Le Roman du Renart - D. M. Méon — 1826/21
Si coume Renart conchia Brun li Ours du miel.
Perroz qui son engin et s’art
Mist en vers fere de Renart
Et d’Ysengrin son chier conpere,
Lessa le miez de sa matere :
Quant il entr’oblia les plez
Et le jugement qui fu fez
En la Cort Noble le Lion
De la grant fornication
Que Renart fist qui toz max cove,
Envers Dame Hersent la Love.
Ce dist l’estoire es premiers vers
Que jà estoit passez yvers
Et l’aube-espine florisoit,
Et que la rose espanisoit
Et près fu de l’Acension,
Que sire Noble le Lyon
Toutes les bestes fist venir
En son palès por Cort tenir.
Onques n’i ot beste tant ose
Qui se tardast por nule chose
Qu’ele n’i viengne hastivement,
Fors Dans Renart tant solement,
Le mal laron, le sodoiant
Que tuit li autre vont huiant,
Et encusant devant le Roi
Par son engin[1], par son desroi.
Et Ysengrin qui pas nel’ aime,
Devant toz les autres se claime
Et dist au Roi : biax très doz sire,
Car me fai droit de l’avoutire
Que Renart fist à m’espousée
Dame Hersent qu’ot enserrée
A Malpertuis son fort repere
Quant il aforce li vost faire.
Aforce li fist-il li rous,
Dolenz en sui et coroçous,
Et conpissa toz mes Loviax,
Icist gieux ne fu mie biax.
Renart prist jor de l’escondire
Qu’il n’avoit pas fait l’avoutire.
Quant li Saint furent apporté,
Ne sai qui li ot enorté,
Il se retraist mout tost ariere,
Si se feri en sa taisnière.
Quant l’Emperere oï le Leu,
Si li respondi come preu,
Ysengrin lessiez ce ester,
Vos n’i porriez riens conquester
A ramentevoir vostre honte :
Musart sont li Roi et li Conte,
Et cil qui tiennent les granz Cors
Deviennent cop, hui est li jors.
Onques de si petit domage
Ne vi-ge fere si grant rage ;
Tele est cele ovre à escient
Que li parlers n’i vaut noient.
Dist Bruns li Ors, biau très doz sire,
Jà porriez assez miex dire.
Ysengrin n’est ne morz ne pris,
Se Renart a vers lui mespris,
Que bien n’en puisse avoir vanjance,
Ysengrin a bien tel puissance,
Se Renart près de lui manoit
Et por la pès ne remanoit
Qui novelement est jurée,
Que jà vers lui éust durée ;
Mais vos estes Prince de terre,
Si metez pais en ceste guerre,
Metez pais entre vos barons,
Cui vos harez nos le harrons,
Et maintendron de vostre part.
S’Isengrins se plaint de Renart,
Faites le jugement séoir,
C’est le miez que puisse véoir :
Se l’uns doit à l’autre, si rende,
Et dou meffet vos pait l’amende.
Mandez Renart à Malpertuis,
Jel’ amenré se je le truis,
Puis l’aprendron à cortoier
Se vos m’i volez envoier.
Sire Bruns, dit Bruianz li Tors,
Mal-dahez ait sanz vostre cors
Qui jà conseillera le Roi
Qu’il praingne amende du desroi,
De la honte et del avoutere
Que Renart fist à sa conmere.
Renart a fait tante moleste,
Et conchiée tante beste,
Que jà nus ne li doit aidier.
Conment Ysengrin doit plaidier
De chose qui si est aperte
Et cognèue et descoverte,
De moi sai-je que que nus die,
Se cil qui tot le mont conchie,
Renart icil mauvès lechierres,
Cil rous puanz, cil orz trichierres,
Eust ma fame en sa baillie,
Contre son gré l’éust saisie,
Jà Malpertuis nel’ garantist,
Ne forteresce qu’il féist,
Que je ne l’éusse escoillié
Et puis en un conpeis jeté.
Hersent, dont vos vint en corage,
Certes ce fu moult grant folage
Quant Dant Renart cil fox garçons
Vos entra onques es arçons.
Sire Bruiant, dist li Tesson,
Cist max, se nos ne l’abesson,
Porra encore assez monter,
Qu’à tens porra le mal conter
Et bien espandre et essaucier
Qui nel’ porra pas abessier,
Et puis qu’il n’i ot force fete,
Ne huis brisié ne trive frete,
Se Renart le fist par amors,
N’i afiert ire ne clamors ;
Pieça que il l’avoit amée
Jà cele ne s’en fust clamée,
Se fait l’éust ; mès par mon chief
Ysengrin l’a trop pris en grief
Voiant le Roi et son bernage.
Gart Ysengrin à son domage,
Se li vessiax est empiriez
Et par Renart mal atiriez
Le vaillant d’une nois de codre,
Près sui que je li face soldre.
Puis que Renart sera venuz
Le jugement en ert tenuz,
Mès c’est del miex que je i sent,
Le blasme soit Dame Hersent.
Hai ! quel clamor et quel plet
Vos a hui vostres mari fet
A tantes bestes regarder !
Certes on vos déust larder,
S’il vos apele bele suer,
Se jamès li portez bon cuer,
Il ne vos crient ne ne resoigne.
Hersent rogist, si ot vergoigne,
Que tot le poil li va suant :
Lors respondi en soupirant,
Sire Grinbert, je n’en puis mès,
J’amasse miex assez la pès
Entre mon seignor et Renart,
Voir qui en moi n’ot onques part
En tel maniere n’en tel guise,
Si que j’en feroie un juise
Ou de froide eve ou de fer chaut.
Mès mon escondire que vaut,
Lasse, chaitive, malostrue,
Quant je jà n’en seré créue ?
Par toz les Sainz que l’en aeure
Et se Dame-Diex me seceure,
Onques Renart de moi ne fist
Que de sa mere ne féist.
Por Dant Renart ne di-ge mie
Ne por amender sa partie,
Q’autretant m’est que de lui face,
Qui que l’aint ne qui que le hace,
Con il m’est d’un chardon asnin,
Mès je le di por Ysengrin
Qui de moi est si très jalox
Que tot jors s’en cuide estre cox.
Foi que je doi Pincart mon fil,
Ouen le premier jor d’avril
Que pasques fu, si con on dist,
Ot dix anz qu’Isengrin me prist :
Nos noces furent si plenieres
Que nos fossez et nos lovieres
Furent de bestes issi plaines,
Voire certes que à grant paines
Péussent tant voie trover
Où une oie péust cover.
Là deving-ge loiale espose,
Ne m’en tenez pas à mentose,
N’à soingnant ne à beste fole,
Or revendré à ma parole.
Qui me velt croire si me croie,
Et si voil bien que chascun m’oie :
Onc, foi que doi Sainte Marie,
Ne fis de mon cors puterie
Ne meffet ne malvez afere
C’une none ne poïst fere.
Quant Hersent ot sa reson dite
Et ele se fu escondite,
Fromont[2] li Asnes qui l’oï,
Dedenz son cuer moult s’esjoï,
Qar or cuide tot à estros
Que Ysengrin ne fust pas cos ;
Hai ! fist-il, gentil barnesse,
Car fust or si loiax m’asnesse,
Et Chien et Leu et autres bestes,
Et totes fames con vos estes !
Qant vos en avez tant juré
Tout m’en avez aséuré.
Jamès ne vos en mesquerrai
Tel sairement vos en ferai :
Qar si me face Diex pardon,
Et il me doint trover chardon
Qui soit tendres en la pasture,
Que vos n’éustes onques cure
De Renart ne de son deduit,
Ne de s’amor, si con je cuit.
Mès li siecles est si mavès,
Si mesdisant et si pugnès,
Qu’il tesmoingne ce qu’il ne voit
Et blasme ce que loer doit.
Haï ! Renart li forsenez,
De male hore fussiez-vos nez
Et engendrez et concéuz,
Qant vos jà ne serez créuz !
Or ert la novele espandue
Que Hersent aviez croissue,
Ele en velt ci fere joïse
C’onques par li ne fu requise.
Hersent l’oï, mais ne dist rien,
De respondre se garda bien,
Ainçois se taist, si ne dist plus.
Vos savez bien tuit corre sus
Celui qui ne se puet rescorre,
Tuit li autre li corent seure.
Grimbert li Taissons se leva,
Se il puet Renart aidera,
Que ses cousins germains estoit :
Devant le Roi venuz est droit,
Son chapel oste, si s’escout,
Seignor, fait-il, taissiez-vos tout.
Ha ! gentil sire debonere,
Car metez pès en cest afere,
Et s’aiez de Renart merci,
Lessiez le moi amener ci,
Et çà venir à sauveté
De qanqu’Isengrin l’a reté :
Tele amendise li fera
Con vostre Cort esgardera ;
Et se il l’a fait en despit,
Le hardement et le despit
Que il n’est pas venu à Cort
Amendera ains qu’il s’en tort.
Li Connins est sailliz avant,
Et dit au Roi, par Saint Amant,
Messires Thimers[3] dit raison,
L’amende desor nos prendron.
Se sire Renart le Gorpil
En estoit chacié en essil
Por Ysengrin ne por Hersent,
Ce n’iert pas bien, mien escient.
Faites Renart à Cort mander
Et s’Ysengrin li set que demander
Je cuit que bien s’escusera
De qanque li demandera,
Se il a à Hersent mesfait
Ne en parole ne en fait ;
Se Renart par force à li jut
Je ne cuit pas qu’il s’en parjurt,
Car moult par est prodons Renart.
Entre moi et frere Bernart
L’Arceprestre que véez ci
Le plevirons vostre merci,
Si vos plaist, si en ferons pais.
Or parlerez car je me tais.
Sire, ce respont la Corneille[4]
Onques ne vos aït Saint Gile,
S’il vos plest et vos conmandez,
Se jà Renart i est mandez
Hui ne demain, se il n’i vient,
Après demain se il s’en tient,
Fetes le à force amener,
Et puis tel livroison doner
Dont il en après se recort.
Ce dist Nobles, vos avez tort
Qant Renart volez forsjugier :
Tel oz poez-vos bien rungier
S’aucun de vos me mene orgueil,
Ce méismes li pent à l’ueil.
Renart ne hé-ge mie tant
Por riens qu’en li voist sus metant,
Que je le voille encor honir
S’il se velt à moi obéir.[5]
Ysengrin, prenez cel joïse
Que vostre fame vos devise,
Se vos lascher ne l’en volez,
Jel’ enprendrai. Ha ! sire, estez,
Se Hersent porsuit le joïse,
Et ele soit arse et esprise,
Tex le saura qui or nel’ set,
Liés en sera qui or me het ;
Lors diront-il tot à estrox,
Vez ci le cox et le jalox :
Miex me vaut-il, selonc le plet
Soffrir la honte qu’el m’a fet
Tant que je m’en puisse vengier ;
Mès ainz c’on doie vendengier
Cuit-je Renart movoir tel gerre
Jà nel’ garra ne clef ne serre,
Ne mur ne fossé deffensable.
Or dist Dant Nobles, au déable
Por le cuer bieu, sire Ysengrin,
Prendra jà vostre gerre fin.
Cuidiez i vos rien gaaingnier,
Renart mater ne engingnier ?
Foi que je doi Saint Lienart,
Je connois tant les arz Renart,
Plus tost vos puet-il fere anui,
Honte et damage que vos lui.
D’autre part est la pès jurée
Dont la terre est asseurée ;
Qui l’enfraindra, s’il est tenuz,
Moult mal li sera avenuz.
Qant Ysengrin oï le Roi
Qui de la pès prenoit conroi,
Moult fu dolenz, n’en sot que fere,
Ne s’en set mès à quel chief trere :
A la terre entre deus eschames
S’asiet sa qeue entre ses james.
Or est Renart bien avenu,
Se Diex li éust porvéu
Q’en tel point avoit pris li Rois
L’acorde maugré as irois
Que jà préist la gerre fin
Entre Renart et Ysengrin,
Se ne fust Chantecler et Pinte
Qui à la Cort venoit soi qinte
Devant le Roi de Renart plaindre.
Or est li feus griés à estaindre,
Qar sire Chantecler li Cos
Et Pinte qui pont les oés gros,
Et noire et blanche et la rossete
Amenoient une charrete
Qui enclose ert d’une cortine.
Dedenz gisoit une geline
Que l’en amenoit en litiere
Fete autresi con une biere.
Renart l’avoit si mal menée
Et as denz si desordenée
Que la cuisse li avoit frete,
L’ame del cors li avoit trete.[6]
Qant li Rois ot jugié assez,
Qui de plaidier estoit lassez,
Et les Gelines maintenant
Et Chantecler paumes batant,
Pinte s’escrie premeraine
Et les autres à une alaine :
Por Dieu, font-eles, gentix bestes
Et chiens et leus si con vos estes,
Qar conseilliez ceste chaitive,
Moult hé l’eure que je fui vive.
Mort, qar me pren, si me delivre,
Qar Renart ne me lesse vivre :
Cinc freres oi jà de mon pere,
Toz les menja Renart li lerre ;
Ce fu grant perte et grant dolors.
De ma mere oi quatre serors
Que virges poules, que meschines,
Moult i avoit beles gelines :
Gonbert de Fresne[7] les paissoit,
Qui de pondre les enpressoit ;
Le las ! mar les i engressa,
C’onques Renart ne l’en lessa
De totes quatre qu’une soule,
Totes passerent par sa goule.
Et vos qui ci gisez embiere,
Ma douce suer, m’amie chiere,
Con vos estiez tendre et grasse !
Que fera or vostre suer lasse
Qui à grant dolor vos regarde ?
Renart, la male flambe t’arde ?
Tantes foiz nos avez folées
Et chaciées et tribulées ;
Et descirées nos pelices,
Et enbatues jusq’as lices :
Et hier main devant ma porte
Me jeta-il ma seror morte,
Puis s’enfoï parmi un val ;
Gonbert n’ot pas isnel cheval,
Ne ne te pot à pié ataindre.
Je me voloie de lui plaindre,
Mès je ne truis qui droit m’en face,
Qar il ne crient nule menace
N’autre coroz vaillant deus soles.
Pinte la lasse à ces paroles
Chéi pasmée el pavement,
Et les autres tot ensement.
Por relever les quatre dames
Se leverent de lor eschames
Et Chiens et Leus et autres bestes,
L’eve lor gietent sor les testes.
Qant revienent de pasmoison,
Si conme en escrit le trovon,
Là où li Rois virent séoir
Se laisent à ses piez chaoir ;
Et Chantecler si s’agenoille,
De ses lermes les piez li moille.
Et qant li Rois vit Chantecler,
Pitié li prist du bacheler,
Un soupir a fait de parfont,
Ne s’en tenist por l’or du mont.
Par mautalent drece la teste,
Onc n’i ot si hardie beste,
Ors ne Sangler qui péor n’ait
Qant lor sire sospire et brait :
Tel péor ot Coarz li Lievres
Que il en ot deus jors les fievres.
Tote la Cort fremist ensemble,
Li plus hardiz de péor tremble,
C’onques n’orent coroz greignor,
Qant braire oïrent lor seignor.
Par mautalent sa[8] coue dresce,
Si s’en debat par tel destresce
Que tote en sone la meison,
Et puis fu tele sa raison.
Dame Pinte, dist l’Emperere,
Foi que je doi l’ame mon pere
Por qui je ne fis aumosne hui,
Moult me poise de vostre anui,
Mais je le cuit bien amender ;
Que je feré Renart mander,
Si que à voz eulz le verroiz
Et à vos oreilles orroiz
Con grant venjance en sera prise,
Qar j’en voil fere grant justise
Du grant outraige et del desroi.
Qant Ysengrin oï le Roi,
Isnelement en piez se dresce :
Sire, fet-il, c’est grant proesce,
Moult en seroiz par tot loez
Se vos Pinte vengier povez
Et sa seror dame Copée
Que Renart a si esclopée.
Ge nel’ di mie par haïne,
Ainçois le di por la meschine
Qu’il a morte, que je ne face
Por chose que je Renart hace.
Fait l’Emperere, biax amis,
Moult grant duel m’a-il el cuer mis ;
Ce n’est or pas le premerain :
A vos et à toz les forain
Me plain-je si con fere sueil,
Del avoltire et del orgueil
Et de la honte qu’il m’a fete,
Et de la pès qu’il a enfrete.
Mès or parlons d’autre parole,
Sire Bruns, prenez une estole,
Et vos, sire Bruiant li Tors,
Commandez l’ame de cest cors ;
Là sus enmi cele costure
Me fetes une sépouture
Entre ce plain et ce jardin,
Si parleron d’autre Martin.
Sire, fait Brun, vostre plaisir.
Atant va l’estole saisir,
Et non mie tant solement,
Mès li Rois el commencement
Et tuit li autre dou concile
Ont conmenciée la vigile.
Sire Tardis li Limaçons
Chanta por cele trois leçons ;
Et Rooniax chanta li vers,
Et il et Brichemers li Cers,
Et Brun li Ors dist l’oroison
Que Diex gart l’ame de prison.
Quant la vegile fu chantée
Et ce vint à la matinée,
Le cors porterent enterrer ;
Mès ainçois le firent serrer
En un moult bel vessel de plon,
Ains plus riches ne vit nus hon,
Puis l’enfoïrent soz un arbre
Et par desus mistrent un marbre,
S’i ont escrit le non la dame
Et sa vie et conmandé s’ame,
Ne sai à cisel ou à greffe,
Il ne servirent pas de beffe,
Ains ont escrit une espitace
Desoz cel arbre en une place :
Ci gist Copée suer Pintain,
Tot einssi l’atorna hui main
Renart qui chascun jor empire,
En fist as denz si grant martire ,
Que lors véist Pintain plorer,
Renart maudire et devorer,
Et Chantecler les piez estendre,
Moult grant pitié l’en péust prendre.
Qant li dels fu un poi lessiez
Et il fu del tot abessiez,
Emperere, font li baron,
Qar nos vengiez de cel gloton
Qui tantes guiles nos a fetes
Et tantes pès nos a enfretes.
Moult volentiers, dist l’Emperere,
Qar m’i alez, Brun biax doz frere,
Vos n’aurez jà de lui regart,
Dites Renart de moie part
Q’atendu l’ai trois jors entiers.
Sire, dist Brun, moult volentiers.
Atant se met en l’ambléure
Parmi le val d’une costure,
Que il ne siet ne ne repose.
Lors avint à Cort une chose
Endementiers que Brun s’en vet,
Renart empira moult son plet,
Qar mesire Coart li Lievres,
Qui de péor trembloit les fievres,
Deus jors les avoit jà éues,
Merci Dieu or les a perdues
Sor la tombe Dame Copée :
Car qant ele fu enterrée,
Onc ne se volt d’iloc partir,
Ainçois dormi sor le martir.
Et qant Ysengrin oï dire
Que ele estoit vraie martire,
Dist qu’il avait mal en l’oreille :
Rooniax qui bien le conseille,
Sor la tombe gesir le fist,
Lors fu gariz si con il dist ;
Mès se ne fust bone créance
Dont nus ne doit avoir dotance,
Et Rooniax qui le tesmoingne,
La Cort cuidast ce fust mençoingne.
Qant à la Cort vint la novele,
A tiex i ot qu’ele fu bele,
Mès à Grinbert fut-ele lede
Qui por Renart parole et plaide
Entre lui et Tybers le Chat.
S’or ne set Renart de barat,
Mar est bailliz, s’il est tenuz,
Qar Brun li Ors est jà venuz
A Malpertuis le bois entier
Parmi l’adrece d’un sentier ;
Por ce que grant estoit son cors
Remanoir l’estut par defors,
S’estoit devant la barbaqane.
Renart qui tot le mont engane,
Por reposer s’est tret ariere
Enmi le fonz de sa tesniere ;
Garnie avoit moult bien sa fosse
D’une geline grasse et grosse,
Et s’avoit mengié à matin
Deus beles cuisses d’un poucin :
Or se repose et si se aise.
Atant es-vos Brun à la haise,
Renart, fait-il, parlez à moi,
Je sui Brun mesagier le Roi,
Issiez ça fors en ceste lande,
Si vos diré que il vos mande.
Renart set bien ce est li Ors,
Reconnéu l’avoit au cors :
Lors se conmence à porpenser
Conment son cors porra tenser ;
En grant paine est d’estudier
Conment le puisse conchier.
Brun, fet Renart, biax doz amis,
En moult grant paine vos a mis
Qui çà vos a fet avaler !
Ge m’en devoie là aler
Mès qu’éusse mengié ançois
D’un merveilleus mengier françois,
Qar, sire Bruns, vos ne savez,
L’en dit à Cort, oï l’avez,
A riche home qant il i vient,
Gariz est qui ses manches tient,
Premiers vient li buefs aus aillés,
Après revient li autres mès
Qant li sires les puet avoir ;
Mès povres hons qui n’a avoir,
Si est de la merde au déable,
Ne siet à feu, ne siet à table,
Ançois menjut sor son giron.
Li chien li viengnent environ
Qui le pain li tolent des mains.
Une foiz boivent, c’est del mains,
Ne jà c’une foiz ne bevront,
Ne jà que un seul mès n’auront.
Les os lor gietent li garçon,
Qui plus sont sec que vif charbon.
Chascun tient son pain en son poins,
Qar tuit son feru en uns coins,
Et li senechal et li queu
De tel chose ont lor seignor peu
Dont li larron ont grant plenté :
Qar fussent-il ars et venté,
Sa char lor emblent et les pains
Qu’il envoient à lor putains.
Por tel afere con ge di,
Biau sire, avoie dès mardi
Mon lart et mes pois aünez
Dont je me sui desjéunez,
Et s’ai bien mengié deus denrées
De novel miel en fresches rées.
Nomini Pastre Christum fil,
Dist li Ors, par le cors Saint Gil,
Cel miel, Renart, dont vos abonde ?
Jà est-ce la chose du monde
Que le miex ains et plus desirre,
Qar m’i menez, biau très doz sire,
Por le cuer bieu la moie cope.
Et Renart li a fet la lope
Por ce que si tost le deçoit,
Et li chaitis ne s’aparçoit,
Et il li trempe la corroie.
Brun, fet Renart, se je savoie
Que je trovasse en vos fiance
Et amistiez et aliance,
Foi que je doi mon fiz Rovel,
De cest bon miel frès et novel
Vos empliré enmi le ventre,
Qar au dedenz si con l’en entre
El bois Lanfroi le forestier
Qui moult est orgueilleus et fier,
Qar se je ore o vos aloie,
Et de vostre aise me penoie,
Tost m’en feriez male part.
Qu’avez-vos dit, sire Renart ?
Me mescréez-vos dont de rien ?
Oïl. De quoi ? Je le sai bien,
De traïson, de felonnie.
Renart, or est-ce déablie
Qant de tel chose me mesdites.
Non faz, ore en soiez toz quites,
Ne vos enport nul mal corage,
Vos avez droit, qar par l’omage
Que fis Dant Noble le Lion
Onc n’oi vers vos entencion
D’estre traïtres ne trichierres,
Ne envers vos estre boisierres :
Ge n’en quier autre sureté,
Ge m’en met à vostre bonté.
Qanque Brun velt Renart otroie.
Atant se metent à la voie,
Onques n’i ot resne tenu
De si à tant qu’il sont venu
El bois Lanfroi li forestier :
Là s’aresterent li destrier.
Lanfroi qui le bois soloit vendre,
Un chesne ot conmencié à fendre ;
Deus coins de chiesne toz entiers
I avoit mis li forestiers.
L’un des coins si avoit fait pendre,
Et l’autre après por le mieux fendre.
Brun, fait Renart, biax doz amis,
Vez ore ci que t’ai promis ;
Ici dedenz est la chastoire,
Or del mengier, puis irons boire :
Or as bien trové ton avel.
Et Brun i mist lors son musel
El chesne et les deus piez devant,
Et Renart le vet sus levant
Et adrecier en contremont,
En sus se tret, si le semont.
Cuivers, fet-il, ovre la bouche,
A poi que la lange n’i touche ;
Filz à putain, ovre la gole :
Einssi le conchie et afole.
Maudite soit sa vie tote,
Jusqu’à un an n’en tresist gote,
Car n’i avoit ne miel ne rée.
Endementieres que Brun bée,
Renart a les coins enpoigniez
Et à grant paine descoigniez ;
Et qant li coins furent osté,
La teste Brun et li costé
Furent dedenz le chesne enclos.
Ore est li las en mal repos,
Estraint le cuir et lieve haut,
A poi que li cuers ne li faut :
Moult l’avoit mis en male presse
Renart qui jà n’en ait confesse,
Qui onc ne fist bien ne aumosne.
De 1oing esta, si le ramposne :
Brun, fait-il, jel’ savoie bien
Que queriez art et engien,
Jà de cel miel ne gosteroie ;
Mès je sai bien que je feroie
S’une autre foiz l’avoie à fere :
Moult estes ore deputere
Qant de cel miel ne me proiez.
Hai ! coume conduiriez
S’estoie en une enfermeté,
Et con seroie à sauveté !
Vos me leriez poires moles.
Atant es-vos à ces paroles
Sire Lanfroi le forestier,
Et Renart se mist au frapier.
Qant le vilain vit Brun l’Ors pendre
Au chesne que il devoit fendre,
A la vile s’en vet le cors.
Harou ! harou ! fet cil, à l’Ors !
Jà le porrons as poins tenir.
Qui lors véist vilain venir
Et fremier par le boscage,
Qui portent tinel, et qui hache,
Qui flael, qui baston d’espine,
Grant péor ot Brun de s’eschine.
Devant lui vient Hurtevilain
Et Joudome trouse-putain,
Et Baudoin porte cuirie
Qui f… sa fame par derrieres,
Girout Barbete qui l’acole,
Et un des fiuz sire Nicole,
Et Trosse-anesse le puant
Qui por la moche va fuiant,
Et Corberaut de la ruelle,
Le bon voidéor d’escuelle,
Et Tigerins Brise-Fouace,
Et li fil Tieger de la place.
Qant l’Ors ot des vilains la rage,
Fremist et pense en son corage
Que miex li vient le musel perdre
Que Lanfroi le péust aerdre,
Qui devant vint à une hache.
Taste et retaste et tire et sache,
Estent les piaus, rompent les vaines :
Tant a sachié que à grant paines
Fent li cuirs et la teste qasse,
Mès del sanc i lessa grant masse,
La piau des piez et de la teste :
Onc nus ne vit si lede beste.
Le sans li coule del musel,
Entor son vis n’a tant de pel
Dont l’en péust fere une borse.
Einssi s’en va le filz à l’Orse,
Parmi le bois s’en vet fuiant,
Et li vilain le vont huiant :
Goubert le filz sire Gillain,
Et Hardouin cope-vilain,
Et Fainber et le filz Galon,
Dant Helyes le niez Faucon
Et Outrant li cous de la Glée[9]
Qui sa fame avoit estranglée ;
Tigiers li Forniers de la vile
Qui ot un enfant de Poufile[10],
Et as premiers Brise-Fauchile
Et Rocelins li filz Nancile,
Et le filz Ogier de la place,
Tuit li viennent à une trace ;
Et misires Hubert Grospet,
Et le filz Fouchier Galopet.
Li Ors s’enfuit hors de la noise,
Et li prestres de la parroise
Qui fu peres Martin d’Orliens,
Revenoit d’espandre son fiens :
Une forche tint en ses mains,
Si le feri parmi les rains,
Par un pou ne l’a abatu,
Moult l’a blecié et confondu.
Cil qui fet pingnes et lanternes,
Si ataint l’Ors entre deus chesnes
D’une corne de buef qu’il porte,
Li a tote l’eschine torte.
Et d’autres vilains i ot tant
Qui as tinels le vont batant,
Que à grant paine s’en eschape.
Or est Renart en male trape
Se Brun li Ors le puet ataindre ;
Mès qant il l’oï de loing plaindre,
Si s’est mis parmi une adrece
A Malpertuis sa forterece
Où il ne crient ost ne agait.
Au trespasser que Bruns a fait
Li a Renart deus gaz lanciez,
Brun, estes-vos bien avanciez,
Ce dist Renart, del miel Lanfroi
Que vos avez mengié sanz moi ?
Vostre male foi vos parra,
Certes il vos en mescharra
Que jà n’aurez à la fin prestre.
De quel ordre volez-vos estre
Qui roge chaperon avez ?
Li Ors estoit si adolez
Qu’il ne li pot respondre mot,
Fuiant s’en vet plus que le trot :
Encor quida chaoir es mains
Lanfroi et as autres vilains.
Tant a alé esperonant
Que dedenz le midi sonant
Est revenuz en la chariere
Où li Lion tint Cort pleniere.
Pasmé chaï es paveillons
De si haut con il estoit lons,
Et si n’aporte nule oreille.
La Cort s’en seigne à grant merveille :
Dist li Rois, Bruns, qui t’a ce fet ?
:Laidement t’a ton chapel tret[11],
Par poi qu’il nel’ t’a escuissié.
Brun i a tant del sanc lessié
Que la parole li failli :
Rois, fet-il, si m’a mal-bailli
Renart com vos povez véoir,
Atant li vet as piez chaoir.
Qui lors véist le Lion braire,
Par mautalent ses crins detraire
Et jurer la vie et la mort :
Brun, fet li Rois, Renart t’a mort,
Ne cuit q’autre merci en aies,
Mès par la mort et par les plaies
Je t’en feré si grant venjance
Qu’en le saura par tote France.
Où estes-vos, Tyberz li Chaz ?
Alez moi à Renart viaz,
Dites moi le rox deputaire
Qu’il me viengne en ma Cort droit faire,
Si n’i aport or ne argent,
En la presence de ma gent,
Ne parole por soi deffendre,
Mès la hart à sa gole pendre.
Tybers ne l’osa refuser,
Que s’il s’en pouist escuser
Encor fust sanz lui li sentiers ;
Mès à envis ou volentiers
Convient au sene aler le prestre,
Et Tybert se mist à senestre
Parmi le fons d’une valée.
Tant a sa mule esperonée
Qu’il est venuz à l’uis Renart ;
Deu reclaime et Saint Lienart
Qui delier seut les prisons,
Qu’il le gart par ses oroisons
Des mains Renart son conpaignon,
Qar il le set tant à gaignon
Et à beste de put conroi,
Néis à Dex ne porte-il foi.
La riens qui plus le desconforte,
Ce fu qant il vint à la porte ;
Mès entre un fresne et un sapin
A véu l’oisel Saint Martin :
Assez si le hucha à destre,
Et li oisiax vint à senestre.
Tibert s’estut une grant pose,
Or vos di que ce fu la chose
Qui plus l’esmaie et plus le donte,
Ses cuers, li dist qu’il aura honte
Et grant anui et grant vergoigne ;
Tant doute Renart et resoigne
Qu’il n’ose entrer en sa meson :
Par defors conte sa reson ;
Mès mavès en ert ses gaaing.
Renart, fet-il, sire conpaing,
Respon moi, es-tu là dedenz ?
Renart respont entre ses denz
Tot coiement que nus ne l’oie,
Tybert, par vostre male joie
Et par vostre pute aventure
Soiez venuz en ma pasture,
Si serez-vos s’engin ne faut.
Et puis li respondi en haut :
Tybert, fet li Renart, villecome
Se tu venoies or de Rome
Ou de Seint Jaque freschement,
Bien soiez venu hautement
Conme le jor de Pentecoste.
Mès sa parole, que li coste ?
Si le salue belement,
Et Tybert li respont briément,
Renart, nel’ tenez à desroi,
Se je vieng ci de par le Roi,
Ne cuidiez pas que je vos hace,
Li Rois vos het et vos menace,
Et Bruns et Isangrin li cous,
Toz li mondes se plaint de vos.
Vos n’avez à la Cort voisin
Fors Dant Grinbert vostre cosin
Qui ne vos hace durement.
Et Renart li respont briément,
Tybert, lessiez le menacier
Et sor moi lor denz aguisier ;
Ge vivrai tant con ge porrai,
G’irai à Cort et si orrai
Qui sor moi vodra noient dire.
Ce sera grant savoir, biau sire,
Si le vos lo, que je vos aim ;
Mès certes je ai si grant fain
Que tote en ai corbe l’eschine :
Avez-vos ne coc ne geline,
Ne chose qu’en puisse mengier ?
Trop me menez or grant dangier,
Ce li respont Renart, baraz
De soriz crasses et de raz,
Ce cuit, vos n’en gosteriez.
Si feré voir. Non feriez,
Certes jà n’en seré lassez,
Et je vos en donré assez
Demain ainz le soleil levant :
Or me sivez, g’irai avant.
Atant s’en ist de sa tesniere,
Et Tybert le sieut par derriere
Qui n’i entent barat ne gile.
Traiant en vont à une vile
Où il n’avoit coc ne geline
Dont Renart n’ot fet sa cuisine.
Tybert, savez que nos ferons ?
Là dedenz entre ces mesons,
Fet soi Renart, esta uns prestres,
Et ge connois moult bien ses estres ;
Assez a froment et aveine,
Mès les soriz en font grant peine :
Mengié en ont bien demi mui.
N’a encor gueres que g’i fui,
Adonc lor fis une envaïe,
Dix gelines pris sanz faillie ;
Les cinc en ai-ge mengiés hui,
Et les autres mis en estui.
Vez le pertuis par où g’i entre,
Passe outre, saoule ton ventre ;
Mès li lechieres li mentoit ;
Qar li prestres qui là manoit,
N’avoit ne orge ne avaine.
De ce n’estoit-il jà en paine,
Toute la vile le plaignoit
Por une putain qui tenoit,
Qui mere estoit Martin d’Orliens,
Si l’avoit gité de granz biens,
Que il n’avoit ne buef ne vache
Ne autre beste que je sache
Fors deus gelines et un coc.
Martinet qui puis ot le froc
Et qui puis fu moines renduz,
Avoit au trou deus laz tenduz
Por Renart prendre le Gorpil.
Diex garisse au Prestre cel fil
Qui jà aprent si bel barat
Con de prendre Gorpil ou chat !
Et Renart l’enging savoit bien,
A son conpaignon n’en dit rien.
Tybert, sail outre, dist .Renart ,
Fi ! merde, con tu es coart !
Je t’atendré au trou ça fors.
Et Tybert lance outre son cors,
Mès or se puet tenir por fol,
Qar li laz li serre le col.
Tret et retret Tybert li Chaz,
Con plus tret, plus estreint li laz ;
Eschaper cuide, rien ne vaut,
Qar Martinet li cler li saut :
Or sus ! or sus ! fet-il, biau pere,
Ayde ! ayde ! bele mere !
Alumez, si corez au trou,
Li Gorpil est tenuz por fou.
La mere Martinet s’esveille,
Saut sus, s’alume la chandelle :
A une main tint sa quenoille :
Li Prestres en son poing s’endoille
S’est erraument du lit sailliz.
Lors fu Tybert moult asailliz,
Qu’il prist cent cox de livroison
Einz qu’il partist de la meson.
Fiert li Prestres, fiert la soignanz,
Et Tybert giete avant les denz,
Si con nos trovons en l’estoire,
Esgarde la coille au Provoire,
As denz et as ongles trenchanz
Li a trenchié un des pendanz.
Qant la fame vit sa grant perte,
Lors primes ot dolor aperte,
Troiz foiz s’est chaitive clamée,
A la quarte chaï pasmée.
Au duel que Martinet menoit
De sa mere qui se pasmoit,
Tybert s’en eschape li Chaz,
Qu’il ot as denz mengié les laz.
Il a esté bien laidengiez,
Mais en la fin s’est bien vengiez
Del Prestre qui si le batoit.
Ahi ! con il s’en vengeroit
De Renart s’il ert au desore !
Mès li lechieres ne demore,
Ainz s’enfoï sanz plus atendre
Dès que Tybert vit au laz prendre ;
Quant Martinet dist, levez sus,
Onques n’i volt arester plus,
Ainz s’enfoï à son repere,
Et cil remest por le mal trere.
Qui donc oïst Tybert le Chat
Renart maudire de son barat,
Ahi ! dist-il, Renart, Renart !
Jà Diex n’ait en vostre arme part !
Bien déusse estre chastiez
Qui tantes foiz sui conchiez
Par le barat Renart li rox,
Et li Prestres li mavès cox
Qui Diex doint mal giste et pou pain
Entre lui et s’ordre putain,
Qui hui me fist tel envaïe ;
Mès d’un des pendanz n’a-il mie,
A tot le mains en sa paroche
Ne puet soner c’à une cloche.
Et Martinet son filz d’Orliens,
Que jà ne croisse en lui nus biens,
Qui hui m’aloit einsi batant,
Jà ne muire-il de si q’atant
Qu’il ait esté moines retrez
Et puis par larrecin deffez !
Tant à sa plainte demenée
Qu’il est venuz en la valée
Et en la Cort où li Rois siet.
Où qu’il le voit as piez li chiet,
Si li raconte la merveille.
Diex ! dist li Rois, qar me conseille,
Con oi ore grant déablie
De Renart qui si me conchie !
Ne je ne puis trover nului
Qui me venge de cest anui.
Sire Grinbert, moult me merveil
Se ce n’est par vostre conseil
Que Renart me tient si por vil.
Je vos plevis, sire, nenil.
Alez donc tost, si l’amenez,
Gardez sanz lui que revenez.
Sire, ce ne puis-ge pas fere,
Renart est de si put afere
Bien sai que pas ne l’amenroie
Si je voz letres n’en avoie ;
Mès s’il véoit vostre séel,
Foi que je doi Saint Daniel,
Lors sai-je bien que il vendroit,
Jà nule essoine nel’ tendroit.
Voire dist, fet soi l’Emperere.
Lors li devise la matere,
Et Baucent li Sengler l’escrit
Et si séela quanque il dist,
Puis bailla Grinbert le séel,
Et cil se mist en un prael,
Et puis s’en entra en un bos.
Moult li sua la pel del dos
Ainz qu’il venist à l’uis Renart.
Au vespre trove en un essart
Un sentier qui bien le conduit
A l’uis Renart devant la nuit :
Li mur sont haut et li destroit,
Par un guichet en ala droit.
Entre Grinbert el premier baille,
Dant Renart crient que ne l’asaille.
Qant il oï celui venir
Près de meson se volt tenir
Tant que il sache la verté.
Es-vos Grinbert en la ferté
Au pont tornéis avaler
Au petit pas, et au torner
Ainz qu’il entrast en la tesniere
Le cul avant, la teste ariere,
L’a bien Renart reconéu
Ainz que de plus près l’ait véu.
Grant joie en fet et grant solaz,
Au col li met andeus les braz :
Desoz li ploie deus cossins
Por ce qu’il estoit ses cosins.
De ce tien-ge Grinbert à sage,
Qu’il ne volt conter son mesage
Devant qu’éust mengié asez ;
Et quant li mengiers fu finez,
Sire Renart, ce dist Grinbert,
Trop est vostre barat apert :
Savez-vos que li Rois vos mande,
Non mie mande, mès conmande
Que vos li vengnez fere droit
En son palès où que il soit.
Prendra jà vostre gerre fin
Que demandez-vos Isengrin,
Ne Brun l’Ors ne Tybert li Chaz,
Mar véistes votre baraz.
Ne vos en puïs doner confort,
Jà n’en aurez el que la mort,
Ne vos ne tuit vostre chael.
Tenez, si brisiez cest séel,
Gardez que la letre vos dist.
Li lechierres tremble et fremist,
O grant péor la cire brise
Et voit que la letre devise :
Si sospira, au premier mot
Bien sot à dire qu’il i ot.
« Mesires Nobles li Lions,
Qui de totes les régions
Et des bestes est Rois et sire,
Mande Renart honte et martire
Et grant anui et grant contrere
Se demain ne li vient droit fere
Enz en la Cort devant sa gent,
Si n’i aport or ne argent,
Ne n’ameint hon por lui deffendre,
Fors la hart à sa gole pendre. »
Qant Renart oï la novele,
Le cuer li bat soz la mamele,
Tot le viaire li neirci :
Por Dieu, fet-il, Grinbert, merci,
Moult hé l’ore que je tant vif :
Conseilliez cest dolent chaitif,
Qar je seré demain penduz.
Diex ! qar fuse ore moines renduz
A Clugni ou à Clerevax !
Mès je conois tant moines fax
Que je criens q’issir m’en conviegne,
Por ce est mieus que je m’en tiegne.
N’aiez de ce, dist Grinbert, cure,
Vos estes en grant aventure
Tant con vos estes ci sanz gent :
Confessiez-vos à moi briément,
Rent-toi à moi vraie confès,
Qar je n’i voi prestre plus près.
Renart respont, sire Grinbert,
Ci à conseil bon et apert,
Car se je vos di ma confesse
Devant ce que la mort m’apresse,
De ce ne puet venir nus max,
Se je muir, si serai toz sax :
Or entendez à mes pechiez.
Sire, j’ai esté entechiez
De Hersent la fame Ysengrin ;
Mès or vos en dirai la fin :
Ele en fu à droit mescréue
Que voirement l’ai-je croissue ;
Or m’en repent, Diex moie corpe,
Meinte foiz li basti la crope.
Ysengrin ai-je tant forfet
Que nel’ puis nier à nul plet.
Diex mete or m’ame à garison !
Trois foiz l’ai fet metre en prison,
Si vos dirai en quel maniere.
Gel’ fis chaoir en la loviere
Là où il enporta l’agnel ;
Là ot si bien batu la pel
Qu’il prist cent cox de livroison
Ainz qu’il partist de la meson.
Gel’ fis el braon enbraier
Où le troverent trois berchier,
Sel’ batirent con asne à pont.
Trois bacons avoit en un mont
Chiés un prodom en un lardier,
De ceus li fis-je tant mengier
N’en pot issir, tant fu ventrez,
Par le pertuis où fu entrez.
Gel’ fis séoir en la gelée
Tant qu’il ot la qeue engelée ;
Gel’ fis peschier en la fontaine
Par nuit quant la lune estoit plaine ;
Del ombre de la blanche image
Cuida por voir ce fust fromage ;
Et si refu par moi traïz
Devant la charete as plaïz :
Cent foiz vaincu, hué et mat.
Par fine force de barat
Li fis-je tant que il fu moines,
Puis dist que il seroit chanoines.
Qant on li vit la char mengier
Fox fu qui de lui fist berchier.
Ge ne vos aroie hui retrait
La honte que je li ai fait.
Il n’a beste en la Cort le Roi
Qui ne se puist plaindre de moi.
Je fis Tybert chaoir es laz
Qant il cuidoit mengier les raz ;
Et je chez un vilein alai,
Coc ne geline n’i laissai
De tot le parenté Pintein
Fors solement lui et Santein ;
N’i a remès coc ne geline
Dont je n’aie fait ma cuisine.
Qant li Ors fu devant mon crués,
De Senglers, de Vaches, de Bués
Et d’autres bestes bien armées
Que Ysengrin ot amenées
Por cele gerre metre à fin,
Retint Roonel le mastin :
Bien furent trente conpaignon,
Que chien, que lisses, que gaignon,
Tuit furent batu et plaié,
Mès malement furent paié,
Qar je lor toli lor soudées,
Qant les oz s’en furent alées,
Par guile et par conchiement
Lor ,toli-ge lor covenant.
Au departir lor fis la loupe.
Or m’ en repent, Diex moie coupe !
A tot le mont ai fait anui,
Dolanz et repentanz en sui :
Or voil venir à repentance
De qanque je fis en m’enfance.
Sire Renart, ce dist Grinbert,
Vos pechiez m’avez descovert
Et le mal que vos avez fet ;
Se Diex vos giete de cest plet
Gardez-vos bien del renchaoir.
Jà Diex ne me dont tant véoir,
Ce dist Renart, que je mès face
Nule chose qu’à Diex desplace.
Il li otroie quanqu’il volt,
Il s’abaissa et cil l’asolt
Moitié romanz, moitié latin.
Renart, qant ce vint au matin,
Besa sa fame et ses enfanz,
Au departir fu li dels granz ;
Congié prist à son manage,
Enfanz, dist-il, de haut parage,
Pensez de mes chastiax tenir,
Que que de moi doie avenir,
Contre Contes et contre Rois,
Que vos ne troverez des mois
Conte, Prince ne Chasteleine
Qui vos forface un fil de leine :
Jà par eus ne serez grevez
Se vos avez les ponz lever,
Que vos avez asez vitaille,
Ne cuit devant set anz vos faille.
Que vos iroie-je disant ?
A Dame Deu toz vos conmant
Qui me ramaint si con je voil.
Atant mist le pié sor le soil :
Au departir de sa tesniere
A conmencié une priere.
Diex, fist-il, Rois omnipotens,
Garde mon savoir et mon sens
Que ne le perde par péor
Par devant le Roi mon seignor,
Qant Ysengrin m’encusera
De qantqu’il me demandera,
Que je li puisse reson rendre
Ou del noier ou del deffendre ;
Me doint sain et sauf reperier
Que je m’en puisse encor vengier
De cels qui me font si grant gerre.
Lors se coucha adenz à terre,
Et trois foiz se rendi copables,
Puis se seigna por les Déables,
Et por Dant Noble le Lion
Moult fu en grant afflicion.
Or s’en vont li Baron à Cort,
Et passent l’eve qui là cort,
Et les destroiz et la montaingne,
Et puis chevauchent par la plaingne.
En ce que Renart se demente
El bois ont perdue la sente,
La voie et le chemin ferré,
Et ne quident, tant ont erré,
Qu’il s’avoient parmi uns pleins
Delez une grange à Noneins.
La meson est moult bien garnie
De toz les biens que terre crie,
De let, de fromaches et d’ués,
De brebiz, de vaches, de bués.
D’unes et d’autres norriçons,
Dist Renart, car nos adreçons
Par encoste de ces espines,
Vers cele cort à ces gelines,
Là est la voie que lessons.
Renart, Renart, dist li Tessons,
Diex set bien por qoi vos le dites,
Filz à putain, puanz herites,
Mauvès lechierres et engrès,
N’estiez-vos à moi confés
Et aviez merci crié ?
Fet-il, ge l’avoie oblié :
Alons-nos ent, vez moi tot prest.
Renart, Renart, por noient est,
Diex parjure, Diex foi-mentie,
Toz jors durra ta lecherie.
Con tu es fole créature !
Tu es de mort en aventure,
Et après ta confession,
Or si vels fere desraison ;
Certes granz pechiez te cort seure,
Vien-t’en, que maudite soit l’eure
Que chaïs seur terre de mere !
Belement le dites, biau frere,
Alon-nos ent en pès amblant.
N’en ose fere autre semblant
Por son cosin qui le chastie,
Et nequedent sovent colie
Vers les gelines cele part,
Moult est dolent qant il s’en part,
Et qui la teste li coupast,
As gelines tantost alast,
Mises les éust à raison
Se ne fust Grinbert le Taisson.
Or s’en vont li Baron ensemble :
Diex ! con la mule Grinbert amble !
Mès li chevax Renart acope,
Li flans li bat desoz la crope ;
Tant crient et doute son seignor,
Que onques mès n’ot tel péor.
Tant ont alé et plains et bos,
Et l’ambléure et les galos,
Et tant ont la montaingne alée,
Qu’il sont venu en la valée
Qui en la Cort le Roi avale,
Descenduz sont devant la sale.
Sitost com Renart vint à Cort,
Il n’i a beste ne s’atort
Ou deposer ou de respondre.
Or est Renart près de confondre,
N’en tornera qu’il ne s’en cuise,
Qar Ysengrin ses denz aguise
Et Tybert li Chaz se conseille,
Et Bruns qui la teste ot vermeille ;
Mès qui q’aint ou hée Renart,
Ne fet pas chiere de coart,
Ainz conmence enmi la meson
Teste levée sa reson.
Rois, fet Renart, je vos salu
Con cil qui plus vos a valu
Que tuit li baron de l’Empire,
Mès tort a qui vers vos m’enpire ;
Ne sai se c’est par mon éur,
Je ne fui onques asséur
De vostre amor un jor entier.
Je parti de Cort avant-ier
Par vostre gré et par amor,
Sanz maltalent et sanz clamor.
Or ont tant fet li losengier
Qui de moi se volent vengier,
Que vos m’avez jugié à mort ;[12]
Mès puis, sire, que Rois s’amort
A croire les mauvès larrons,
Et il lesse les bons barons,
Et gerpist le chief por la qeue,
Lors vet la terre à male veue :
Qar cil qui sont serf par nature
Ne sevent esgarder mesure.
S’en Cort se puent alever,
Moult se painent d’autrui grever ;
Mès chiens familleus evenisme
N’a cure de beste voisine ;
Cil font la povre gent tuer
Et les monnoies remuer.
Cil enortent le mal à fere
Qui bien en sevent lor prou trere,
Et enborsent autrui avoir.
Ice vodroie-je savoir
Que Bruns et Tybert me demandent :
Il est voirs se li Rois conmande
Que bien me puent fere let
Encor ne l’aie-ge forfet,
Qu’il ne sevent dire par qoi.
Se Bruns menja li miel Lenfroi
Et li vilains le ledenja,
Et il por coi ne se venja ?
Jà a-il granz meins et granz piés,
Si a grant musel et grant giés.
Se mesire Tybert li Chaz
Menja les soriz et les raz
Qant en le prist et li fist honte,
Por le cuer bieu à moi que monte ?
Jà ne sui-ge Prevoz ne Mere
Que je l’en doie nul droit fere ;
Volent moi ice demander
Que il ne puent amender.
D’Ysengrin ne sai-ge que dire,
Qar il n’a mie tort del dire
Que j’avoie sa fame amée,
Et qant ele ne s’est clamée,
Sui-ge lecheres de m’amie ?
Li fox jalox de ce a envie,
Et puis qui n’i ot braies traites,
Ne huis brisiez, ne portes fraites,
S’ele m’a chier et ele m’aime,
Cil faus jalous de coi se claime ?
Est-il por ce drois qu’en me pende ?
Nenil, Sire, Diex m’en deffende !
Moult est grant vostre roiauté,
La foi et la grant loiauté
Que j’ai toz jors vers vos éue
M’a l’ame del cors meintenue ;
Mès foi que doi Deu et Saint Jorge
J’ai tote chenue la gorge.
Viex sui, si ne me puis aidier,
Si n’ai mès cure de plaidier :
Pechié fet qui à Cort me mande,
Mès puis que mesire conmande,
Si est-il drois que je i viegne.
Or sui devant lui, si me tiegne
Et si me face ardoir ou pendre,
Qar ne me puis vers lui deffendre.
Ge ne sui pas de grant puissance,
Mès ce seroit povre venjance,
S’en parleroient meinte gent
Se l’en sanz jugement me pent.
Renart, Renart, dist l’Emperere,
Dahez ait l’ame vostre pere
Et la pute qui vos porta
Qant ele ne vos avorta !
Or me dites, traïtre lerres,
Por qoi estes tant bareteres ?
Bien savez parler et plaidier,
Mès ce, que vaut ? N’i a mestier,
N’en partirez en nule guise
Que de vos n’en face justise ;
N’i a mestier chiere hardie
Ne n’i vaut vostre renardie,
Moult savez de la fauve anesse ;
Se jà n’avez vostre promesse
Que vos ai orendroit promise,
Hui estes venuz à juise
Tel con jugeront mi baron,
Que l’en doit fere de laron
Et con de felon traïtor.
N’en partirez sanz mauvès tor
Se ne vos poés escondire
De qanque l’en vos saura dire.
Sire, dist Grinbert li Tessons,
Se nos vers vos nos abessons
Por droit fere et por afetier,
Ne devez pas por ce tretier
Vostre baron vilainement,
Mès par loi et par jugement.
Entendez ça, ne vos anuit,
Renart est venuz par conduit
Por droit faire et por amender
Ce c’on li saura demander.
S’est qui de lui face clamor,
Vos li otroiez par amor
A respondre par jugement
En vostre Cort voiant la gent.
Ainz que Grinbert éust finée
Sa reson et bien terminée,
Se dreça en piez Ysengrin
Et li motons sire Belin,
Tybert li Chaz et Rooniax,
Et Dant Tiecelin li Corbiax,
Et Chantecler et Dame Pinte,[13]
Si con el vint à Cort soi quinte,
Et Espinarz li Heriçons,
Et Dant Petipas li Poons ;
Frobers li Gresillons avance,
Qui sor toz autres crie et tence,
Et Dant Rouciax li Escuireus
Qui il a fet de moult grant deus.
Coart li Lievres moult s’argue
De cort en cort, de rue en rue,
Meinte foiz li a fet anui,
Vengier s’en cuide encore encui.
Or est Renart en mal randon
Se l’en le velt metre à bandon ;
Mès li Rois les fet en sus trere,
Lui en lest la venjance fere.
Li Rois a parlé hautement
Si que l’oent tote la gent.
Seignor, fet-il, conseilliez moi
De cest larron de pute foi,
Quel justice de lui ferai,
Dites conment m’en vengerai.
Sire, font li baron au Roi,
Trop est Renart de pute foi,
Nus ne vos sauroit desloer
Qu’en haut nel’ faciez encroer.
Respont li Rois, bien avez dit :
Or tost, fet-il, sanz contredit
Se Renart s’en estoit tornez,
Jamès ne seroit retornez ;
Sachiez que nos en mescherroit,
Tiex n’en set mot qu’en ploreroit.
Sor un haut mont en un rochier
Fet li Rois les forches drecier
Por Renart pendre le Gorpil :
Estes-le-vos en grant peril.
Li Singes li a fet la moe,
Grant coup li done lez la joe.
Renart regarde arere soi,
Voit que i viegnent plus de troi ;
Li un le tret, l’autre le bot,
N’est merveille se il redote.
Coars li Lievres l’arochoit
De loing, que pas nel’ aprochoit :
A l’arocher qu’à fet Coart
En a crollé le chief Renart ;
Coart en fu si esperduz
Que onques puis ne fu véuz ;
Del signe qu’ot véu s’esmaie,
Lors s’est muchez en une haie :
D’iloc, ce dist, esgardera
Quel justise l’en en fera.
Mar i muça, si con je croi,
Enqui aura poor de soi.
Renart se voit moult entrepris,
De totes parz liez et pris ;
Mès il ne puet engin trover
Conment il s’en puist eschaper :
Del eschaper est-il noient
Si li enginz n’i est trop grant.
Qant il vit les forches drecier,
Lors n’ot en lui que corocier,
Et dist au Roi, biaux gentix Sire,
Qar me lessiez un petit dire :
Vos m’avez fet lier et prendre,
Or me volez sanz forfet pendre ;
Mès j’ai fet de moult granz pechiez
Dont je sui auques entechiez,
Or voil venir à repentance,
El non de sainte penitance
Voil la Croiz prendre por aler
La merci Dieu outre la mer.
Se je là muir, si serai sax,
Et se je sui penduz, c’est max,
Si seroit moult povre venjance.
Or voil venir à repentance.
Atant li vet chaoir as piez,
Au Roi en prist moult grant pitiez.
Grinbert revint de l’autre part
Qui merci crie por Renart :
Sire, por Deu entent à moi,
Qar le fai bien, porpense toi
Con Renart est preuz et cortois :
Se Renart vient dusq’à cinc mois
Encor aura mestier moult grant,
Qar n’avez si hardi serjant.
Outre mer voise, la Croiz prengne,
Et à vostre rapel reveingne.
Ce dist li Rois, ne fet à dire,
Qant reviendroit si seroit pire,
Qar tuit ceste costume tienent,
Qui bon i vont, mal en revienent.
Tot autretel refera-il
S’il eschape de cest peril :
S’il n’avoit lores bone pès,
Sire, il n’en reviegne jamès.
Ce dist li Rois, et il la preigne
Par tel convent que là remeigne.
Qant Renart l’ot, si ot grant joie,
Ne set s’il fornira la voie,
Mès conment que il l’en doie estre,
La Croiz a sor l’espaule destre ;
Escherpe et bordon li aportent
Les bestes moult s’en desconfortent ;
Cil qui enpaint et boté l’ont
Dient qu’encor le conperront
Es-vos Renart le pelerin
Escherpe au col, bordon fresnin ;
Li Rois li dist qu’il lor pardont
Trestoz les max que fet li ont,
Et degerpisse engins et max,
Adont s’il muert il sera sax.
Renart ne met riens en defois
De qanque li prie li Rois,
Ainz li otroie toz ses diz
Tant que il soit d’iloc partiz ;
Ront le festu, si lor pardone.
De Cort se part un pou ainz none,
Onques nus d’aus ne salua,
Enz en son cuer les desfia,
Ne mès que li Rois et s’espouse
Ma Dame Fiere l’orgellouse,
Qui tant par est cortoise et bele.
Renart gentement en apele,
Sire Renart, proiez por nos
Et nos reproierons por vos.
Dame, fet-il, vostre proiere
Devroie-ge avoir moult chiere ;
Moult par devroit estre haitiez
Por qui proier daingneriez,
Et se cel vostre anel avoie,
Moult en seroit mellor ma voie,
Et sachiez, se le me donez,
Bien vos sera gerredonez,
Redonrai vos de mes joiax
Tant que vaura bien cent aniax.
La Roïne l’anel li tent,
Renart à grant joie le prent,
Entre ses denz basset a dit,
Certes qui unques ne le vit
L’anel, por voir le conperra,
Jà por nului ne remendra.
Renart mist l’anel en son doi
Et puis a pris congié au Roi :
Le cheval fiert des esperons,
Fuiant s’en va les granz trotons ;
Vers la haie s’est aprochiez
Là où Coart s’estoit muchiez.
Fain a greignor que il ne selt,
De jéuner li chés li delt.
Atant s’en entra en la haie,
Coart le voit, moult s’en esmaie ;
En piez se drece de paor,
Et si li a oré bon jor :
Ce dist Coart, moult par sui liez
Qant vos estes sains et haitiez ;
Forment me poise del anui
Que l’en vos a fet si grant hui.
Renart qui tot le monde boise
Dist : qant de mon anui vos poise
Et que bel ne vos est del nostre,
Diex doint qu’il nos repoist del vostre !
Qant Coart l’ot, moult bien l’entent,
Ne s’aséure de noient
Ainz s’apareille de foïr,
Qar moult se dote de traïr,
Si se volt trere par le plain,
Mès Renart le sesist au frain.
Par le cuer bé, sire Coart,
Ça esterez, ce dist Renart :
Jà n’ert vos chevaus si igniax
Que il vos gart de mes chaiax,
Ne lor en face livroison ;
Poignant le vet de son bordon.
La Cort le Roi et li serjant
Fu en un val parfont et grant,
Entre quatre roches agues,
Contremont hautes vers les nues.
En la plus haute Renart monte,
O lui Coart cui il fet honte ;
Coart pendant vet contreval
Par desoz les piez au cheval.
Renart qui moult est deputere,
En quide bien livroison fere
A ses faons sanz demorance.
Or penst Diex de la delivrance.
Renart regarde en la gaudine
Et voit le Roi et la Roïne,
Tant baron voit et tantes bestes,
Li bois fremist conme tempestes.
Entr’aus parolent de Renart,
Mès mot ne sevent de Coart
Que il enmaine en sa prison
Tot autresi conme larron.
Renart a pris as mains la Croiz,
Si lor escrie à haute voiz :
Danz Roiz, tenez vostre drapel,
Que Diex confonde le musel
Qui m’enconbra de ceste frepe
Et du bordon et de l’escherpe !
Son cul en tert voiant les bestes,
Puis si lor giete sor les testes.
En haut parole et dist au Roi,
Sire, dist-il, entent à moi :
Saluz te mande Noradins
Par moi qui sui bons pelerins,
Si te criément li paien tuit,
A pou que chascuns ne s’en fuit.
Tant lor a dit gaz et lanciez
Que Dant Coart s’est delaciez,
Et sist sor un cheval corant,
Si fist un saut moult avenant
Ainz que Renart se regardast,
Ne que il garde s’en donast.
Fu Coars moult près de la Cort,
O son cheval qui moult bien cort
Les costez a toz pertuisïez,
Que li bordons i fu fichiez,
Et la pel des piez et des mains
A rompue, n’est mie sains.
Tant s’est penez et traveilliez
Q’as piez lou Roi s’est avanciez,
Si li conte la déablie :
Sire, fet-il, por Dex aïe !
Diex ! fet li Rois, con sui traïz
Et afolez et mal-bailliz
De Renart qui si poi me crient !
Or sai bien q’à mavès me tient :
Seignor, fet-il, or après tuit,
Que ge le voi où il s’enfuit :
Par le cuer bé s’il vos estort,
Vos estes tuit pendu u mort,
Et cil de vos qui le prendra,
Toz ses lignages frans sera.
Qui dont véist Dant Ysengrin
Et le Moton sire Belin,
Et Brun l’Ors et Tybers li Chaz,
Et mon seignor Pelé li Raz,
Et Chantecler et Dame Pinte
Si con el vint à Cort soi quinte,
Et seignor Ferrant le Roncin
Et Dant Roonel le mastin,
Et seignor Blanchart le Chevrel,
Et Dant Tiécelin li Corbel ;
Frobert le siut li Gresillons
Et Petit-porchaz le Fuirons.
Après le sieut sire Baucent
Le Sengler as agues denz :
Bruianz li Tors toz esragiez
Et Brichemers toz eslessiez.
Li Limaçons porte l’enseigne,
Bien les conduit par la campaigne.
Renart regarde arere soi,
Et voit qu’il viegne sanz deloi,
Et vit Tardif qui les chadele,
Et vit l’enseigne qui ventele ;
Ne set conseil que fere doie,
Un saut a fet fors de la voie,
Entrez s’en est en une croute,
Après le sieut tote la route.
Li autre point ne s’aséurent,
Moult le menacent tuit et jurent
Que nel’ pot garir plesséiz,
Mur, ne fossé ne rolléiz,
Ne forteresce, ne donjons,
Tors, ne tesniere, ne boissons
Que il ne soit pris et renduz
Au Roi, et qu’il ne soit penduz.
Renart vit qu’il ne pot durer
Ne por foïr ne por aler ;
La boche li vet escumant,
Et il le vont si près sivant,
Si li poilent son peliçon
Q’en haut en volent li flocon,
Si li pertuisent toz les rains,
A poi ne chiet entre lor mains.
Moult le tiegnent en fiere trape,
Merveilles est s’il en eschape :
Por qant tant s’estoit esloigniez
C’à Malpertuis s’est adreciez,
Son fort chastel et sa meson,
Sa forteresce, son donjon,
Où il ne crient ost ne asaut.
Or qui mès velt aler, si aut,
Hui mès li est poi de manace,
Qui amer nel’ velt, si le hace.
Sa fame à l’encontre li vient
Qui moult le dote et moult le crient.
Troi filz avoit la dame franche,
C’est Perce-haie et Male-branche,
Et li tierz ot à non Roviax,
Ce est des autres li plus biax.
Trestuit li vienent environ,
Si le prenent par le giron
Et virent les plaies qui saignent,
Moult le dolosent, moult le plaignent ;
Totes li lavent de blanc vin ;
Puis l’asistrent sor un cossin :
Li disner fu apareilliez
Tant estoit laz et traveilliez
Qu’il ne manja que le braon
D’une geline et le crespon.
La dame le fist bien baignier
Et puis ventoser et saignier
Tant qu’il refut en la santé
Où il avoit devant esté.
Mi sire Noble l’Emperere
Vint au chastel où Renart ere,
Et vit moult fort le plesséiz,
Les murs, les tors, les rolléiz,
Les forteresces, les donjons,
Si haut n’i tressist uns bozons.
Vit les trenchées et les murs
Fors et espès et haus et durs ;
Vit les qarniax desus la crote
Par où l’en entroit en la voute ;
Garda, si vit levé le pont
Et la chaéne contremont.
Li chastiax sist sor une roche,
Li Rois tant con il puet l’aproche,
Devant la porte à pié descent
Et li barnages ensement.
Au chastel vienent environ,
Chascuns i tent son paveillon,
Et herbergent de totes parz.
Or puet avoir poor Renarz,
Mès par asaut n’iert jà conquis,
Ne par force ne sera pris ;
Se traïz n’est ou afamez,
Jà ne sera par host grevez.
Renarz fu bien en sa vigor,
Montez en est en son la tor,
Si vit Hersent et Ysengrin
Qui logiez sont desoz un pin :
A haute voiz lor escria,
Sire compaing, et que i a ?
Que vos semble de mon chastel ?
Véiste-vos onques si bel ?
Dame Hersent, comment qu’il prenge,
Je vos ai folé la vendenge,
Et ne me chaut s’iriez en est
Li cous qui vos conroie et pest.
Et vos, sire Tybert li Chaz.
Que je fis chaoir enz es laz,
Ainz qu’isissiez de la prison,
Éustes-vos tel livroison ?
Je cuit que tiez cent cous éustes
Où vin ne eve ne béustes.
Et vos, mi sire Brun li Ors,
Ge vos fis jà prendre tel tors,
Qant vosistes le miel mengier,
Je vos i fis bien laidangier ;
Vos i lessastes les oreilles
Si que tuit virent ces merveilles.
Et vos, mi sire Chantecler,
Je vos fis jà moult cler chanter,
Que par cele gorge vos ting,
Vos m’eschapates par engin.
Et vos, Dant Brichemer li Cers,
Je vos vi jà chéu envers,
Par mon engin et par mon los
Perdites de la pel del dos
Trois coroies que chien vos firent ;
Moult a ci de cels qui le virent.
Et vos, sire Pelez li Raz,
Je vos fis ja chaoir es laz
Qant vos alastes mengier l’orge,
Bien vos estraintrent cele gorge.
Et vos, mi sire Tiécelin,
Et à vos di-ge, Dant Belin,
Je vos fis jà mon ju poïr,
Se bien ne séussiez foïr,
Vos i laississiez vostre gaje,
Qant je vos toli le formaje
Que je menjai à moult grant joie
Por ce que mestier en avoie.
Et vos, Rousiax li Escuireus,
Je vos fis jà de moult grant deus
Qant je vos dis qu’estoit jurée
La pès et bien aséurée ;
Du chesne vos fis-je descendre,
Ice vos quidai-ge bien vendre,
Par la coue vos ting as denz,
Moult fustes tristres et dolenz.
Qu’iroie-je fesant lonc conte ?
N’i a celui n’aie fet honte ;
Encor en cuit-je fere assez
Ainz que cist mois soit trespassez,
Qar j’ai l’anel en ma sesine
Que me dona ier la Roïne.
Bien sachiez tuit, se Renart vit,
Tel le conperra qu’ainz nel’ vit.
Renart, Renart, dist li Lions,
Moult par est fors vostre mesons ;
Mès n’est si fors ne l’aie asise,
N’en tornerai, si sera prise :
D’une rien bien vos aséur,
A mon vivant le siege jur,
Ne por pluie, ne por orage,
N’en tornerai en mon aage,
Ainçois ert le chastiax renduz
Et vos par la gule penduz.
Sire, sire, ce dist Renart,
Ainsi esmaie-l’en coart ;
Mès ainçois qu’il vos soit renduz
Vos sera-il moult chier venduz,
Qar j’ai çaiens asez vitaille,
Ne cuit devant set anz me faille :
J’ai assez capons et gelines,
Et assez bestes aumelines,
Grosses brebiz et crasses vaches,
Si a assez oés et formaches ;
En cest chastel est la fontaine
Qui assez est et clere et saine,
Et d’une rien me puis vanter,
Ne set tant plovoir ne venter,
Se l’eve del ciel chaoit tote,
Que jà céanz n’en charoit gote
Cest chastiax est si bien garnis,
Jà par force ne sera pris.
Or vos séez, je m’en irai,
Traveilliez sui, si mengerai
Avec ma fame la cortoise,
Se jéunez pas ne m’en poise.
A icest mot si s’en avale,
Par un guichet entre en la sale.
La nuit se dorment cil de l’ost,
Et lendemain se lievent tost ;
Ses barons fait li Rois venir,
Or tost, fet-il, del asaillir
Nos estovroit apareillier,
Qar cel larron voil desrochier.
A icest mot s’eslessent tuit,
Au chastel vienent à un bruit ;
Li asaus fu moult merveilleus,
Onc ne vi nus si perilleus :
Dès le matin dusqu’à la nuit
Ne finerent d’asaillir tuit.
La nuit les a fait departir,
Vont-s’en, si laissent l’asaillir,
Et lendemain après mengier
Reconmencerent lor mestier :
Onc nel’ porent de tant grever
Que pierre en poïssent oster.
Bien i fu demi an li Rois,
Renart n’i pert vaillant uns pois ;
Onques ne finerent un jor
Que n’asaillissent à la tor,
Mès ne la porent enpirer
Dont el vausist mains un denier.
Un soir furent moult traveilliez
Et d’asaillir moult anuiez,
Chascuns dormi séurement
En sa loge moult longuement,
Et la Roïne fu irée
Et vers le Roi moult corocée,
Si vet couchier à une part :
Atant es-vos venir Renart
De son chastel moult coiement,
Voit les dormir séurement,
Gisoit chascun desoz un chesne,
On fou, on tremble, on charme, on fresne.
Renart a bien chascun lié
Ou par la coue ou par le pié ;
Moult par a fet grant déablie,
A chascun arbre le suen lie,
Neis li Rois lia par la coue,
Grant merveille ert s’ele desnoue.
Puis s’en torne par la Roïne
Là où ele gisoit sovine,
Entre les janbes li entra.
Cele de lui ne se garda,
Ainz cuida que ce fust li ber,
Q’à lui se vosist acorder.
Or poez oïr grant merveille,
Il li fist et ele s’esveille ;
Qant vit que Renart l’ot traïe
Si s’escria tote esbahie,
Et jà estoit l’aube crevée,
Li jor grant et la matinée.
Por le cri sont tuit estormi
Cil qui estoient endormi :
De Renart le rous s’esbahirent
Qant avec lor Dame virent,
Et por ce que il li fesoit
Tel gieu qui pas ne li plesoit,
Tuit escrient, levez, levez,
Et cel privé laron pernez.
Mès sires Nobles en piez saut,
Et sache et tire et riens ne vaut ;
Par pou la coue n’a rompue,
Grant demi pié l’a estendue.
Et li autre sachent et tirent,
Par pou li cul ne lor descirent ;
Mès Dant Tardif li Limaçon,
Qui seut porter le gonfanon,
Oblia Renart à lier.
Cil cort les autres deslier,
Tret l’espée, si les desnoe,
A chascun trenche ou pié ou coue :
Del desloier s’est si hastez
Que il est durement lassez.
Ainz que tuit soient desnoes
Sont li plusor tuit escoez.
Envers Renart s’adrescent tuit
Si cum il puéent à grant bruit,
Et qant Renart les vit venir
Si s’apareille de foïr.
A ce qu’il entre en sa tesniere
Tardif le saisi par derriere,
Par l’un des piez arriers le tire,
Moult se contint bien conme sire.
Atant i vint li Rois poingnant
Et tuit li autre esperonant,
Et Dant Tardif qui Renart tient,
Au Roi le rent qui devant vient ;
De totes parz le prenent tuit,
Tote l’ost en fremist et bruit ;
Si l’ont batu et descirez,
Or est en male trape entrez.
Estes-vos que Renart fu pris,
Moult en sont lié cil du païs ;
As forches le meine-on por pendre,
Li Rois n’en volt raençon prendre.
Sire, dist Ysengnin au Roi,
Por l’amor Deu bailliez le moi ;
Et j’en prendrai si grant venjance
Qu’en le saura par tote France.
Li Rois n’en velt fere noiient,
De ce sont tuit lié et joiant.
Les elz a fait Renart bender,
Li Rois li prist à demander :
Renart, Renart, dist li Lions,
Ci voi de tiex escorpions
Qui vos vendront encui l’otrage
Que fet avez en vostre aage,
Et le deduit de la Roïne
Que tenistes anuit sovine :
De moi honir vos vi tot prest,
Mès or sai bien conment il est.
Or vos metron el col la hart,
Puis parleron d’autre Bernart.
Lors Ysengrin en piez se drece,
S’aert Renart par la chevesce,
Dou poing li done tel bufet
Del cul li fait saillir un pet.
Et Brun l’aert par le chaignon,[14]
Les denz li met dusqu’au braon ;
Et Rooniax parmi la gorge
Trois tors li fet fere en un orge.
Tybert li Chaz giete les denz
Et les ongles qu’il ot poingnanz,
Saisist Renart au peliçon,
Bien li valut une friçon.
Tardif qui porte la baniere,
Li a donné une cropiere.
Tant véissiez bestes venir,
Li tierz n’i povoit avenir ;
Tant en i vient parmi la rue,
Qui n’i puet avenir s’i rue.
Dant Renart qui le mont engigne,
Fiert mainte beste et hacepigne,
Ne set soz ciel que fere doie,
Moult crient que morir ne se voie :
Renart n’i avoit nul ami,
Tuit li estoient anemi.
Bien savez tuit certainement
Ceste parole apertement,
Que puis que hom est entrepris
Et par force liez et pris,
Bien puet l’en véoir au besoing
Qui l’aime et qui de lui a soing.
Port Dant Renart que l’en devoure
Ploure Grinbert et prie et oure :
Ses parenz ert et ses amis,
Liez le voit et entrepris,
Ne set conment il le reqoe,
Que la force n’est mie soe.
Pelez li Raz s’est avanciez,
Encontre Renart s’est lanciez,
Entre les piez chet en[15] la fole,
Renart l’aert parmi la gole,
Entre ses denz si le destraint
Morir l’estut, si le contraint :
Onques nus d’els ne l’en garda
Ne nel’ vit, ne nel’ regarda.
Madame Fiere l’orgueilleuse
Qui moult est prous et merveilleuse,
S’en est fors de sa tente issue,
De duel fremist tote et tressue,
Que por Renart, que por l’anui
Que l’en li a fait si grant hui.
Del don del anel se repent,
Qar moult set bien q’à l’ueil li pent,
Qu’ele en aura contrere assez
Qant cist aferes ert passez ;
Mès n’en velt fere nul senblant.
Son petit pas s’en va avant,
Devant Grinbert s’est arestée,
A lui parla conme senée.
Sire Grinbert, dist la Roïne,
Mar vit Renart son fol convine
Et sa folie et son otrage,
Hui en reçoit moult grant damage :
Je vos aport ici un brief,
Nus n’a poor de mort si grief,
Se l’avoit par bone créance,
Que jà de mort éust dotance ;
Se Dant Renart l’avoit sor lui
Ne doteroit la mort mès hui,
Ne por droiture ne por tort
N’auroit mès hui péor de mort.
Dites de par moi le reçoive
Basset que nus s’en aperçoive,
Que grant pitié m’en prent de lui,
Gardez nel’ dites à nului.
Je nel di pas por lecherie,
Si me doint dex bone escherie,
Mès por ce qu’est bien afaitiez
Me poise qu’il est deshaitiez ;
Moult me poise de son contraire,
Qar moult est franc et debonaire.
Grinbert respont, Dame honorée,
Franche Roïne coronée,
Cil qui haut siet et de loing mire,
Et de toz biens est rois et sire,
Qui t’a mis en si grant honor,
Icil te gart de deshonor ;
Car s’il en puet estordre vis
Encor sera moult vostre amis.
A icest mot le brief li tent,
Et Grinbert volentiers le prent,
Et la Roïne li conseille
Moult privéement en l’oreille
Que qant Renart ert eschapez
De ce dont il est entrapez,
Que il ne lest en nule guise,
Por l’amor qu’il li a pramise,
Que il à li parler ne voise
Privéement et tot sanz noise.
A icest mot se departirent :
Si anemi Renart mar virent,
La hart li ont jà el col mise,
Jà fust moult près de son joïse
Qant Grinbert ses cosins i vient
Et voit Renart qu’Ysengrin tient.
Trere le velt as forces sus,
Li autre se sont tret en sus :
Dant Grinbert parla hautement
Oiant trestoz et sagement :
Renart, sanz nule autre devise,
Hui estes venuz à joïse,
Par ci vos en covient passer,
Or vos déussiez confesser
Et fere lez à vos enfanz
Dont vos avez trois biax et janz.
Vos dites bien, ce dist Renart,
Bien est droiz qu’il aient lor part :
Mon chastel ert mon fil l’ainz né
Qui jà n’iert pris par home né ;
Mes tors, mes autres forteresces
Lerai ma fame as cortes tresces ;
A mon filz l’autre Percehaie
Lerai l’essart Robert Fressaie
Où il a tant soriz et raz,
Il n’en a tant jusqu’à Arraz ;
Et à mon petit filz Rousel
Lairai l’essart Martin Lovel
Et le cortil deriers la granche
Où a mainte jeline blanche ;
Assez i trovera vitaille,
Ne cuit jusqu’à un an i faille,
De ce se puet-il bien garir.
Ne lor sai plus que departir,
Einsi lor devis-ge lor lais
Que ici devant toz lor lais.
Près est, dist Grinbert, vostre fins,
Et ge qui sui vostre cosins
De vostre avoir aucune rien
Me relaissiez, si ferez bien
Et si ferez moult grant savoir.
Renart respont, vos dites voir,
Et se ma fame se marie,
Foi que je doi Sainte Marie,
Tolez li quanque je li lès
Et si tenez ma terre en pès,
Qar moult m’aura tost oblié
Puis que me saura devié ;
Ainz que Tibaut soit crestiens[16]
En metra un en ses liens :
Qar qant li hons gist en la biere,
Sa fame esgarde par deriere.
S’ele voit home à son plaisir ;
Ne puet pas son voloir taisir,
Con plus se pasme et vet tremblant,
Qu’il ne li face aucun semblant.
Tot autretel fera la moie,
Jusqu’au tiers jors r’aura sa joie.
S’à mon seignor le Roi plesoit
Et une chose me fesoit
Qu’il vousist que je fusse moines,
Hermites, reclus ou chanoines,
Et me lessast vestir la haire,
Certes ce li devroit moult plaire :
C’est mortel siecle et ceste vie
Voil lessier, plus n’en ai envie.
Dist Ysengrin, cuiverz traïtres,
Et qu’est ore ce que vos dites ?
Tante guenche nos avez faite,
Quel treslue nos avez traite !
En vos auroit bele persone
S’aviez vestue la gone.
Jà Diex ne doinst le Roi honor
S’il ne vos pent à desonor,
Et s’il ne vos en aséure,
Qar la hart est vostre droiture :
Qui de mort vos respiteroit,
Jamès mes cuers ne l’ameroit ;
Qar qui larron de pendre areste,
Toz jors het mès lui et sa jeste.
Ce dist Renart, sire Ysengrin,
Or seront vostre li chemin ;
Encor est Die là où il selt,
Que tex ne peche qui s’en delt.[17]
Ce dist li Rois, pensez del pendre
Que je ne voil mès plus atendre ;
Jà fust penduz qui que s’en plaingne
Qant li Rois garde aval la plaingne
Et voit une grant chevauchie
Où mainte dame avoit irie :
Si iert la dame Dant Renart
Qui vint poingnant tot un essart.
Moult par venoit hastivement
Merveilleus duel demenant,
Et si troi filz ne s’atardoient,
Avec li grant duel demenoient :
Lor chevox ronpent et descirent,
Lor poins destordent et detirent ;
Tel noise font et tel criée
Qu’en les oïst d’une lieuée.
Ne vienent pas trop belement,
Ainz chevauchent isnelement :
Un somier tot chargié d’avoir
Ameinent por Renart avoir.
Ançois qu’il ait dit sa confesse
Ont-il derompue la presse,
Qu’il venoient par grant desroi,
Et chéu sont as piez le Roi.
La Dame s’est tant avancie
Que par devant toz s’est lancie :
Sire, merci de mon seignor
Por amor Dieu le créator !
Ge te donrai tot cest avoir
Se de lui veus merci avoir.
Rois Nobles choisi le tresor
Qu’est devant li d’argent et d’or ;
Del’ avoir fu moult covoitos,
Et dist, Dame, foi que doi vos,
Renart n’a pas vers moi bon plet,
Q’à mes omes a trop meffet
Qu’en ne le vos porroit retrere,
Por ce en doit-on vengance fere ;
Qant de son meffet ne s’amende,
Bien a deservi qu’en le pende :
Ce me dient tuit mi baron
Q’as forces pende le laron,
Et por voir se je ne lor ment,
Par ceus ert livrez à torment.
Sire, por Dieu en cui tu croiz,
Pardone li à ceste foiz.
Li Rois respont, en Dieu amor
Por vos li pardoing à cest tor,
Et dist, par tel vos ert renduz
Qu’au premier mesfait ert penduz.
Sire, fet-ele, je l’otroi,
Jà n’en sera requis par moi.
Atant le firent desbender,
Li Rois le fist à lui aler,
Et il i vient joianz et liez,
Les menuz sauz toz eslessiez ;
Renart, fet-il, gardez-vos mès,
De ci avez-vos ore pès ;
Mès qant vos remefferez primes
Vos revendrez à ce méismes.
Sire, fet-il, Diex m’en desfende
Que je jà face qu’en me pende.
Grant joie fet à sa mesnie
Qui devant li ert esmaïe ;
Celui bese et cestui enbrace,
Ne vit mès hui riens tant li place.
Qant Ysengrin le vit delivre,
Lors vosist miex morir que vivre ;
Grant péor ont trestuit de lui
Qu’il ne lor face encore anui :
Si fera-il se Diex li done
Que il voie vespres ou none.
Torner s’en voldrent par deriere
Qant li Rois vit par la chariere
Et vit venir par une adresce
Une biere chevaleresce :
Ce estoit Chauve la Soriz
Et Pelez li Raz ses mariz
Que Dant Renart ot estranglé
Qant desoz lui l’ont enanglé.
En la compaigne Dame Chauve
Estoit sa suer ma Dame Fauve
Et diz que freres que serors ;
Au Roi vienent à granz c1amors
Que fil que filles bien quarante,
D’autres cosins plus de sesante.
De la noise que il menoient
Trestos einsi con il venoient,
Trestos li airs retentissoit
Et toz li cielz en fremissoit.
Li Rois se tret un poi sor destre
Por savoir que ce pooit estre ;
Entent le cri, entent la noise,
Or n’a talent que il s’en voise.
Qant Renart ot le duel venir,
De poor conmence à fremir ;
Sa fame a envoié ariere,
Tel poor a de cele biere
Et sa mesnie et ses enfanz,
Mès il remest li soduianz.
Moult coiement issent de l’ost,
A lor chastel en vienent tost :
Renart remaint en aventure.
La biere vient grant aléure ;
Ma Dame Chauve ront la presse,
Où voit le Roi, vers lui s’eslesse,
Si li crie merci en haut ;
A terre chiet, li cuers li faut.
La biere chiet de l’autre part ;
Trestuit se claiment de Renart
Et font une noise si grant
Qu’en n’i oïst pas Dieu tonant,
Et li Rois velt Renart reprendre,
Mès il ne le velt mie atendre,
Ainz s’en foï, si fist que sages,
Que près li estoit ses damages ;
N’avoit que fere de lonc conte.
Desor un grant chesne s’en monte,
Après vont trestuit arouté,
Soz le chesne sont aresté.
Le sege metent environ,
N’en descendra se par eus non.
Li Rois i vient, si li conmande
Qu’il aille jus et si se rende.
Sire, ce ne feré-je mie
Se vos barnages ne m’afie
Et vos ne m’en livrez ostages
Que ne m’en sordra nus damages,
Car je voi moult, ce m’est avis,
Entor moi de mes anemis :
Se chascun me tenoit à plain
Il me donroit tot el que pain.
Or vos tenez là jus tuit coi,
Contez d’Auchier et de Lanfroi,
Qui set noveles, si les cont,
Ge l’orai bien de ça amont.
Li Rois oï gaber Renart,
De maltalent fremist et art :
Deus coingnies fist aporter,
Le chesne prenent à coper.
Renart a grant poor éue
Qant iceste chose a véue ;
Les barons voit toz arengiez,
Chascun atent qu’il soit vengiez ;
Ne set conment s’en puisse aler.
Un poi se prent à avaler,
En son poing tint une grant roche,
Voit Ysengrin qui si s’aproche,
Oiés con il fist grant merveille
Li Rois en fiert delez l’oreille :
Por cent mars d’or ne se tenist
Li Rois q’à terre ne chaïst.
Trestuit li baron i aqueurent
Et entre lor bras le sequeurent :
Endementres qu’il entendoient
A lor seignor que il tenoient,
Renart saut jus, si torne en fuie,
Et neporqant chascun le huie,
Et dient tuit si con il sont,
Que jamès ne l’enchauceront,
Que ce n’est pas chose avenable,
Ainz est un rain à vif déable.
Or est remès l’enchaucéiz,
Renart va vers uns plaiséiz.
Li Rois enportent si baron
Droit el palais en sa meson ;
Huit jors se fist li Rois baingnier
Et ventouser et aaisier,
Tant qu’il revint en la santé
Où il avoit devant esté ;
Et Renart einsi s’en eschape,
Dès or gart bien chascun sa chape.
- ↑ Al. Orgoil.
- ↑ Al. Thimers.
- ↑ Dans le manuscrit où se trouvent les vingt-deux vers de cet alinéa, l’âne est appelé Thimers ou Bernart l’Arceprestre.
- ↑ Al. Li concile.
- ↑ Al. Abonir.
- ↑ Al. Et une éle fors del cors trete.
- ↑ Al. Du Plessié.
- ↑ Voir l’errata
- ↑ Al. Li quens del Anglée.
- ↑ Al. Qui esposa noire Cornille.
- ↑ Al. Fret.
- ↑ Al. A tort.
- ↑ Variante tirée du manuscrit de Cangé :
Et Bruns qui son vis avoit ters,
Et Sire Brichemers li Cers,
Martins li Chevriaus et Bruianz
Li Tors et li Mulez Muianz.
Qant li Conciles fu ensanble
Renart li Rous fremist et tranble ;
Bien set que sa mort est jurée,
Ne puet mès estre destorbée.
Or vodroit estre à Maupertuis,
Si fermeroit moult bien son huis :
S’encor i venoit Dant Grinbert
Et Bruns li Ors et Dant Tibert,
Et sire Nobles li Lions,
S’éust o lui toz ses barons,
Nou trairoient de la tainiere,
Tant est la terre fort et fiere ;
Mès or est Renart pris au laz,
Et set bien ce n’est mie à gaz :
Bien set ne se puet or deffandre,
A male hart le feront pandre.
Or sont asanblé li baron,
Si parleront dou mal laron,
Or escoutez de Dant Belin
Qui n’ama onques Isangrin,
Qar il le volt l’autrier mengier
Et se vorra de lui vangier.
Isengrin, trop estes jalous,
Et quoi ! se Renart vos fist cous,
Ce fist-il por le vostre bien :
Se vos assailloient li chien
Et venissiez à un fousé
Auques parfont et auques lé,
En istriez-vos sanz dolor ?
Ne porriez avoir paor ?
Savez c’on dist au cous mauvès
S’il vient à pont qui soit deffez,
Passez outre, se vos chaez,
Saiez séur vos floterez.
A icest mot Belin se taist,
Sa parole mie ne plaist
A ceus qui haïssent Renart,
Por ce qu’il sot trop de barat.
Bruienz parla qui fu haitiez,
Que sor Belin fu moult iriez :
Sire Belin, laissiez ester,
Nos n’avons soing de ramponer.
Je quit Renart vos a loé
Et de son miel vos a doné ;
Mès par la foi que je vos doi,
Je mie cest plait je n’otroi,
Se Renart n’est encui panduz,
Dont li serez-vos bons escuz.
Seignor, quar dites environ,
Que ferons-nos dou mau laron,
Dou puent roux, dou sodoiant
Qui toz jors nos va conchiant ?
Brichemer a parlé après
Qui de parler fu moult engrès :
Entendez tuit, fait-il, à moi,
Je vos conmant de par le Roi
Que Renart soit enuit deffaiz :
Aus barons plaist icest plaiz.
Entor sont li baron venu,
S’ont Renart pris et retenu,
Tuit escrient, or à la hart !
Que pendromes jà Renart,
Que ses baras ne l’en guerra,
Jà vis de ci n’eschapera.
Li Conciles fu asanblez,
Et Renart ot les iauz bandez.
Or l’enmainent as forches pandre,
Ha las ! qui ne se puet deffandre :
Moult volentiers s’en eschapast
Et à Malpertuis s’en alast
Et fust en sa meson aaise,
Mais il ne puet que Dieu ne plaise.
Or est Renart pris et liez,
Dex ! com Ysengrin en est liez,
Et Pinte et Chantecler li Cos,
Qar or cuident estre en repos !
Mès se de ci pooit garir
Il les feroit encor saillir.
Tiex en gerroit geule baée
Qui or a la teste levée,
Qui seroit dolanz sor la sele :
Tiex nel’ prise or une cenele,
Se de ci pooit eschaper,
Il les feroit encor plorer.
Moult est Grinbert en grant martire,
Por son cosin plore et soupire ;
Or vait ester devant le Roi,
Sire, je vos plevi ma foi,
Si vos donroi bone aliene
Renart ne vos fera pesance
Ne nul home jor de sa vie,
S’eschaper puet ceste foïe ;
Por Dieu si esgardez en son,
Aiez merci de vo baron :
S’il est panduz, sachiez de fi
Tuit si parent ierent honi ;
Avillié en seront toz dis,
Mès se il en eschape vis,
Je li ferai pane la Croiz :
Je vos en pri à haute voiz,
Fait Grinbert, que vos li doingniez.
Adonc li ostroia li Rois.
Lors le fist li Rois amener,
En son estant le fist lever,
Aï, fait-il, rous deputaire,
Tant par ies or de mal afaire
Et si es male criature,
Certes en toi peche nature
Qant tu ne puez à bien entendre,
Filz à putain dines de pandre.
Devant le Roi fu en estant
Renart, si dist en soupirant :
Ha ! gentis Rois, por Dieu merci,
Tenez ma foi je vos afi
Jamès clamor n’orez de moi,
Jel’ vos promet en bone foi
Par toz les Sainz de Belléent.
Se mès en oi ne tant ne qant,
Sachiez le bien sanz demorance
Panduz seras à une branche.
Renart l’antant, grant joie en a,
Aus piez le Roi chéoir ala ;
Li Rois l’en aïde à lever.
La Croiz conmence à porter,
Dant Bruns li Ors li a portée,
En s’espaule li a fermée.
Qant Renart etc. - ↑ Al. Talon.
- ↑ Voir l’errata
- ↑ Al. Ançois que li anz soit moiens.
- ↑ Al. Car tel en peche qui enqueurt.