| ◄ Laisse DXCII | Laisse DXCIII | Laisse DXCIV ► |
Quant asés sunt illuec deportés et joïs,
« Comant vos esta il », ce dit le roi, « mes fis ?
« Vos ont il bien servis li barons dou païs ?
« Chunbien avrons de gent envers nos enemis ?
— Mon segnor », dist Rolant, « li grant e li petis
« Nos ont grant honor fait, la votre grant mercis.
« De chant que comandames non trovames denis.
« Nos avons esleüs des choars les hardis :
« Cent mile chevalers, armés et bien asis,
« Tote foi qu’il vos ploit serunt a vos servis.
— Comant ? » respont le roi, qe vint inpaloïs,
« Non a je plus de gant ? Su je donc si pouvris ?
« Je m’en quidoie avoir par uns o cinque o sis.
« Donc m’ont il revelés li plus de mes noris ?
— Ce n’ont il pas, dan roi », ce respont le marquis,
« Ancois vos sunt il tuit et fëaus et amis,
« Mais je en ai les bons desevrez et eslis :
« Se je les pois avoir trestuit insenble mis,
« Si moi diroit le cuer, e senz nuls cuntredis,
« De pooir civaucer droitement a Paris.
« Qui cun tal cent mil home si bien intalentis
« Non soi quidast defandre jusque au jor dou juïs,
« Ni ardiroit de cunquere ce que Alisandre inpris.
« D’une rien, mon segnor, soiez seürs et fis ;
« Se Malquidant menoit de sa gent par uns dis
« Sor le tere de Perse, tuit serunt mort e pris.
« Je ne vos en di plus, mais ensi m’est a vis. »
Lor fu le roi de Perse de joie inchouloris ;
Voiant tuit li plusor, sun bras au cols li mis ;
Je l’avroit il baisé, se il non fust repris.
Lor cevauce insanble le droit zamins antis,
Tant qu’il entre in le ville desoz les arvoltis.