Le Mespris de la vie et consolation contre la mort/« Comme le peché sale eust son entree au monde »
Le Mespris de la vie et consolation contre la mort
CLXX.
Comme le peché sale eust son entree au monde
Par la faute d'un homme, & de par le peché
Fust le trait de la mort contre nous descoché,
Qui renverse nos cors dans la fosse profonde.
Ainsi l'heureuse grace apres le crime abonde
Par un seul JESUS-CHRIST en la crois attasché,
Par les Juifs imprudens en la face craché
Dont au salut de tous la justice redonde.
Ne craignons plus la mort, nous sommes par l'esprit
Esclairé de la foy membres de JESUS-CHRIST,
Et nul ne meurs de ceus que le fils à du père.
Esperons donc en luy & soyons desormais
Enfans de charité, celuy ne meurt jamais
Qui par la foy en CHRIST entierement espere.