| ◄ Laisse DCXLII | Laisse DCXLIII | Laisse DCXLIV ► |
Con grant devocion le duch le ciel encline,
Pues dist : « Ai ! saint splendor qi le monde inlumine,
« Ombleté, pïeté e charité divine,
« Largece pardurable, a qi cun toi chemine,
« Con splendor demostras en la Vergne roïne,
« Le jor qe tu l’ombras por la gient orfenine
« Que tote estoit danee en la paine inferine.
« Bien fu grant ombleté e pïeteus insine,
« Quant prendre te leisas a une gent frarine :
« Cil jor se leisa l’aigle seisir a la poucine.
« Pués fu il ta largeçe l’andeman sine fine,
« Que ton cors nos donas e ta vie terrine ;
« Por nostre amor fu tote ta blance car sanguine
« E ta santisme front coronee de spine.
« Senpre soit il loee ta dous graçe enterine
« E le nom de ta mer, qi est de tot bien racine,
« E totes les compagnes, trosqu’en la kerubine,
« Que m’ais, Syre, gari de la paor marine
« E menés jusque ci por mi la desertine.
« Je su bien ostalés, mais le cors m’endevine
« Qu’il sont mi dui compaing en esgaree strine.
« Feites, Sir, vestre graice d’aus prochaine e voixine,
« Si q’il n’aient poor deci qe a la matine. »