Le Roman du Renart - D. M. Méon — 1826/42
Einsi conme Renart et Orguiaux consoillent.
Renart s’assist, Orghius parla
Bas à conseil et dist ensi :
Courouciés sui. Ce poise mi,
Ce dist Renart ki a ce fait ?
Le fil Ysengrin. Mar lor vet,
Ce dist Renart, en quel maniere ?
De çou k’il m’ont bouté arriere
Par lor bien fait. Renart entent
Que la cose à envie tent ;
Moult en fu liés dedens son cuer,
A Orguel dist, à nesun fuer
Ne laissiés ne vous en vengiés.
Renart, ore m’en consilliés.
Volentiers, ce respont Renars.
Renart fu plains de males ars,
Pourpensa c’ore se poroit
D’Ysengrin vengier s’il voloit
Et de trestoute sa pourgine,
K’il les haoit de grant haïne,
Car en faide orent longhement
Esté, et tout fu pour Hiersent
Feme Ysengrin dont Renart ot
Ses volentés s’en fist wihot
Ysengrin ki moult l’en haï.
Renart mainte paine en souffri,
Apaisiés les avoit li Rois
Pau plus, pau mains avoit d’un mois,
Si k’il s’en moustroient ami.
Mais onques à Renart n’issi
De son cuer pour çou la haïne,
Renart d’estudiier ne fine
K’Ysengrins fust à mort livrés.
D’une traïson pourpensés
S’est dont Ysengrins et si fil
Erent à mort et à escil
Livré, se Dieus n’en a pité.
Renart descuevre son pensé
A Orguel et dist, se volés
Croire mon conseil vous serés
Des deus fius Ysengrin vengiés
Ains dis jours : or soiés haitiés.
Conment ? biau Renart, dites moi.
Ensi. Un hiraut le tournoi
Faites crier chi à mardi,
Je le vous lo et si vous di
Ke là porés-vous acomplir
Des fius Ysengrin vo desir,
Et d’Ysengrin se vous volés.
Adont fu li tournois criés
Par l’assens de Noblon le Roi
Qui empris a c’à cest tornoi
Vaura prendre as armes congié,
Et s’a li Rois à tous proiié
Kemunement que pour s’amour
Voellent tournoiier à cel jour.
Trestous conmunement l’otroient.
Li nouviel chevalier s’esjoient
De ceste cose et moult lor plaist.
Des nouviaus chevaliers se taist
Li contes, et vient à Renart
Ki cuer a plain de mauvais art.
A Orguel vient, si s’ageneille,
Et si li conseille en l’oreille
K’il se pourvoit de chevaliers
Si k’il set que lui est mestiers.
Bien dites, dist Orgius, vous preng
Pour mon consillier et s’enteng
Que vo troi fil sont preu et sage,
Je les retieng de mon maisnage,
Et si retieng le tor Bruiant
Et od lui le saingler Bauçant ;
Brun l’ours et son fil Bruniel
Si voel le mastin Roenel,
Cointeriel le singe et Martin
Son fil : cist donront maint tatin
Ens où tournoi. Tibiert le cat
Et ses deus fius, cist aront mat
Tantost Ysengrin et ses fius.
Le taison Grimbert ki soutius
Est, vo cousin, voel-jou od moi,
Et Malapiert son fil par foi,
Armes lor donrai et destriers ;
Od lui cascuns quatre escuiers
Ait preus, hardis et esprouvés.
Alés, si le mes amenés,
Les chevaliers, les escuiers.
Renart li respont, volentiers.
Renart as chevaliers en vint,
A aus parla, tous les detint
Avec Orguel, et d’escuiers
Quatre à cascun hardis et fiers.
Les chevaliers c’ai chi nommés
A lors à Orguel amenés
Et les escuiers ensement.
Orghius les reçoit liement :
Lors les mena en une cambre,
Dont li pavement ert de l’ambre,
A conseil, et si lor prononce
Sa volenté ; nus n’i renonce,
Ke se li fil Ysengrin vont
Au tournoi, k’il les ociront
Por les grans dons k’il lor proumet.
Cascuns à son ostel s’en vet.
D’armes pourvoient bien leur cors,
Et de destriers isniaus et fors.
De tout fine Renart pour eaus
K’il ert maistres et senescaus
Del ostel Orguel fil le Roi.
Cascuns se pourvoit endroit soi
De ciaus ki doivent tornoier,
Si qu’il affiert à tel mestier.
Au jour del tornoi au matin
Péussiés oïr grant hustin
Des hiraus ki crient en haut,
Laciés, laciés, li jours vous faut,
N’atendés mie dusqu’à nuit.
Li cor, les trompes font tel bruit
Ke la tiere en retentist toute.
Li Rois ist as cans et s’aroute
Moult bien armés sour les destriers,
Soune li fiers et li aciers.
Li Rois estoit armés moult gent,
De sinople, d’or et d’argent
Ierent ses armes et d’azur.
Qui fust là, se il n’oïst dur,
Les banieres péust oïr
Venteler. Le ciel resplendir
Couvint des armes au Roi Noble
Et de sa conpaignie noble.
Apriés le Roi issi Hardis
Li lupars ki n’ert aprentis
Mie de ses armes porter.
Sa gent fait la tiere croller,
Et lor armes resclarcir l’air.
L’ostrisse Desdaigneus où vair
Se siet que l’en ot au hanir
Une liue terre tombir.
De cuir bouli orent testieres
Leur cheval conme bestes fieres,
Et comme rade et fort destrier ;
L’Unicorne pas oubliier
Ne se volt, ains se mist as cans,
Ses armes erent moult parans :
Gens ot od lui hardis et fors.
Apriés lui issi as cans fors
Fortins li olifans de Pierse ;
Cil avoit od li gent diverse.
Ki dont Orguel issir véist,
Li tiere et li airs en tombist
De sez gens et de ses chevaus.
Jà iert de tiere li solaus
Departis et sour miedi
Aloit. Renart od lui issi
Sour un grant ceval Espaignot.
Renars à son col escu ot
De malisse et de trecerie ;
Et si troi fil par signourie
Avoient tous auteus escus
Fors que de boisdie desus
Ot labiaus par descounissance.
Cascuns des gens Orguel ot lance
Où des armes Orguel avoit
Pignon ki bien i avenoit.
Orghius le mance Proserpine
Ot en son bras, car d’amor fine
L’amoit, et s’ot son quevrechief
Deseur le heaume de son chief
Pour plus douner de hardement.
Orgius chevauçoit cointement,
C’à sa siele et à ses lorains
Ot cinc cent cloketes au mains
Ki demenoient tel tintin
Con li maisnie hierlekin.
Au vent fist se maistre baniere
Desploier ki de grant maniere
Ert faite de divers ouvrage.
Ele ert losengiée d’outrage
Contre fierté, mais c’un quartier
I ot sans plus d’outrequidier :
Renart l’a le jour conmandée.
Cent cor souner à l’amenée
Fist Orghius pour lui esbaudir.
Lor prist Ysengrins à issir
Apriès Orguel tost et vias
Il et sa gent le petit pas,
Estroit sieré en un tropiel.
Ysengrin l’escu en cantiel
Tenoit moult fort par les enarmes.
Ses escus estoit et ses armes
De larecin à roberie
Partis. Un destrier de Surie
Ot Ysengrins fort et poissant,
Et ausi orent si enfant,
Et teus armes en lor escus
K’Isengrins ot, mais que dessus
De murdre i avoit un labiel
Tout pourfilé de piaus d’agniel.
Après li griphons Malegrape
Issi ; un destrier de Halape
Ot desous lui fort et hardi.
Armes ot bounes d’or bruni
U ot mainte rice esmeraude.
Sa gent est d’assanler moult caude.
Apriès lui qui mius mius issirent
Li autre et lor conrois partirent
Esramment, puis fisent souner
Cent cors d’arain al assanler,
Mil grailles et autant buisines.
Lors s’esmuevent par ahatines
Li nouviel chevalier avant.
Orghilleus sist sour un bauçant
Ki hanist, grate, fiert et mort.
El tournoi gonfanon destort
Fiert Renart, si fil et Orghieus,
Que ce sanloit foudre des cieus.
Tous li tournois se fiert ensanle
Que cius et airs et tiere en tranle.
Conmunement entreferir
Se vont ; mainte lance croissir
I oïssiés al assambler,
Et maint chevalier revierser,
Et d’espée douner maint cop,
Et espauler et faire clop ;
Maint cheval et maint chevalier
Prison, voelle ou non, fiancier ;
Et maint biau destrier au harnas
Mener. Li Rois fiert lués où tas
L’espée où puing, le hiaume où cief :
Jà fust li Rois à grant meschief
Ne fust Tardius li limeçons
Ki au ferir des esporons
Li vint et aidier et secourre.
Ki lors véist Noblet acourre
Et Lioniel, bien péust dire
Que cascuns digne d’un empire
Estoit ; dou ruistement capler
Del acier font li fu voler.
L’Unicorne rinoceron
Voelle u non fiancier prison
Font, et puis Hardi le lupart.
Ki lors véist les fius Renart
Sour les fius Ysengrin capler,
Dire péust que baceler
Sont de grant cuer, fort et poissant.
Orgius et Renart vont cierquant
Les renseignements ; en lor voie encontrerent
Ysengrin et jus le porterent
Par sus la crupe dou destrier
A la tiere. En lor repairier
Truevent l’ostrisse Desdaigneus,
A tiere le portent honteus :
Le ceval font metre au harnas.
Par le camp point Pelés li ras,
En son venir Tybiert le cat
Porta jus dou destrier tot plat,
Mais si doi fil le remonterent
Mitous et Raous ki jurerent
Se Pelé puéent encontrer,
K’il li feront cier comparer.
Par le tournois es-vous poignant
De Pierse Fortin l’olifant,
L’espée où puing, l’escu au col,
El Grigneur tas fiert à plain vol,
Et Malegrape li griffons,
Et Espinars li ireçons,
Et li fil Timer l’Arceprestre :
Cil i sont vighereus et prestre.
Tubés et Duuins li coulons
Et Dans Frobiers li criquillons,
Canteclers li cos et Hubiers
Li escoufles ki moult apiers
Estoit, et Watiers li oisons,
Cascuns i fiert des esporons.
Et Dans Tiesselins li corbiaus
Ki estoit preus et assés biaus,
Se fiert où tournoi, et sen pan
I soustient bien par Saint Jehan.
Belins li moutons et si fil
Fierent où tournoi conme cil
Ki desirent c’on d’aus parolt.
Ysengrin truevent li wihot,
Ferir le vont de grans eslais,
Que des escus fendent les ais.
Ysengrins Belin feri si
Ke à la tiere l’abati
Et li fist prison fiancier,
Mais ne li rent pas son destrier,
Au harnas erraument l’envoie.
En son retour enmi se voie
Encontre Renart et Orguel,
Renars l’esgarde de put oel,
Dont sot bien n’en poroit partir
Sans avoir granment à souffrir,
Quatre fois hui les encontra
Dont à la tiere se trouva.
Moult les crient Ysengrins et doute,
Nonporquant avoit en se route
Ses deus fis et maint baceler
Preu et hardi. Entrecontrer
Se vont Renart et Ysengrins,
D’aus deus conmence li hustins
Fors et pesans des brans d’acier,
L’uns n’avoit gaires l’autre chier.
Quant ne puéent venir à cop
Si lancent et fierent d’estoc
De tel force et de tel viertu,
Ke desmaillié et desronpu
Sont lor escu et lor clavain.
Ysengrins fiert Renart à plain
Sour l’iaume qu’il le fist broncier
Adens sour le col dou destrier.
Renars estoit priés del outrer,
Qu’il ne pooit mais contrester
A Ysengrin ne tant ne quant ;
Jus l’éust mis del auferrant
Ysengrins, s’Orghius et se route
Ne fust ki Ysengrin desroute
Et les plusiors ont mis à piet.
En poi d’eure à home mesciet.
Renart quant ce voit, s’esvertue,
Poi se prise s’ore ne tue
Ysengrin ke de mortel gerre
Het : lors a sacié dou fuerre
Une trençant misericorde
U jà n’ara misericorde
Ysengrins, car Renart li lance
Parmi le cors jusques au mance