Le Roman du Renart - D. M. Méon — 1826/33
Si conme Renart volt mengier son Confessor.
Foux est qui croit sa fole pense,
Moult remaint de ce que foux pense ;
Foux est qui croit fole esperance
Que toz li monz est en balance.
Fortune se jeue del mont,
Li un vienent, li autre vont,
Li un devant, l’autre derriere,
Che est li geux de la chiviere.
L’un en fet povre et l’autre riche,
L’un met avant, l’autre en la briche.
Tele est maniere de fortune,
L’un porte amor, l’autre rancune :
Ele n’est mie amie à touz,
L’un met desus, l’autre desouz,
Et celui qu’ele met plus haut
Et qui plus set et qui miex vaut,
Fet-ele un mauvès saut saillir
Ou à l’entrer ou à l’issir.
Seignor, cist mondes est prestez,
Li uns a pou, li autre assez,
Et qui plus a, tant doit-il plus,
De ce sont li povre au desus ;
Et qui pou emprunte, pou rent,
En le lest vivre bonement.
Tiex a ore grant poesté,
Ançois que li an soit passé
Sera de moult povre pooir,
Ice sachiez moult bien de voir.
Par mon chief ce n’est mie gas,
L’en dit bien de si haut si bas,
Et bien sovent de grant bacesse
Remonte-l’en en grant hautesce.
Por ce est droiz que je m’en taise,
D’autrui avoir à l’en grant aise ;
Je cuit q’aucun bien en vendroit
Qui raison i regarderoit :
Qar qui euvre selonc reson,
Ne l’en puet venir se bien non.
Moult est fox qui meine posnée
De chose qui li est prestée ;
Costume est d’autrui garnement,
Qui froit l’enprunte, chaut le rent.
Fox est qui por son grant éur
Cuide estre en cest siecle asséur ;
Et si vos di bien sanz faintise,
Tant va pot à l’eve qu’il brise :
Ou tost ou tart, ou près ou loing
A li fort du foible besoing.
Cest essample vos ai mostré
Por Renart qui si est maufé
Que il œvre contre nature.
Jà nus n’aura de lui droiture,
Il prent à tort, il prent à droit,
C’est merveille qu’il ne recroit ;
Mès certes jà recreira
Jusqu’à tant qu’il l’en mescharra,
Que son Déable le demaine
Et si est tot en son demaine.
De lui ne se puet nus partir
Jusqu’à tant qu’il l’ait fait honir :
Une piece puet-il reignier,
Mès après le fet trebuchier,
Pendre as forche, ou noier en mer,
Ardoir en feu ou essorber.
A tel seignor fet mal servir
Qu’à noient le fet revertir.
Certes qui sert à tel baron,
Ne l’en puet venir se mal non.
Je ne di pas par tout folie,
N’il n’est pas droit que je le die,
Mès selonc le lieu et le tens
A grant mestier folie et sens.
Seignors, se vos volez oïr,
Je vos diré tot sanz mentir
De Renart le Gorpil la vie
Qui tant a fait de lecherie,
Qui tant à homes decéuz
Que par enging, que par vertuz.
Cent paroles a fait acroire
Dont il n’i avoit nule voire,
Il n’est nus hons que il n’engingne.
Il avint l’autrier à Compingne
Que Renart fu de giste issuz,
Or s’en revint les sauz menuz
Tout droit à la noire Abaïe.
Là avoit une compaingnie
De chapons cras et sejornez,
Cele part est Renart alez.
Onc ne fina, si vint tot droit
Là où li geliniers estoit,
Et qant il vint au gelinier
Si conmença à oreillier
Se les gelines someilloient,
Et qant il vit qu’eles dormoient,
A soi sacha le chevillon
Qui ert lié d’un hardeillon,
Dont li cloiax estoit fermez.
A soi le tret, enz est entrez,
Tot coiement et aseri
Un chapon prent, n’a pas failli
Qui bien valoit cinc sols et maaille.
Onc n’i quist nape ne toaille,
Tot maintenant li ront la teste,
Renart menjue et fet grant feste ;
Ne fet pas semblant au mengier
Que li chapon soient trop chier.
Moult par se contient fierement
Au chapon rent son mautalent
Qui riens ne li avoit meffet :
Mès bien savez que ainsi vet
Et mainte foiz avient à Cort
Que tex ne peche qui encort.
Moult a Renart de ses aviax,
Qu’il menjue les bons morsiax,
Qui grant bien li font à son cuer.
La plume et les os gete puer,
Moult fet Renart riche relief,
Et si jure forment son chief
Que maugré as simoniax
En mengera-il des plus beax.
Moult afiche son sairement,
Mès ne set que à l’ueil li pent.
Or lairons de Renart à tant
Et si diromes d’un serjant
Qui la nuit leva à pissier,
Si a oï Renart rungier.
Moult durement se merveilla
Et en après se porpensa
Que c’estoit Gorpil ou Tessons
Qui estoit venuz as chapons.
Au gelinier en vint corant,
Le clavel prist tot maintenant,
Si l’a moult tost pris et lié :
Es-vos le Gorpil atrapé.
Atant s’en vet en la meson,
En haut s’escrie, or sus, baron !
Levez tost sus et si m’aidiez,
Or est li Gorpil engigniez ;
Or saura-il assez de frape
S’il de ceste prison eschape.
Qui donc véist Moines lever
Et qui ainz ainz corre et aler
Tot droitement au gelinier
Por les gelines aïdier,
Bien li membrast de gent irée :
Mar vit Renart ceste criée,
El li sera moult chier vendue.
N’i a celui ne port maçue
Dont moult menacent à ferir
Renart s’il le puéent tenir.
A l’uis vienent, si le desferment
Et tuit de bien ferir s’aesment,
Enz entrerent trestuit ensemble.
Renart fremist, de paor tremble,
Moult se deshaite, moult s’esmaie,
Bien set que sanz cop ne sanz plaie
Ne puet issir du gelinier.
Ha ! fet-il, Moine sont trop fier
Et gent de moult male maniere,
Riens ne feroient por priere.
Diex ! Que feré ? Se prestre éusse,
Corpus Domini recéusse,
Et à lui confés me féisse,
Car se mes pechiez rejéisse
Ne m’en péust venir nus maus,
Se morusse, si fusse saus.
N’est pas tot or ice qui luist,
Et tiex ne puet aidier qui nuist.
Por ce qu’il vestent chapes noires,
Si les apele-l’en provoires ;
Je feroie que forsenez,
Bien les puis apeler maufez ;
Maufez sont noir et cist ausi,
Bien les puis apeler einsi :
Ce me covient ore esprover,
Bien les puis einsi apeler.
A cest mot saut Renart en place,
Moult s’apareille et se rebrace,
Atorne soi de bien foïr.
Vers li vit un Moine venir
Qui si le fiert parmi les rains
D’une grant maçue à deus mains,
Q’à terre l’abati tout plat.
Or est Renart conclus et mat,
Si se redresce conme cil
Qui est estors de maint peril.
Qant il vit que chascuns l’asaut,
Parmi eus toz a fet un saut
Qui qatre des Moines trespasse ;
Mès ce que vaut ? Li uns le qasse,
Li uns le fiert, l’autre le boute,
Or est entr’eus en tele route
Dont ses hauberz et ses escuz
Sera desmailliez et rompuz.
A la parfin l’ont tant mené,
Tant traveillié et tant pené,
Que en plus de quatorze leus
Li a mestier aguile et fieus.
Maint home ont de Renart fablé,
Mès j’en diré la verité
En ceste branche sanz alonge :
Or nel’ tenez mie à mençonge,
Qant Renart se fu delivrez
Et des Moines fu eschapez,
Or sachiez que moult li fu bel.
Fuiant s’en va par un vaucel,
Après entra en un grant bos,
Moult li sue la pel du dos.
Fuiant s’en vet grant aléure
Que de nient ne s’aséure ;
Qu’il ne dit mie, cul, sieu moi,
Mès se tu pos pense de toi :
A envis aïdast autrui
Cil qui son cul lesse après lui ;
Se je fusse en sa compaignie,
Moult petit prisasse s’aïe.
Ainz ne fina de corre à toise
Tant qu’il vint sor la rive d’Oise,
Et qant il vint à la riviere,
Garda avant, garda arriere,
Si a choisi enmi un pré
Un mulon de faing aüné
Qui illeques estoit lessié
Por ce qu’il n’estoit pas sechié ;
Et tant brocha à esperon,
Ainz ne fina, si vint en son.
Qant le Gorpil ot fet son lit,
En sus se tret un seul petit
Que il se voloit alaschier
Ançois que il s’alast couchier ;
La qeue dreça en arçon
Sept pez a fet en un randon.
Li premier, fait-il, soit mon pere
Et l’autre por l’ame ma mere ;
Li tierz soit por mes bienfetors
Et por trestoz mes ancessors,
Et li qarz soit por les gelines
Dont j’ai mengiées les eschines ;
Et li quint soit por le vilain
Qui ci a aüné cest fain.
Li sistes soit par druerie
Dame Hersent ma douce amie ;
Le setiesme Dant Ysengrin
Qui Diex doinst demain mal matin
Et male encontre à son lever,
Male mort le puist acorer,
Que Diex ne fist onc criature
Que je tant haie à desmesure
Conme je faz le cors de lui.
La male mort le praingne hui !
A male hart puisse-il pendre
Que nus ne l’en puisse deffendre !
Se ionques soi riens de barat,
Penduz sera ainz qu’il m’eschat.
Atant se r’est alé gesir
Que talent avoit de dormir,
Si se conmande as douze Apostres
Et a dit douze pater-nostres
Que Diex garisse toz larons,
Toz traïtres et toz felons,
Toz felons et toz traïtors,
Et toz aprimes lechéors[1]
Qui miex aiment les cras morciax
Qu’il ne font cotes ne mantiax,
Et toz ceus qui de barat vivent
Et prenent tot qanqu’il consievent ;
Mès as Moines et as Abez
Et as Provoires coronez,
Et as Hermites de boscage
Dont il ne seroit nul damage,
Pri Dieu qu’il doigne grant torment
Si qu’en le voie apertement.
Ce dist Renart li forsenez
Qui tant homes a engingniez.
Hons qui bien fet, il ne doit vivre,
Mès cil qui tot adès s’enivre,
Et cil qui emble, et cil qui tolt
Et qui emprunte et riens ne solt,
Jà cele gent ne puist morir ;
Et Diex, vos m’en puissiez oïr,
Que jà itel siecle ne muire,
Que pechié seroit del’ destruire.
Ce fu la priere Renart
Le traïtor de pute part.
Atant se test li renoiez,
Si met son groing entre ses piez.
Or sachiez bien séurement
Que il savoit bien vraiement
Que se Dex aïdoit as maux
Adonques seroit-il tous saux :
Onc plus lerres de lui ne fu
Puis cele heure que Diex nez fu.
Tost fu li Gorpil endormiz,
Car moult estoit soef ses liz.
Au matinet quant se leva,
Un mot dit que fere cuida :
Leveré moi, s’irai en proie.
Dant Goubert a une crasse oie
Que il fet bien en sein norrir,
Bien se cuide fere servir,
A Noël la cuide mengier ;
Mès se je puis tant esploitier,
Jà ne la verra néis cuire,
Qar j’en feré mes gernons bruire ;
Hui en cest jor sanz demorance
Sauré-je qu’ele a en la pance.
Mal dahez ait qui conmanda
C’onques vilain d’oue menja !
Vilain doit vivre de chardons,
Et moi et ces autres barons
Lait-l’en les bons morsaus mengier
Qui bien les menjon sanz dangier.
Renart d’ainsi parler ne fine ;
Mès la nuit ot fet tel cretine
Que les eves furent créues
Tant que au mulon sont venues.
Qant il vit l’eve blanchoier
Et le mulon dedenz plungier,
Si se conmence à dementer
Con d’ilec porra eschaper :
Qar s’il remaint desus le fain
Bien set que il morra de fain.
Que que il s’aloit dementant
Es-vos un Escoufle volant
Qui iloc s’aloit reposer
Por ce qu’il est las de voler :
Vers le mulon s’est adreciez.
Renart le voit, si s’est dreciez,
Sire, fet-il, bien veigniez-vos,
Séez-vos ci de joste nos,
Lez ceste lasse criature
Qui ci est en grant aventure
Et en tel criéme de morir :
Sire, bien puissiez-vos venir
Conme mes amis et mes druz !
Or m’a Dex fait moult grant vertuz
Qant par vos m’a si secoruz :
Vos soiez le très bien venuz
Qant à moi vos a amenez ;
Or serai confez se volez.
Li Escoufles le vit plorer,
Lez lui est alez demorer,
Si li conmença un sarmon
Por reconforter le gloton.
Renart, ce dist sire Hubers,
Par le temple où Diex fu ofers,
Clerc et provoire sont tuit fol,
Jà Diex ne place que je vol
De cest mulon à terre seche,
Se hons valt gueres qui ne peche ;
Mès cil qui assez ont fet mal,
Li parjure, li desloial,
Li sodomite et li herites,
Cil sont des paines d’enfer quites.
Atant a son sarmon feni,
Biau frere, fet-il, or me di,
Tes pechiez puez-tu regehir,
Et je sui toz prez del oïr.
Sire, dist Renart, volentiers.
J’ai bien esté neuf ans entiers
Parjures et escomeniez,
Mès ce n’est mie grant pechiez ;
Jà por escumenacion
N’aura m’ame damnacion.
Sire, j’ai esté sodomites,
Encore sui-je droiz herites ;
Si ai esté popelicans
Et renoiez plus de set ans.
Assez vos auroie à retrere,
Volentiers préisse la here,
Si devenisse moines blans ;
Mès j’ai un mal parmi les flans
Qui chascun jor par droite rente
Me prent vint foiées ou trente ;
Ice sachiez-vos tot de voir,
Que blanc moine ne moine noir
N’ont cure d’ome s’il n’est sains,
Ou s’il n’est clers ou chapelains ;
Et si ai-je si grant essoine
Que je ne puis devenir moine,
Ne si ne sai parler latin.
Si menjus volentiers matin,
Je ne porroie jéuner,
Ne fiens espandre n’aüner,
Ne fere les œvres qu’il font,
Qui me donroit trestot le mont,
Si ai trop la crope legiere,
Et fol semblant et fole chiere,
Qui trop sovent me feroit batre,
Por ce ne m’os en l’Ordre enbatre :
Par le cuer bé là où l’en bat,
Dont est-il fox qui s’i enbat.
Moine noir sont trop en mal ese,
Jà n’auront cose qui lor plese,
Trop sont tenu en grant destrece,
Neis li Abé qui les adresce
Batent-il bien le dos derriere
Qant il fet une fole chiere.
De ce esploitent-il moult mal
Qant il ne font un général,
De croistre trois foiz la semaine,
Si en fust l’Ordre assez plus saine,
Et qant il éussent croissu
Et ele éust le cul batu,
Si la méisse hors du cloistre
Tant que il fust saison de croistre :
Se il croissoient trop sovent
Il en sordroit noise au covent ;
El n’en porroit soffrir la poine,
Que trop sont lecheor li Moine.
Il la debriseroient toute
Si que jà mès ne tendroit goute,
Et si porroit bien avenir
Que grant mal en porroit venir,
Que il entre eus se conbatroient,
Espoir si s’escerveleroient,
Si voudroit chascun croistre avant,
Aussi li viel con li enfant,
Et li serjant conme li mestre.
Mès ice ne porroit pas estre,
Et si ne seroit pas reson,
Que blasme en auroit la meson,
Si en seroit pire lor Ordre :
Por ce ne lor fet nul amordre,
Et la blanche par est si fort
Que nus n’i entre ne soit mort
De jéuner et de veillier,
De chanter et de verseillier
Et d’ovrer et de laborer,
Si n’i fait pas bon demorer,
Ce dient cil qui ont esté,
Car je n’en sai pas la verté ;
Mès j’en oï Ysengrin plaindre,
Qui est assez plus fort et graindre
Que je ne sui bien les deus parz,
Qui me dist q’uns moult mavès garz
L’avoit tant batu en chapistre
Por ce qu’il failli à l’espistre,
Qu’il le laissa conme por mort :
A moult grant paine s’en estort,
Jamès n’ert jor qu’il n’en soit pire.
Qui li donroit tout cest empire
Et le feroit seignor dou mont
Et de toute la gent qui sont,
N’entreroit-il en l’Abaïe,
Car durement l’a enhaïe ;
Et je conment i enterroie
Qui nul mal soffrir ne porroie,
Et qui consirrer ne me puis
De Hersent ne de son pertuis ?
Pertuis ! je ment, ainz est grant chose,
C’est merveille que nomer l’ose,
Et por ce seul que il m’en membre
M’en fremissent trestuit li membre
Et herice tote la char.
Par mon chief ce n’est mie eschar,
Que ce est li plus nobles nons
Qui soit en cest siecle que c… :
Merveilles est qant je le nome,
C’est la riens qui plus ocist home
Et qui plus tost le chace à mal
Et plus le fait torner el val,
Et dès qu’il le velt aïdier,
De ce n’estuet mie plaidier,
Il li done plus en un jor
De joie et de bien et d’amor
Que bouche d’ome ne puet dire.
C… est li plus soverains sire
C’on puist en tot le mont trover.
Ce n’est pas ore à esprover
Que maint en ont esté gari
Qui moult estoient esmarri.
L’en ne porroit la plaie estaindre,
Qar l’en ne puet au fons avaindre,
Et se la plaie n’est atainte,
El n’ert jamès nul jor estainte,
Ainz durra pardurablement,
Qar c’est plaie sanz finement
Et qui par mauvestié perdra :
Mal dahez ait qui l’en plaindra.
Ne cuidiez pas que ce soit fables,
Je ne vodroie mie estre Abes
Se Hersent n’estoit Abéesse,
Ou celeriere ou prioresse,
Ou el ne fust en tel leu mise
Où ele fust fors de justise,
Q’éusse de lui toz mes bons
Et ele de moi tos les sons,
Qar moult est l’Ordre bone et bele
Qui est de mâle et de femele.
Li Escoufles prist à parler
Qui plus ne s’i volt demorer.
Renart conmença à chastier
Et durement à laidengier :
Fel vein, fel rous, fel recréuz,
Tant par es ore mescréuz
Q’as à Hersent t’amor donée,
A une viéle espoitronée
Qui ne puet mès sor piez tenir ;
Tu la puez bien trop maintenir,
Renart, moult par est ses c… biaux :
C’est uns Déables, uns Corbiaux,
C’est une vielle barbelée
Qui porté a verge pelée
Espoir plus de qatre vingts anz,
Ou plus ou mainz, je ne sai qanz ;
Mès itant sai-ge bien de voir,
Et tu le déusses savoir,
Qu’il n’a jusqu’à la mer betée
Garçon qui ne l’ait garçonée.
Ha ! quel soulaz, quel druerie !
Trop est vielle sa puterie,
Ele a entor le cul plus fronces
Que un arpent de bois n’a ronces.
Chaitif, moult par devroies fondre,
Jà te porroit-ele repondre
En la pel qui au cul li pent ;
Fai toi confès, si te repent
Et de cel pechié et des autres
Que tu ne voises o les autres
En Escosse ou en Engleterre,
El ne t’ira gueres loing querre,
Ainz t’aura tost mis en oubli.
Se tu estoie à Chambeli
Ele iroit ainz à Ronqueroles,
Por que les voies fussent moles,
Ne t’iroit-ele jà véoir,
Toz jors i porroies séoir,
Ainçois querroit un grant tafur
Qui le v… auroit gros et dur
Dont el feroit tenter sa plaie
En leu d’estopes et de naie.
Mès el ne trove si grant tente,
Puis qu’ele est enz, que je la sente
Ne plus que se ce fust néanz.
La plaie qu’ele a là dedenz
Li fu trop ferue en parfont.
Les plaies que cil archier font
Ont viax à tot le mains deus chiés,
Si n’est pas si granz li meschiez
Que l’en puet véoir et cerchier ;
Mès ci n’ose nus atouchier
Par oingnement ne par poison
Dès que les tentes n’ont foison.[2]
Si metroit-on por noient paine
Qu’el n’iert jamès de cel mal saine :
La mer seroit avant tarie
Qu’ele fust de cest mal garie.
L’en ne porroit sa rage estaindre
Puisqu’en ne puet au fons ataindre,
Et se la plaie n’est ateinte,
Por nient i metroit-l’en tente.
Ice vos di-je sanz relès
Qu’ele n’en garira jamès,
Ainz ardra pardurablement,
Car c’est plaie sanz finement ;
Et une itele vielle seche
Art plus de croistre q’une meche.
Ele a toz jors le c… baé,
En mains de leu a-l’en gaé
Un palefroi à qatre piez,
De qatre soudées d’oint viez
Ne seroient les fronces plaines
Que la vielle a entre les aines.
De jone feme est beax pechiés,
Mès vielle est, corps et cuir sechiés ;
Qui plus la moilleroit ouan,
Tant seroit plus seche encoan.
Hersent n’a mès dent en la gole,
Si a plus mal fet tote sole
Que totes les putains dou mont.
Hersent si poile, Hersent tont,
Hersent escorche, Hersent plume :
Maldite soit tote s’enclume,
Qu’ele a plus cop de c…le éuz
Qu’il n’a foilles en cent séuz
En esté qant les foilles sont.
Ha ! quex devices dont tuit ont !
Onques Renart ne sot nient,
Ne nul barat envers Hersent :
Qui saroit donc se Hersent non
Dès le tens au Roi Pharaon
A-ele mené tel mestier ?
En tot le mont n’a pas son per,
Tant soit de liois ou de coivre,
Por qoi éust autretant cuivre
Ne c’on i éust tant batu
C’on n’éust le fons abatu
Ou qu’il ne fust brisiez encoste.
L’en met en icelui et oste,
Li suens n’est jà que puisse oiseus,
Dès Morenci jusqu’à Puiseus
N’a nul n’i ait sovent bouté,
Meint i ont tret et meint bouté ;
L’en n’i set tant bouter ne trere
Que jà à lendemain i pere.
Tot est perdu qanqu’en i met,
Qar la vielle set trop d’abet.
Por le cuer bieu qant tu aresces,
Fais-tu eschaces jamberesces,
Par le cuer bé c’est la fonteine
Qui toz jors sort, tot jors est pleine ;
A droit a non Hersent la Love,
Que c’est cele qui toz maus cove.
Auques set-ele de barat
Qant ele a pris au cul Renart,
Celui qui tot le mont deçoit,
Tout le siecle le set et voit.
Miex conchié ne sai-je nul
Que celui qui est pris au cul.
Qui cul prent, il est conchiez,
Et qui le rent, il est chiez ;
Et s’il l’estraint et il le tient,
Ne dirai pas que il devient,
Que trop i auroit vilain mot,
Si m’en tendroit le siecle à sot.
Renart, fetes une autre amie
Qui plus sache de cortoisie
Et qui plus soit bele et jonete,
Et qui se sache tenir nete :
Acointiez-vos par un matin
De cortoise fame Belin,
Et assez bele et jone et tendre.
Là se fet-il moult miex entendre,
Ele n’est pas mesaaisie,
Ainz est sage et bien enseignie.
Là doit-l’en aler et venir
Où l’en puet sovent avenir ;
Mès à Hersent la tricheresse,
Cele qui toz mastins aresce,
Une grant vielle au cul peteus
Dont trestuit li mastin roigneus,
Ne nul mastin que trover puisse
Qui ne li ait levé la cuisse,
Et vos l’amez ausi de cuer
Conme s’ele fust vostre suer.
De tant est li jeus mal partiz
Que ele est granz et vos petiz ;
Il estuet monter à degré
S’el ne se couche de son gré.
Par le cuer bé qant tu i viens,
C’est merveille que tu reviens
Du cul ou tout le mont tooille.
Se tout estoies v… et c…,
Et teste et col et braz et piez,
Ne seroit pas bien plains li biez.
C’est le goufre de Saternie
Que qantqui i entre s’i nie.
Je ne t’en dirai ore plus,
Qar ce n’afiert mie à reclus,
Ne à moine ne à provoire
Qu’il die chose se n’est voire.
Renart ot s’amie blasmer,
Laidengier et mesaesmer :
Grant duel en a en son corage.
Ne tint mie l’Escofle à sage
Qui si vilainement parole,
Ainz li est avis qu’il afole,
Si dist souef entre ses denz,
Mar fu laidengie Hersenz,
J’en prendré de vos la venjance
Se je nel’ pert par meschéance.
Fils à putain, Dant Botecus,
En vos a moult mauvez recluz,
Qui mesdites de la plus franche
Qui onc portast guimple ne manche,
Ne laz de soie ne çainture.
Son cors resemble une pointure
Qui soit fete por esgarder :
Je me leroie ançois larder
Que j’en déisse une folie,
Qar sa douçor m’estreint et lie :
Vos en par avez dit trop mal.
Se trestuit li Rendu dou val
Estoient ore toz des voz,
Si en seriez-vos provoz :
Je vos feré damage avoir
De vostre cors, non d’autre avoir.
Dahez ait qui el en fera
Ne qui autre gaige en prendra
Se le cors non de maintenant
Qui a parlé si folement,
Je vos feré en mon Dieu croire.
S’onques nus menja son provoire,
Je vos mengeré hui cest jor,
Jà n’en aurez autre retor.
Je m’en teré ore à itant,
Car je dout moult chose volant,
S’il savoit ore que je pens,
Por proiere ne por desfens
Ne leroit qu’il ne s’en volast,
Ne l’en chaudroit qui qu’en pesast.
Renart se taist et cil parole
Qui ert venuz à male escole,
Et qui Déable si porchace
Et son grant anui li portrace,
Si dist avant mal est bailliz,
Jà ne sera espenéiz,
Di, va avant se tu sez rien
Que tu soies confès moult bien.
Sire, j’ai esté moult pervers,
Mainte chose ai fete à envers,
Je n’oi onc talent de bien fere ;
Moult ai esté de pute afere
Plus que li Abés de Corbie
Dont toute l’Ordre est enordie.
Hunant li roux ne Tabarie
Qui tuit vivent de roberie,
Ne Qoquins ne Hernauz li roux
Qui vet contant des roges troux,
Ne Herbert cil qui a les bordes
Qui en fet ausi conme cordes,
Ne messire Adan pet de Lieviere
Qui fet nape de sa chiviere ;
Ne Mauduis li clers d’Atevile
Qui moult cuide savoir de gile ;
Ne Godemans, ne Marche-terres
Qui se fet or moult bon borderes,
Ne Dant Pierres li roux Pautras
Qui tant sovent joue ses dras ;
Ne Richarz li cras, ne Tempeste
Ne tuit cil qui sont de la jeste
N’ont pas touz autrement lechié
Conme je ai tout seus pechié.
J’ai croissu la fille et la mere
Et toz les enfanz et le pere,
Et après tote la mesnie,
Si puissé-je boire demie
Ne de more ne de vin cuit.
Il m’est avenu mainte nuit
Que je croissoie quinze foiz,
Mès j’estoie toz jors aroiz.
Je sui de moult chaude nature,
Qant je truis c… à ma mesure,
Je crois bien vingt foiz près à près,
Et noef fiées tout adès.
Jà n’iert si hideuse la beste,
Neis s’el n’avoit oil en la teste,
Jà nus ne m’en porroit tenser.
J’ai fet que nus n’ose penser,
Que j’ai mengié un mien faon,
Qar fussé-je ore à Monleon
Penduz par ma pute de gorge !
Li Huart crient qu’il ne l’engorge,
Ariers se trait, si le regarde :
Renart, fet-il, li maufez t’arde,
Que por toi tout le cuer me tremble
Aussi conme foille de tremble,
Et si ne sai que ce puet estre.
Par foi, fet Renart, biaus dous mestre,
De ce vos dirai-je la some.
Il est costume à maint preudome,
Qant il ot parler lechéor,
Pecheresse ne pechéor,
Qu’il a péor et si s’esmoie
Qu’il ne retort à male voie
Qui à male vie le maint.
Oez conme li glouz l’ataint
Et con il le trait à parole :
Maudite soit la seue escole,
Qui onques ne se prist à beste
Que il ne li féist moleste ;
Si li fera, ce cuit, moult grant
Que il le het moult durement.
As denz se prent parmi la coe,
Bien le puet fere, qu’ele est soe,
Tot en esrache et poil et cuir :
Ha ! laz, fet Renart, je me muir.
Il est tornez à ventreillons,
Et chaï est en pamoisons.
Passion praingne ceste beste,
Moult li pent ceste chauve teste,
Je li alasse jà aidier,
Mès je crien moult de lui blecier.
Par noz Ordres je ne puis croire
C’onques Renart à son Provoire
Osast fere nul mauvès plet,
Qar trop a-il aillors meffet.
Or a tant fet qu’il est au chief :
Je l’irai redrecier le chief,
Jà ne seré ore si chiens,
Totes voies vaincra li biens.
Li Huans avoit moult grant bec,
Par l’oreille le prent au bec,
Si li leva amont la teste.
Moult fist Renart que pute beste,
Qu’il jeta les denz, sel’ hapa,
Et Hubert tire, s’eschapa :
Seigniez s’est plus de qatre foiz
Du pié o toz les qatre doiz ;
Seigniez soie, fait li huas,
De fiat voluntas tua,
Et debitoribus noster,
Credo et in Deum pater.
En cui se fiera l’en mès
Qant cil qui se fesoit confés
Voloit son Provoire mengier !
Ainz par l’anesse Berengier
N’oï mès si très grant merveille,
Qar fust-il ore en une seille
De poiz boillant ou de plonc chaut !
Dahez ait ore qui en chaut
Quel part voist ne quel part il viengne,
La male honte li aviengne !
Tel péor m’a-il ore fete,
Cele longaingne, cele sete,
Une longaingne, une privesse
Fous est qui de lui s’aprivesse.
Un traïtor qui por un oef
Traïroit uit homes ou nuef ;
C’est uns lerres, uns losengiers
Qui en la bene au charetiers
Se fist jeter con beste morte :
La male passion le torte !
Or di ayant, mar es bailliz,
Ne seras mès espenéiz.
Volentiers, sire, dist Renart,
J’estoie ouan en un essart,
Si trovai qatre Huaniax
Bien enpenés et genz et beax,
Delez un grant saus les trovai,
Je m’en repent, je les menjai,
Qui erent filz Hubert l’Escofle,
Un moult religieus hermofle
Qui par cest païs quiert les pès,
Et tuit se font à lui confès
Li malade et li pechéor
Qui de lor pechiez ont péor.
Sire, si les menjai toz qatre,
Dès lors me déust-l’en bien batre,
Mès certes ore m’en repent,
Si en vien à amendement.
Li Huans lieve les sorciz
Qant il ot parler de ses filz ;
Seigniez soie, dist li Huans,
Et de corbeilles et de vans
Et de paniers et de banastres,
Lechierres, por quoi les menjastes ?
Il erent mien li Huanel,
Grant duel m’avez mis el cervel :
Les avoie bien un mois quis
Par la terre et par le païs,
Et vos les aviez mengiez,
Cuvert, traïtres, renoiez !
Il erent tuit qatre mi fil.
Jà n’issiez-vos de cest cortil,
Mauvès lerres, mal veziez,
Tant que vos i soiez noiez !
Qant Renart s’oï si mesdire,
Sachiez qu’il n’a talent de rire,
Ainz se porpense qu’il fera
Et conment il se chevira.
Sire, fet-il, por Dieu merci,
Ne me laidengiez ore si ;
N’est pas costume à confessor
Qu’il ledenge le pechéor
Qant il se fait à lui confès ;
Mès por Dieu traiez-vos plus près
Et si escoutez mes pechiez
Et penitance m’enjoingniez,
Qar se Dame Diex me doint joie,
Ne savoie que je faisoie.
Par foi, dist Hubert, bien t’en croi,
Jel’ te pardoing en bone foi :
Certes se la force estoit moie,
En cele eve te noieroie.
Sire, dist Renart li Gorpilz,
Se je vos ai mengié voz filz,
A vos en vieng à repentance,
Si en fesomes l’acordance ;
Por vos enfanz que je menjai
Vostre home lige devendrai,
Si nos entrebesons en foi.
Volentiers, dist Hubert, par foi.
Li Huans tret à lui reçoivre,
Et Renart tent à lui deçoivre :
Li Huans le bec li estent
Et Renart le Gorpil le prent,
Si l’ot ençois tot devoré
Que il éust son pié torné.
Ha ! las, ci a mal pechéor
Qui menjue son confessor.