| ◄ Laisse DXCIII | Laisse DXCIV | Laisse DXCV ► |
Si chun il devoient dedans la porte entrer,
La poïsés oïr tant grailles resouner
E divers estrimant que je non sai nomer,
Henir cil palefroi et braire cil destrer.
Nuls home non poit l’autre oïr par aut perler.
Le rue furent plaine et charcés li souler
De dames, de poncelle, de vielz, de bazeler,
Soul por le chanpions veoir et remirer :
En icelu païs, de cinq cent ans enter
Non fu tels joie faite par un ome strancer.
Non la firent si grant li Grezois in la mer
Chant virent li cival dedans Troie entrer,
Que portoit in sun ventre tant Grezois civaler.
A le rice mason que Soudan fist douner
A Rolant et son fils allerent desmonter,
On aveit fait le roi le mangier aprester.
Chant furent in le salle, si funt l’eve doner.
Illuec fu le roïne et sue fille au vis cler,
Que allerent insanble le duc a inbracer ;
Et le duc le salue et recuit volunter.
Chant tuit furent lavés, le duc fet comander
Qu’il remansist la noise, li criz et li tenzer,
Char il velt au seoir li barons acoubler,
Que a pris en sun poing uns graaus a or mer.
Ja oïrois, segnor, a Rolant deviser
L’ancïene custume et l’usaige primer
Que ja souloient faire les antis dou manger.
Le jor fist le niés Karle cescun barons goster
Tot sols an un vaisel, entre dos un plater,
Que bien savons de voir que d’illuec in arer
Souloient sis et set insanble pasturer :
Ancor le funt ensi maint Tiois montener ;
Mais le jentil custume trova Rolant li ber,
Par quoi non devroit mal nuls vils ome parler ;
Et qui Rolant voldra en nule cort blasmer,
Ja non doit etre daigne de preudome loer.