Le Roman du Renart, supplément, 1835/3
Renars mestres de l’Ostel le Roy.
Lors venîmes en une lande,
N’ot plus bele jusqu’en Yrlande ;
Là trouvasmes grant assamblée
Qui n’estoit pas faite à emblée ;
Car Nobles li Lyons li Rois
I ert venus à grans conrois ;
Si ot fet ses barons mander
Par son royaume et conmander
Sur les fiés que de lui tenoient ;
Pour ce de toutes pars venoient :
S’estoient jà les tables mises
Et les mesnies entremises
D’appareillier tout leur service,
Chascuns selonc le sien office.
Là fu Renars tout premerains,
Qui de l’ostel ert souverains
Et mestres de l’ostel le Roy ;
Establi ot tout le conroy
Et les offices devisés,
Car Renars est bien avisés
D’amis par engien recouvrer ;
Bien sot de son mestier ouvrer,
Car tout belement et à trait
Ot si le Roi viers lui atrait,
Que il ne féist riens sans lui :
Il n’avoit en la Court nului
Se Renars contre cuer l’éust,
Si tost que li Rois le séust,
De sa Court ne féist widier ;
Et cui Renars volsist aidier,
Tantost ot faite sa besoigne ;
Ne l’en convenoit avoir soigne.
Ses deus filz ot bien assenés
Renars, qui les ot ordenés :
Renardiaus jacobins estoit
Li aisnés, et noirs dras vestoit,
Si estoit grans mestres de lois ;
Et Roussiaus estoit cordelois,
Devant le Roi chantoit la messe,
Et s’aloit à lui à confesse ;
Chamberlenc avoit fet Martin
Le Singe, qui soir et matin
Le Roy en sa chambre servoit ;
Par poi que li Roys ne dervoit
Quant de sa chambre estoit issus,
Et il estoit de lui en sus ;
A Ysengrin avoit pès faite,
Et l’amoit d’amour si parfaite,
Ce dist, que mais n’ara descort
A lui, mès pès et bon acort ;
Fait l’ot en la Court si seignor
Qu’après lui n’i avoit greignor,
Qu’il ert baillieus et seneschaus ;
Et Grimbers estoit mareschaus
Li Taissons, si livroit l’avainne ;
Fet l’ot li Rois en la semainne.
Tibiers li Cas fu en saisine
D’estre grans queus en la cuisine ;
S’en avoit toudis del plus bel.
Et de Tesselin le Corbel
Avoit fet Renars panetier,
Et si l’amoit de cuer entier ;
De ce qu’il ert malicieus,
S’en ert à Court plus gracieus,
Car bien aprise ot sa lechon ;
Et de Tardieu le Lymeçon
Avoit fet mestre bouteillier :
Ce que Renars vot conseillier
Sot bien retenir et aprendre,
Ne l’en convendra point reprendre ;
De mainte autre grosse besoigne
Li ot Renars chargié le soigne.
Huissiers estoit dans Roeniaus
Li Mastins, qui estoit isniaus
A faire outrage et vilonnie,
Car plains ert de grant félonnie.
Et de l’ainsné fil Ysengrin,
Que l’en apele Malegrin,
Le mestre vallet fet avoit
Et de l’escuele servoit ;
Et ses autres frères Despiers,
Qui moult estoit fors et apiers,
Trenchoit par devant la Royne.
N’ot mès Renars point de hayne
A Ysengrin n’à son linage,
Car foy li dut par comparage.
A Monnequin le fil Martin
Le Singe, qui bien sot latin,
Et qui estoit clers courounés,
Estoit li offices dounés
D’escrire à Court, et de conter
Que li frait pooient monter.
Renars avoit mis un gris monne
A Court pour rechevoir l’aumonne,
C’est dant Espinart l’Yreçon ;
Pelet le Rat ot à garçon ;
Entr’eus deus l’aumône departent,
Bien puet estre que il y partent.
Renars, qui moult d’engien savoit,
Au Roy trois menestreus avoit
Pourchaciez pour lui solacier ;
Li uns n’ot guaires l’autre cier :
C’ert Martinés li filz Martin,
Et uns gouces filz le Mastin ;
Filz Tibiert le Cat fu li tiers,
Vers la cuisine volentiers
Près de son père se traioit,
Car bons morsiaus pas ne haioit.
Cil troi, ce vous ai en couvent,
Se descordoient moult souvent ;
De lor fais assés vous déisse
Se trop loing séjour n’i méisse.
Messagiers le Roi fu li Martres :
Cil portoit ses briés et ses Chartres ;
Bien savoit gistes et trespas ;
Enseignier ne li convint pas.
A Court n’ot point de Chantecler ;
Pour Renart n’i ozoit aler,
Cui li Rois ot donné un don
Que son linage en abandon
Li ot mis, qu’il en pooit prendre
A sa volenté sans mesprendre.
Encore ot Renars pourchacié
Que tuit erent de Court chacié
Cil qui devant estre y soloient ;
De la Court point ne se melloient
S’il ne lor estoit conmandé,
Pour plais où il fussent mandé,
Que li Rois tenist Court plenière.
Si avoit changié de manière
Renars par malice le Roi,
Qu’il dist c’onques plus n’ot arroy
A son ostel c’ore y avoit ;
Le couvenant moult mal savoit.
Quant Renars fu du Roy hays,
Si le haioit tous li pays ;
Et quant on voit qu’il est amés,
S’est sires et mestres clamés ;
Si l’ouneure teus et le clainme
Seignour qui en son cuer poi l’ainme,
Mès n’en ose faire autre chose,
Car nus de lui plaindre ne s’ose.
Renars ot fet tout atourner,
Ensi a fait l’aigue corner,
Et li Roys s’est assis à table,
A chiere lie et amistable ;
Et la Roïne sist deseure ;
Si fist li Roys séoir en l’eure
Renart deseur la Lyonnesse
Sa fame, yreuse et felonnesse ;
Mès Renars si bien la tenoit
Que tout ensement la menoit
C’on fait le petit enfançon ;
Chanter li fait une chançon
Dont li mot sont plaisant et court,
Pour plus aresbaudir la Court.
Li Rois hucha dame Hersent,
Et la vielle bien s’i assent ;
Lès le Roi s’assist coste à coste,
Et Renardiaus s’assist encoste ;
Par-dalès lui dame Emmeline
Sa mère ; onques ne vi beghine
Plus simplement se contenist,
Et nepourquant s’elle tenist
Grasse oie ou geline en anglée,
Elle l’éust tost estranglée.
Roussiaus ses filz séoit dalès :
Einsi en ot deus à ses lès.
Par-dessous séoit dame Berte
La Singesse, qui moult desperte
Et malicieuse ot esté.
Li mès furent tout apresté,
Qu’il n’i ot mès fors du mengier ;
Assez en orent sans dangier.
Autres tables assés y ot ;
Si s’i assist qui séoir pot.
A l’une ont fet séoir Brun l’Ours,
Si dient qu’il est vilz et lours ;
Dalez lui le Cherf Briquemer.
Le Sengler vit-on escumer
D’ardeur de ce que il veoit
Tel chose qu’il li desséoit,
Dont il li samble ce soit tors.
Li Chevaus et Bruians li Tors,
Et Belins li Moutons après
Sisent ; li Asnes lor fu près ;
Après séoit Coars li Lièvres,
Cui d’irour sont prises les fièvres.
Ne les vous puis pas tous nommer,
Car mon propos vuel assommer.
Ysengrins par l’ostel aloit,
Devisant quanque il voloit,
Martins li Singes ne sist pas,
Ains vait partout plus que le pas ;
Il vait à l’un faisant la moe,
Et l’autre reprent par la joe,
Par le toupet ou par l’oreille ;
Einsi li Singes s’apareille
A faire choses desguisées
Pour le Roi servir de risées ;
Puis revait le Roy à l’espale,
Puis chante, et puis espringe et bale,
Car il fu soutilz en son art ;
Puis vait conseillier à Renart ;
Lors revot saillir sur le Roy ;
Mès il fist un poi de desroy,
Car il hurta madame Fière :
N’ala pas si tost, ne le fière
La Royne, et vers lui le sache :
Desroute li éust la face
Ne fust li Rois qui li toli,
Et si s’en courecha à li ;
Mès elle s’en sot bien resqueure,
Qu’elle dist, se Diex la sequeure,
Qu’elle ne l’ot fet fors por gas.
Martins fu soutieux en maint cas,
Bien sot connoistre mousche en lait ;
Moult grant pièche le juer lait,
Et li Roys la Royne tenche,
Et Renars à chanter commenche
Et toute le Cours le respont.
Martins li Singes se repont,
S’emprunte à Espinart s’aumuce,
A la foys la teste hors muce,
Et au Roy la moe faisoit ;
Tout par malice se taisoit.
Quant Renars le chanter laissa,
Martins li Singes s’eslaissa,
Et saut sur Belin le Mouton,
Puis prent à chanter à haut ton ;
S’en risent tuit cil qui le virent.
Li siervant as tables servirent
Les aucuns bien et grandement
Et les autres recrandement
Menestrel de lor mestier œvrent ;
Et lor sens moustrent et descuevrent,
Dont il y ot des bons assés ;
Mès tous les autres a passés
Par moquerie Martinés :
Li Rois dist que c’est li plus nés
Et li plus plaisans quoi c’on die ;
Si ne sot de menestraudie
Fors tant qu’il sot bien heure et point
De moqueries faire à point.
Dist Entendemens : Biaus compains,
Moult est chier achatés li pains
C’on vient en ceste Court mengier,
Car pluseur l’ont à grant dangier.
N’avons que faire d’arrester ;
Ci ne poons riens conquester ;
On plaidera jà ci endroit,
Si fera-on du tort le droit.
Toute la Cours va par eus trois
Et li conseus le Roy, des trois
Ysengrin, Martin et Renart ;
Foy que je doi saint Liénart,
Nus jugemens n’i puet passer,
Tant s’en sache nus hom lasser,
Que l’un de ces trois n’i couviegne
Ains que jugemens avant viegne :
Lors dis c’est couvenans diviers.
J’ai oy de Renart les viers
Coument on le soloit hayr
Quant il souloit chascun trahir ;
Or le doutent grant et menour,
Et se li font feste et hounour.
Amis, dist-il, aujourd’ui court
Renars et règne en mainte court
De riche houme qui mal s’entent,
Qui à autrui conseil s’atent
Ou qui en autrui trop se fie ;
Einsi en avient mainte fie,
Et se teux chose en Court aucune
Avient, n’est pas partout commune ;
Mès en tous liex où tu vendras
Aucun samblant en trouveras ;
Petit t’en vodrai deviser,
Car legier est à aviser.
Malisce, barat, tricherie,
Sont en Renart ; et lécherie
A connoistre donne Ysengrins :
Ceus qui font ouvrir les escrins
Et raportent à Court l’argent
Qu’il prennent sus la povre gent,
Leu sont, car le pays desrobent.
Par le Singe, entent ceus qui lobent,
Qui font grans moes et grans chieres :
Teles gens a-on à Court chieres
Qui losengent et ostent busches.
N’i a nul cognoistre ne pusses
Se d’estudiier as talent :
De Tardieu qui sert à Court lent
Ne te ferai point de devise,
Mès se tu vués se t’i avise ;
De Roussel ne de Renardel,
Je t’en charge au col le fardel ;
Ne de Roenel qui l’uis garde,
A ta volenté y regarde,
Et as autres communément.
Connoistre pués certainement
Que Renars queurt partout le monde,
Tant come il dure à la reonde
A espandu sa renardie.
Renars va à chiere hardie
Partout, il ne doute mès homme ;
Il puet bien en la court de Roume
Assés plus qu’il ne fâche aillours :
Là est Renars o les meillours ;
Bien le set qui séjourne là.
De son conseil retenu l’a
Li Papes ; oy dire l’ai.
Au tans qui or ceurt, clerc et lai
Honneurent Renart et le croent ;
Je voi que petit s’en recroient.