ert assasés.
Pluseurs s’en est caitis clamés.
Tout si fist mesire li Rois
Nobles ; por çou qu’il fu destrois
Et escars, a ses gens perdus.
Renart a tous ciaus retenus
Ki dou Roi s’estoient parti,
De sen avoir tant lor parti
Et si larghement lor douna,
Que partout li nons en ala.
Tant li vinrent de sodiiers
Que il en ot bien cent milliers,
Tous eslus d’armes, n’est pas gas.
Contre le Soudant de Damas
Péust combatre gent à gent.
Des parties viers Orient
Li vint Cerastes uns sierpens
En sodées ; moult ert de dens
Crueus, et con moutons cornus.
De car d’oisiaus vivoit le plus,
Ses decevoit com li houpius,
Tant ert de nature soutius.
Mors-soudaine li cos Basiles
I vint, et de plus. de dis villes
Ocist les gens de son regart
En son venir. As sols Renart
Vint li Loutres et li Fouans
D’Etiope ù caut fait ; engrans
De faire d’armes li dragons
I vint ; tendre ses pavillons
Fist defors Maupertuis es prés,
Et li cos Basiles dalés
Les siens, et Cerastres ausi.
Tant sont fort, poissant et hardi,
Plain d’orguel, et si pau doutoient
Roi Noblon, que il ne daignoient
En Malpertruis herberge prendre,
Et pour çou orent-il fait tendre,
Lor trés et lor tentes as cans.
Le jour devant triuwes falans
Une espie le Roi conta
Que Renart dis tans de gens a
K’il n’ait, et que si sodiier
Que il ne vot mie paiier
Çou qu’il leur devoit plainement,
Sont à Renart. Trop à grant gent
D’Orient et de ces parties.
Rois, puis que tes gens sunt parties
De ti, va, fai pais à Renart.
Respont li Rois, Jhesus m’en gart
Que jà jour face pais à lui,
Car à son oés m’a trop d’anui
Fait, mais di moi liquel alé
Des miens sont od Renart, celé
Ne me soit, mais di le en apiert.
Sire, pierdu avés Tibiert
Et ses deus fius, Rinoceron
L’Unicorne par Saint Symon,
Le singe Cointeriel ausi
Et si fil, sire, et si vous di
Que le bugle pierdu avés
Et le bouc ; ceus c’ai ci nommés
Vi o Renart, et les oï
Devant Renart clamer de ti
De ce que retaillas lor sos :
De ce faire fus plus que sos,
Sire, et cius qui le vous loa
Moult mauvais conseil vous douna,
Car vous en avés couroucié
Vos barons, si vous ont laissié
Par courous, et s’en sont ralé
En lor païs tristre et iré
Pour çou que croire nes vosistes
Et k’Ysengrin ançois créistes.
Or avés les sols retailliés,
Prendés çou que i gaaigniés,
Li loupars vos cousins Hardis
Par courous s’en est departis
Viers son païs. Li tors Bruians
Il et Bruns l’ours, od eus Bauçans,
Cist nos ont laissié en le trape.
Si nous a laissié Malegrape
Li grifons et li olifans,
Moriaus et li Roncis Ferrans
Et l’Ostrisses Desdaingneus, sire,
Ki enviers vous mousterra s’ire,
Ce dist, s’il vit, et grevera,
Car pour vous sen païs laissa
Et maisement li avés sols.
Sire, je vous di à briés mos
Que faciez pais se vous poés
A Renart, car pooir n’avés
A lui d’assanler gent à gent,
Car saciés le tout vraiement,
Soissante en a contre un des vos.
Renart n’est mie de mort bos,
Ains est hardis et corageus,
Sages et soutius et viseus :
Larges est et larghement doune
Le sien as siens et abandoune :
Il ne fait mie sen tresor
De pieres ne d’argent ne d’or
Si que vous, mais de chevaliers,
Se siergans d’armes, d’escuiers
Preus et hardis ; n’a tresorie
Fors que de boine gent hardie.
Rois, de son tresor conquerra
Le tien s’il viut et cacera
Toi et ta gent du regne fors.
Rois, croi conseil, u tu ies mors.
Quant li Rois l’ot, à poi n’esrage.
Atant estes-vous un message
Au Roi que Renart i tramist,
U qu’il voit le Roi, si li dist :
Rois Nobles, à demain bataille
Aras, ce saces-tu sans faille,
Gent à gent, Renart t’en semont,
Hui sunt triuwes, demain faurront.
Por le Roi respont au message
Ysengrins, et dist, cest outrage
Pora bien Renart comparer,
Et de ce se puet bien vanter
C’a bataille ne faudra mie
A demain se li Rois l’otrie.
Et li Rois respont, je l’otri.
Lors atant a li mès brandi
Son espiel en signe d’estour
Crueus ; lors a pris son retor
Dusqu’à Renart, et à demain
Dist, de çou soiiés tout certain,
Arons bataille à jour nommé,
Car Rois Nobles l’a créanté.
Quant Renart l’ot, sans arester
Fist conmun ban en haut crier
C’aparilliés soit sans atendre
Cascuns conme pour soi deffendre,
Et pour grêver son anemi
A demain arons, je vous di,
La bataille, et qui conquerra
Quoi que ce soit, il en pora
Faire conme dou sien sen preu :
Ce vous doit esmouvoir que preu
Soiiés, et mie n’entendés
Trop au gaaing. Se vous n’avés
Riens conquis, Renart vous donra
Tant du sien qu’il vous duerra,
Et che devera bien souffire,
Et encore vous fait mesire
A savoir que qui un fuiant
Des nos ocira, un besant
Ara, et de çou séurs soit,
Car uns fuians desconfiroit
Tout une ost. Lors se teut, que plus
Ne dist. Cascuns lors si esmus
Fu de bien faire et si ardans,
Que cascuns ert en soi Rollans
De volenté. Et lendemain
Fist Renart issir hors au plain
Sa gent en conroi bien armée.
La premiere esciele a livrée
Grimbiert son cousin le taisson.
De la seconde lors fist don
Ses deus fius. La tierce bailla
Cerastes que il moult ama.
La quarte bailla le Dragon
Pour çou qu’il estoit de grant non.
Et la quinte le cok Basile
En qui bataille ot bien dis mille
Ke chevaliers et ke siergans
Bien armés, hardis et aidans.
La sissime retient od soi.
Ensi ordené en conroi
Se misent ensanle au cemin.
Li fier des armes grant tintin
Rent et grant son, et li destrier.
Al aler font si grant porrier
Que merveilles. Au roi Noblon
Ens en son maistre pavillon
Li dist un més, et jà s’armoit
Li Rois et sa gent et faisoit
En son tref devant lui canter
Messe l’Arceprestre Timer,
Mais ançois s’estoit fais confiès,
Et trestoute li os apriès.
S’en estoient plus asséur ;
Car cius est enclos de boin mur
Ki confiés est et repentans.
Li Rois fist ses trompes plus grans
Souner pour sa gent esbaudir.
Adont prisent tuit à issir
Sour les destriers armés ensanle
Que cius et airs et tiere en tranle.
Li Rois ses eskieles ordene,
Pour ses fius la premiere assene ;
La seconde sour Ysengrin
Que Renart het de grant cuer fin.
Sor Bricemer le cierf le tierce
Mist, adont entre prime et tierce
Estoit ; et la quarte livra
A deus où il moult se fia,
Le Camel et le Dromadaire.
De la quinte ne me doi taire ;
Celi li Rois caiielle et guie,
Nul n’en i a qui pour riens fuie.
Tardiu bailla le limeçon
Li Rois son roial gonfanon.
Sierrément en un tropiel
Maine li Rois lés un praiel
S’esciele, et son cors à garder
Carga l’Arceprestre Timer,
Cantecler et Belin ausi,
Por çou qu’il sont preu et hardi.
Li Rois a bataille à mescief,
Dis mil contre cent mil, c’est grief.
Paour a, n’en monstre sanlant,
Mais sa gent va amonestant
De bien faire, et cascuns respont
C’au jour d’ui preudome seront.
Lors s’esmuevent tout conmunal,
Si s’en vont tout le fons d’un val ;
Amont vienent dusques au plain
Que il trouverent priès que plain
De gens à bataille rengie
Ki tout erent de la partie
Renart. Paour a, n’en puet mais
Li Rois et bien gréast le pais,
Et les damages restorast
Que Renart a et tout le gast,
Et dou meffait le clamast quite
S’il fust qu’en parlast. A le fuite
Se mesist, s’il osast de honte.
Renart ki bien set que ce monte
De guerre, voit li Rois paour
A, et k’il en a le millour
Dou giu, et à sa volenté
A soi méismes a pensé
Sages est ki fait de son tort
Son droit ; se mesires à mort
Estoit mis, et tout cil ocis
Ki od lui sunt, s’a tant d’amis
Li Rois que il seroit vengiés
De moi, u seroie caciés
Jou et li mien dou regne fors,
Et s’en seroie en la fin mors.
Pais ne puis faire ù n’aie hounor,
Car cascuns voit bien le millor
En ai, et se jou m’umelie
A men plus biel, je n’en dout mie
Que jou n’aie dou Roi pardon
Et si m’aront cier li baron,
Et si me porai bien vengier
D’Ysengrin que jou n’ai point chier,
Et au Roi le porai meller,
Pour çou que par lui recoper
Et par son conseil fist li Rois
Les sols, si quit bien ains un mois
Estre grans maistres del hostel,
Et si aquerrai un los tel
Dedens un an, que se moroit
Li Rois, que on de moi feroit
Souvrain bailliu, et si seroie
Baus des enfans et si poroie
Estre Rois. Teus vens puet venter
Et tous mes anemis grever
Et faire d’eaus ma volenté.
Et quant il ot tout çou pensé,
A son conseil gehist son cuer
De pais faire, et dist à nul fuer
Encontre sen signor n’iroit
A bataille, et s’il ocioit
Le Roi et ses gens, seroit-il
Quites pour çou ? Par foi nenil ;
La tiere en seroit escillie,
Et jou et toute ma lignie.
Mais savez-vous que je ferai ?
Descaus et à pié m’en irai
Crier merci au Roi Noblon,
Jou sai bien que j’arai pardon
Et qu’il pardonra ensement
A trestous ciaus son mautalent
Ki l’ont laissié, et le tais son,
Se puis, ferai avoir pardon.
Mais s’ensi estoit que li Rois
Me vousist metre en son defois,
Et ne me vousist pardouner
Son courous, je vous voel rouver
Et conmander secourus soïe.