◄ Laisse DCXLIII | Laisse DCXLIV | Laisse DCXLV ► |
DCXLIV[1]
Mout bien oï dou serf la proiere li Sir
E bien la mis en uevre, cun je vos savrai dir,
Quant il fist un son angle complïemant tolir
La image Rolant et as deus revenir
Qi furent enz ou val, cescuns plens de sospir.
Li angle li salue, pués comançe a sorrir
E dit : « Segnor, anueit v’aconvient a dormir.
« Je ai poié le tertre e veü sans falir
« Qe deman verons Carles, son host e son enpir.
« Mais le soire est venue, n’acovient ja partir.
« Por Deu, ne vos soit grieu une nuet mal gesir ;
« Veez ci le erbe drue por les chevas fornir.
— Hei ! sire », dit Sanson, « ce feit bien a cherir.
« Une rien vos dirai, non mie por blandir,
« Qe la u vos fussés, nus hon poroit languir. »