◄ Laisse DCXXXIX | Laisse DCXL | Laisse DCXLI ► |
« Insi avech le hermite fui ben par quatorze ans
« Tant qe il fu portés en glorie parmanans ;
« Le cors ensevelli dedens cil sarcué blans.
« Desconfortés remis, paüreus e doulans,
« Quant une vois me dist : « Ja non soies doutans ;
« Serf, e non repartir a guise d’ignorans :
« Ce qu’avoit l’autre hermite, si l’avrais a tot tans :
« Une dimi pan d’orge e une pome oulans
« Avrais de jor en jor tant cun ieres vivans. »
« Bien le m’a maintenus le prometere sans ;
« Mais mout sui de Paien penés et travillans,
« Que, de qant avin ça, m’ont livrés grant ahans.
« Quant je mieus aoroie Damediex en lisans,
« Assalir me venoient li culvers mescreans :
« Un jor me bersoient ceans li fou ardans ;
« Sour l’autel de l’eglixe vi gesir une brans,
« Ne l’ousoie tocher, s’an ere desirans ;
« Mais une vois en a parlé : « Non seis dotans ».
« Maintenant l’alai prandre, ains n’i reqis clavans,
« Entr’aus m’alai ferir, mout hoi bon conduisans ;
« Onciant e firant avaus les derubans,
« Les enchauçai por force une liege tinans.
« Ensi de jor en jor les alai mestroians ;
« Pur ier en droite terce i oit un estor pesant,
« Une liege e dimie les segui en un plans,
« Plus de cent en oncis ains le pont merians :
« Se tu fuses venus por mi les mors gisans,
« En veor le mervoile des rostes caup tinans,
« Tu bien avroies dit de croire les romans
« E de Rome e de Troie e dou tens ancians
« E q’il fust verité la force des jaians,
« D’Erculés e d’Antheu e de Febus le grans. »