Le Roman du Renart - D. M. Méon — 1826/23
Si conme Renart fu Jugléeur.
Or vos dirai de l’autre part
La contenance de Renart
Qui Ysengrin engingnié a
Par son anglois que il parla,
Et s’en ala par le boscage
Qant Ysengrin laissa en gage.
Moult s’esbaudist, moult se conforte
Por la viele qu’il enporte ;
Va s’en à tote la viele,
D’Ysengrin n’oï puis novele.
Tant fist Renart denz quinze dis
Fu bien de la viele apris ;
Sages en fu et escolez,
Onc ne fu tex barat trovez.
Einsi s’en va par la contrée
Tant qu’il a sa fame trovée ;
O lui menoit un jovencel
Que prendre voloit de novel :
Cosin Grinbert le Tesson fu.
Qant il le vit s’est arestu,
Sachiez bien les a connéus
Tantost con il les a véus.
Jà éust Poncet esposée
S’el éust jogléur trovée ;
Mès ele pas tort n’en avoit,
Tuit disoient que mors estoit.
Tybert lor dist, se Dex le saut,
Que Renart vit lever en haut
As forches, et si le vit pendre.
Ce lor a fet Tybert entendre
A une forches granz et hautes,
Trers le dos liées les pates :
Il resenblot trop bien Renart,
Ge le vi pendre à une hart.
La dame respondi briément,
Je ne vos en mescroi noient,
Qar je sai qu’il avoit tant fet
Vers son seignor de mavès plet,
Se nul baron le poïst prendre,
Que meintenant le féist pendre.
N’i ot plus tenu parlement,
Beisier se vont estroitement :
Qant se furent entrebesié
Moult en furent joiant et lié.
Renart ne se pot plus tenir,
Ainz a geté un grant soupir :
A Poncet dist entre ses denz,
Tu en seras encor dolenz.
Grant tens avoit que cil l’amoit,
Mès Dant Renart mot n’en savoit ;
Amé s’estoient moult lonc tens,
Renart le saura tot à tens.
Autreteil font, ce m’est avis,
Tex dames a en cest païs.
La dame son novel segnor
Bese et acole par amor.
Renart voient vers els venir
Et la viele au col tenir ;
Moult furent lié, pas nel’ connurent,
Salué l’ont si con il durent.
Qui estes-vos, font-il, bel frere ?
Sire, ge fot un bon juglere ;
Et saver moi moult bon chançon
Que je fot pris à Besançon ;
Encor moult de bon lai saurai,
Nul plus cortois jogler arai.
Ge fot moult bon jogler à toz,
Bien sai dire et chanter bons moz ;
Par mon segnor Seint Nicholas
Moi semble bien que tu l’amas,
Et li moi semble toi amer,
Et où voler tu si aler ?
Lors dist Poncet, au Deu plesir
Nos alomes la messe oïr ;
Tuit alomes vers le mostier,
Ceste Dame voil noçoier,
Ses sires est mors novelment ;
Mès li Rois le haoit forment.
Meinte foiz l’a pris à forfet,
Or a de lui son plesir fet.
Renart ot non li engigneres,
Fel fu et traïtres boisieres,
Meinte traïson avoit fete,
En haut en a sa gole trete.
Troi fil en sont remès moult bel
Qui sont moult cointe damoisel :
Lor pere quident bien vengier
Einz que l’en doie vendengier ;
Méu se sont por querre aïe
A ma dame Once la haïe.
Tot li secles est en sa meïn,
Et tuit li mont et bois et plein.
Il n’en a beste jusq’as pors,
Tant soit hardie ne si fors,
Ors ne Lion ne autre beste
Qui vers lui ost torner la teste.
Por soudées i vont li frere,
Qanque il ont lessent lor mere
Qui moult par est cortoise dame.
Ge la prendrai par tens à fame,
Einsi est la chose atornée,
Q’ainz demein vint l’aurai jurée.
Renart respont entre ses denz,
Tu en seras encor dolenz,
Encor en charras en tel briche
Nel’ vodroies por une fliche.
Certes, sire, ce dist Poinciax,
Qui moult fu avenant et biax,
Se vos as noces volez estre,
Dont ne nos faut mès que le prestre,
Ge vos donrai del nostre asez
Qant cist aferes iert pasez.
Fotre merci, dist-il, bel sir,
Moi saura fere ton plesir,
Moi saver bon chançon d’Ogier,
Et de Rolant et d’Olivier,
Et de Charlon le ber chanu,
Dont vos est-il bien avenu.
Entre ses denz dist li maufez,
Et vos estes mal asenez.
Atant se metent à la voie,
Renart viéle et fet grant joie,
Tant qu’il vindrent à la tesniere
Qui moult estoit large et pleniere.
Qant Renart vit adesertir
Son castel gaste et enhermir,
Il n’en velt fere autre senblant.
Jà soit ce qu’il s’en voit joant,
En son cuer pense, se il vit,
Tex en plorra qui or en rit.
Par le païs et par la terre
Envoia cil ses amis querre :
Tant véissiez bestes venir
N’en pouissiez conte tenir.
De moult loing s’i asemblent tuit,
Par la vile meinent grant bruit.
Dame Hersent i est venue,
Ysengrin est remès en mue ;
Novelement laissié l’avoit
Por ce que maengniez estoit,
Et jure Seinte Pentecoste
Gà ne girra mès à sa coste.
Q’a-l’en afere d’ome en chanbres
Puis que il n’a trestoz ses membres ?
Mès voist aillors, si se porchast,
Droiz est que toz li mons le chast :
Por ce s’en est de lui tornée.
As noces vint bien atornée,
Et des autres i ot grant flote,
Et Renart lor chante une note.
A grant joie les noces firent,
Tybert li Chaz et Brun servirent ;
Totes sont pleines les cuisines
De jars, de cos et de gelines :
D’autres vitailles i avoit
Selonc ce que chascun voloit,
Et li jugleres lor chantoit,
A chascun d’els forment plesoit.
Onc n’oï nul si grant jenglois
Con Renart meine en son englois.
Après mengier savez que firent,
Hastivement se departirent,
Qu’il n’i remest ne bons ne maux
Fors eulz, ne chevelox ne caux ;
Chascun s’en va à son repere,
Renart remest son mestier fere.
Dame Hersent s’en est entrée
Dedenz la chambre o l’esposée,
Et à Poncet a fet son lit
Où quide fere son delit.
A une liue d’iloc ot,
Si que Renart moult bien le sot,
Une tombe d’une martire
Dont vos m’avez bien oï dire,
De Coupée qui là gisoit :
Tretoz li mondes le disoit
Qu’ele fesoit apertement
Vertuz à toz conmunalment.
Nus hons n’i vient, tant soit enfers,
Ou soit moignes, ou lais ou clers,
De tot le mal que il éust
Que meintenant gariz ne fust.
Renart i fu, si ot véuz
Le jor devant deus las tenduz
Et un broion en terre encloz,
Bien le ferma à quatre cloz
Q’à un vilein avoit emblé.
Iloc l’ot repost et enté,
Bien sot qu’il en aroit afere,
Qar il savoit de maint afere.
Qant Poncet dut aler gesir,
L’espouse fet à lui venir,
Si li a dit en son langage :
Sire Poincet, fet-tu que sage,
Se tu créez que je dira,
Merveille fu qui te vendra,
Et bien saver que je voil dir.
Lasus giser un Seint martir,
Por lui faser Diex tant vertuz,
Se tu voler aler piez nuz
Et port un candoil en ton mein,
Et tu veillier anuit à mein,
Et tu mis ton candoil lumer,
Tu fus demein un fis gendrer.
Ce dist Poincet, moult volentiers.
Atant se metent es sentiers ;
En sa main porte une candoille
Qui si art cler con une estoille.
Desoz un pin en un moncel
Iloc troverent le tombel.
Renart s’estut, cil vet avant,
Basse bosez, Dex t’en avant :
Cil vet avant, si se redote,
Renart toujors avant le bote ;
Tant fort l’enpeint qu’il chiet es laz
Parmi le col et l’un des braz.
Il est chéuz enz el broion
Qui chevilliez fu el roion.
Il tire fort et le bras froisse,
Li laz li refet grant angoisse :
Forment s’esforce, forment tire,
Reclaime Deu et la martire
Que il li soit verai aidanz,
Que ci n’a nus de ses parenz.
Tire et retire, ne li vaut,
Et Renart le rampone en haut.
Bosez, vos fot asez oré,
Et tu seras ci trop moré :
Moult ama vos icil martir
Que ne laisse toi li partir.
Tu voler devenir, ce quit,
Moine ou reclus en cest abit,
Ou tu venir, ou moi ira,
Ou fot me bien je li dira
Que vos velt Ermit devenir,
Et la martir fot vos tenir.
Ce fot forment à merveillier
Que tu voler tot nuit veillier,
Et vos futes novel bosez,
Et ton moillier fot vos tendez
Et fot jà mienuit ocure.
Atant es-vos grant aléure
Quatre gaignon et un vilain,
Uns anemis frere Gillain :
Le boscage ont moult bien apris,
Poincet ont trové entrepris ;
Tant l’ont tiré et desachié
Que tot l’ont mort et esqachiez.
Renart le vit, moult s’en esmaie,
Fuiant s’en va par une haie ;
Les grans galoz s’en va arere,
Si se refiche en sa tesnere.
Sa feme trove asovinée
Qui atendoit sa destinée :
Moult li poise de la demeure,
Que jà ne quide véoir l’eure,
Qant voit venir le jugléor
Tot sol, lors si ot grant péor.
Qant Renart l’a seule trovée,
Or sus, fet-il, pute provée,
Or sus, si tenez vostre voie,
Gardez que jamès ne vos voie.
Moult par est mavès vostre efforz,
Je ne sui mie encore morz,
Ainz sui Renart, ce m’est avis,
Sains et haitiez et trestoz vis :
Moult avez tost le duel béu
Que vos avez de moi éu.
Or sus, fet-il, levez de cï,
S’alez véoir vostre mari,
S’orrez conment il se contient,
Que la martire le detient.
Qant la dame ot ceste parole,
A poi que de duel ne s’afole :
Lasse ! fet-ele entre ses denz,
Este mesire ça dedenz ;
Et Dant Renart prent un baston,
Si li paia sa livroison,
Et fiert et hurte et roille et bat
Tant qu’el crie, merci, Renart ;
Sire, por Deu merci te quier,
Lesse moi vive repairier.
Or sus, fet-il, que par mes denz
Mar enterrez jamès çaienz :
Jà ne gerrez mès lez ma coste
Qant recéu avez tel oste,
Ainz vos trancheré ces balevres,
Et cel grant nés à tot ces levres,
Si vos effonderé cel ventre,
Et la boéle qu’est soentre
Vos saudra fors par le poistron
Malgré vostre novel baron.
Et vos, fet-il, dame Hersent,
Asez fet mal qui le consent :
Pute orde vielle, dont vos vient ?
Bien escorche qui le pié tient.
Hai ! fet-il, quex deus barnesses !
C’estoient ore belles messes
Que féissiez por moi chanter,
De vos poistrons fere roillier ;
Ce sache Dex et Seint Martins,
Or est venue vostre fins.
Qant les deus dames ce oïrent,
Sachiez que pas ne s’esjoïrent ;
Bien sorent qu’engigniées furent
Qant au parler le reconnurent :
Moult grant merveille lor est prise,
En grant péor chascune a mise,
Qar bien cuident estre enchantées,
Forment en sont espoentées.
De péor l’une et l’autre tremble,
Moult s’esmaient andui ensemble.
Renart ambedeus les a prises,
Fors de la meson les a mises :
Onc ne lor lut parole dire,
Ne l’une ne l’autre escondïre ;
Et l’une et l’autre se demente,
Chascune forment se tormente.
Dame Hersent por son seignor
Qui a perdue la color,
Et la barbe li est chéue
Por la c..... qu’il a perdue.
Dame Hermeline li raconte
Q’avenue li est grant honte
De Poncet à la crine bloie
Dont a éu si corte joie.
Qui caut, ce dist Dame Hersent ?
Moult par ert povres nostre sens
Se nos ne retrovons maris,
Dont sera tot li mons faillis
D’uns et d’autres et bons et biax ;
Si troverons deus jovenciax
Qui bien feront nos volentez,
De folie vos dementez.
Vos distes voir, ce dist la dame,
Mès moult est let de vielle fame
Qui ne crient honte et deshonor,
De honir soi et son seignor :
Ensorquetot l’en me disoit
Que mes mariz penduz estoit ;
Se j’avoie autre mari pris,
Avoie-je de riens mespris ?
J’ai bien ceste chose essaiée,
Feme mesprent à la foiée.
Vos dites voir, ce dist Hersent,
Mès cest mesprendres n’est pas gent ;
Mespris avez en tel maniere
Qu’en vos en tient à chamberiere
Qui conmunaus est as garçons,
Trestuit li entrent es arçons ;
Mès je ne fis einc lecherie,
Ce set-on bien, ne puterie
Fors une foiz par mesprison
Vers Dant Renart vostre baron.
Qant mes loveax ot conpissiez,
Mesaasmez et ledengiez,
Gel’ fis chaoir en sa tesniere
Et il fist le jeu par deriere.
Dame Hermeline ot la parole
Et respondi con fame fole ;
Jalouse fu et enflamée
Qant ses sires l’avoit amée,
Et dist, ne fu-ce puterie ?
Vos féistes grant lecherie,
Grant deshonor et grant hontage
Féistes-vos et grant putage,
Qant vos soffristes mon baron
A batre vos cel ort crepon :
Pute vielle, pute remese !
En vos déust ardoir en brese,
Si que la poudre en fust ventée,
Qant à moi vos estes vantée
De mon seignor qu’il vos a fet.
Haï ! con avez or forfet
Qu’en vos tondist cel peliçon
Et féist lit de vif charbon,
Qant aviez vostre seignor
Èt féistes tel deshonor ;
Et il sa fame d’autre part,
Or sont tuit nostre enfant bastart.
Tost vos en fu Il dels passez
Qant vos les avez avoutrez ;
Et Ysengrin vostre seignor
Avez fete tel deshonor
Que jamès ne sera amez,
Mès toz jors mès ert cox clamez.
Moult li dist et moult se coroce,
Sachiez moult forment se degroce.
Hersent respondi en riant,
Moult a en vos pute fruiant
Qant vostre seignor aviez
Et autre mari perniez :
Moult par est mavès et escars
Qant il ne vos a le cul ars ;
Moult par estes de mavès estre,
De poior ne poiez-vos estre,
Qar plus estes pute que moche
Qui en esté la gent entoche.
Qui que viegne ne qui que aut,
Vostre taverne ne li faut :
Meint en tornez à vostre part
Se par ce sont mi fil bastart,
Foi que je doi Seinte Marie
Por ce nes giterai-ge mie :
Qui les voudroit trestoz giter
Les batars et desheriter,
Asez aroit plus de puissance
Que n’ont onques li Rois de France.
Mès vos qui estes bordeliere
Les avoutrez conme murdriere
Les voz enfanz, ce set l’en bien,
Onc nel’ véastes à nul chien.
Vos i mentez, pute sorciere,
Tesiez-vos que je ne vos fiere.
Vos me ferrez, pute merdouse,
Pute puant, pute teignouse !
Se l’aviez pensé à certes
Jà n’i auroit paumes overtes
Et piax trenciées et rompues,
Se ne me faillent denz agues.
Hermeline plus ne demeure,
Isnelement li corut seure,
Et Hersent par moult grant aïr
Revet Hermeline sesir.
Par terre se voltrent et hercent
Si durement que les piax percent,
As denz agues se detrenchent,
Lor maltalent forment i venchent,
Rompent et sachent et descirent,
As denz s’ocient et empirent :
Si véissiez en moult poi d’eure
L’une desoz, l’autre deseure.
Dame Hersent fu grant et fort,
Soz lui la tient par grant esfort ;
Encontre un fust l’a enanglée,
Jà l’éust morte et estranglée.
Atant es-vos un pelerin
Qui vint clochant tot le chemin,
Trova les dames conbatant :
Une en a prise meintenant,
Par la mein l’a levée sus,
Or sus, fet-il, n’en fetes plus.
Et qant departies les a,
Moult doucement les chastia,
Demanda lor dont eles sont,
Dont eles vienent et où vont.
Celes li ont conté lor estre,
Qar il estoit sains homs et prestre,
Et il lor done bon conseil
Que chascune aut à sa pareil :
Merci li crit et li requiere
Qu’il l’aint et qu’il la tiegne chiere.
Dame Hersent a fet aler
A Ysengrin por acorder ;
Dame Hermeline ameine ariere
A Dant Renart en sa tesniere.
Tant est sains et religieus
Q’acordées les a andeus,
Et tant i a s’entente mise
Que par tot a la pès asise.
Puis fu Renart en sa meson
O sa moillier moult grant seson :
Trestot li dist et tot li conte
Conment il dut recevoir honte
Qant en la cuve fu sailliz,
Con il dut estre malbailliz,
Et escharni li teinturier,
Dist qu’il estoit de son mestier ;
Conment il fist la c..... perdre
A Ysengrin qui ne pot s’erdre.
Trestot li conte et tot li dit :
Cele ne fet mès que s’en rit.
Moult lonc tens fu Renart en mue
Ne va, ne vient, ne se remue.
Ci faut Renart li Teinturiers
Qui tant sot de mavès mestiers,
Et la tençon de Hermeline
Et de Hersent qu’est sa voisine.