◄ Laisse DXLVIII | Laisse DXLIX | Laisse DL ► |
— Por Mahomet », respont le Arabys,
« Se paisant ys, tun perlers est gentils ;
« Pietez en ai. Par qui engenoÿs
« Ne sais que soies, ne moi ny mes antys ;
« Je toi pardons se toy claimes chunquis.
« Huei toi donrai le tierz de mon paÿs
« Et ma serors, qu’est plus blanche que lys,
« Sarrionés, la fille Medelys :
« Plus noubles rois non vesty vair ni gris. »
Le duc l’entant, belemant s’an hoit ris.
En requoi dist : « Foi que doi saint Donis,
« Qui veult moilers havoir a suen devis,
« Passent la mers en ces reignes Perssys,
« Troup in avront, ja non ert si zaitis. »
Et pué ha dit au Païns : « Beaus amis,
« Tu hais paor, se je bien m’en avis :
« Ce est par droiture, cuntre qui tu is mis.
« Mais se tu is en tun cuers repantis,
« Dou dir qu’ais fait mens, et si le desdis.
« S’ensi non fais, de voirs le toy plevys,
« Ancué is mort, recreans et hounis. »
Le Turs l’oï, a pué non raige vis ;
Il en juroit ses Dex, Apollins et Jovis :
« Entre nos n’iert ja pais ni buens amis
« Tant que je t’aige a mes dos mains oncis. »
Lors soi mistrent anbesdos vis a vis,
Ceschuns certains de mortels chapleïs.