◄ Laisse DXCI | Laisse DXCII | Laisse DXCIII ► |
Hor s’an torne le duch arer a sun seignor ;
Mais ancois qu’il i fuise, atrova il plusor
Citez, o il recuit grant biens e grant honor
Et bien l’unt obeïs li grant et li menor :
Toute foi qu’il voudra arme et desarme lor ;
Il s’en vindront a Mech a servir l’Aumansor.
Dou tost torner se haste le noble pugneor,
Tant qu’il vint la cité dou faus pradizeor,
Par quoi li gardinals non le firent pastor.
Sanson motre Rolant le murs anceanor ;
Dont se sunt arestez davant un charefor
Et changerent lors dras de bons en plus millor.
La se poüst veoir tant de nobles ator ;
Mais Rolant et Sanson fu vestuz d’un collor
Que motre azur et or et ziete grant luor.
Ainz que il montasent cescuns sun misoudor,
Lor vint Soudan incuntre sor un mul anbleor ;
Ensenble o lui furent de ses barons la flor.
Chant il asenblerent, n’i ot ni duel ni plor,
Mais acuntance plaine de joie et de baudor.
Avant fu acolés Rolant por grant amor
Por le sire de Perse que le filz sa usor.
Por la joie dou duch et par le sun retor
Maint rices palefroi e maint muls anbleor.
De nacres et de tronpes ot si grant li tabor,
Senz le cris dou zanter de maint baordeor
Que avoient atendu lor baillis tot le jor,
Qu’il en bondist la tere une lieue d’entor.