Le Disciple de Pantagruel/1875/06
IL y eut une fois ung navire de Portugaltois qui deslacherent leur artillerie contre luy ; mais il en recepvoit les boulletz à la main, comme pelottes, et leur rcjectoit si rudement qu’il en effondra et rompit tout leur navire. Et pource qu’ilz sont fiers et qu’ilz se disent roys de la mer, par despit il print leur navire à belles dentz, et l’avalla toute entière sans mascher, avecq tout ce qui estoit dedans, dont il se trouva fort mal : car à ladicte navire il y avoit plus de cinq cens marmotz et autant de cynges qui luy saultoient dedans le ventre incessamment, de sorte qu’il pensoit avoir les avives. Au moyen dequoy fut contrainct de faire descendre son médecin c’est assavoir ledict housseur et ramonneur de cheminées, dedans son ventre avecq un fouet, lequel les luy fist sortir à grans coups de fouet par le trou de cul, dont les aulcuns se cachèrent à l’ombre du poil qui là estoit, puis en faisant une vesse les jecta tous en la mer.