Alphonse Picard et Fils (p. 33).
◄  XXVII
XXIX  ►

XXVIII

Dieu trespiteux clément et misericors soyes benigne sur mes pechiez que iay faiz par le dyable ou par ma propre voulente, ne les réserve a examiner a ton jugement, maiz motroye sil te plaist grace pardonnance. Car se devant toy de mes coupes ie faiz comparaison avec les maulx et les punicions que tu me donnes, certes plus grant est le plus petit de mes pechiez que oncques mal que ie receusse, et par nul mal la mauvaise voulente de moy ne la dure teste ne se baisse ; la vie en douleur souspire, maiz par euvre ne devient meilleur ; se tu mates ie ne me corrigeray pas, se tu te venges ie ne dureray mie, se trop iay tribulations ie promet avenir a toy. Se tu trez le coutel ce que iay promis ie ne fais, se tu fiers ie crie que tu me pardonnes. Se tu pardonnes autrefois ie fais que tu me fieres, si tost a mes prières tu me pardonnes ie te moins prise ; se tu me baz aucune foys tantost que le mal est passe, plus ne men souvient ; ie vueil que tu me obeisses tantost, et se non, ie murmure contre toy et envers toy, ie ne tiens riens de tes commandemens.

He donc sire le coulpable pardonnes, car tu es trespiteux. Ie say bien sire que se tu ne pardonnes que droiturierement tu puniras ; maiz en toy est tres grant pitie et misericorde surhabondant ; de moy criant a toy sire ayes mercy de moy ; esmeuve ta tres-grant misericorde. La voix contricte et ploureuse et comme moy estre coulpable soit grant misere, soit a toy plus grant clemence de moy estre meschin a ton ayde humilie devant toy de mes crismes les maulx dire et les douleurs ; de toy misericorde ie atens le quel iay repelli pechant. Donne doncques pere trespiteux que ces choses que iay commises ie pleure par tout lespace du iour ou de la nuyt, et de touz mes maulx franc a ta souverainne pitie otroyes que ie te serve, redresce moy sire dieu et enseigne en ta misericorde, par tele maniere que de ioye et de salut et de paix me puisse devant toy esleescier.