| ◄ Laisse CCCCLXXXIX | Laisse CCCCXC | Laisse CCCCXCI ► |
Aprés parole li fils al duc Rayner
Pietusemant, dond altrui fist plorer :
« Droit emperere », ce a dit Oliver,
« Si m’aït Diex, mout feites a blasmer.
« Nuls sajes hom ni devroit mais errer
« E plus doit estre sajes li justixer
« Qe cil qe vient a lui droit demander.
« En une part pois Rolland eschuser,
« Qe, quand de camp nos partimes l’autr’er
« E q’il vos vit le Saracins caçer
« Ne sun secors ne vos avoit mester,
« Ja por itant ne voloit il laixer
« Q’il non venist aprés vos volantier.
« A l’esmovoir i vint un espioner :
« Bernars de Meus, ensi l’oï nomer.
« Qel lui dixis, ne vos sai spoblïer.
« Nos le seguimes qual part il volt aler :
« Tote le soire, per vals e por rocer
« Nos amena nostre bon guioner ;
« Ad une nuit, endroit li galcanter,
« Oimes de Nobles la gaite en aut corner.
« En quatre part nos fist la nuit sevrer ;
« Le maitinet alames dentre entrer.
« Mais tot ce qe estions .xx. miler,
« Nos eüsent Paiens mis al fraper :
« Sol vostre niés nos i fist delivrer.
« Ne fustes mie a veoir son destrer
« Quel saut il fist a lor bayre paser :
« Da mil Paiens le vi environer.
« Qe vos devroie, mon seignor, plus pleider ?
« Au roy li vi la teste detrencer.
« Quand rendus fu li gran paleis plener,
« Sor la tor fist vostre ensaingne drecer.
« Turch qe vousist de la mort escamper,
« De vostre part se convient reclamer,
« A voix cridant : Emperer chevaler !
« Se il a bien fait, est ce donc li loer
« Qe vos l’avés ferus au retorner ?
« Se il vos ennoie de Paiens geroier,
« Por qoi nos feistes de Françe desevrer ?
« Mout m’aveis feite hois la joie torbler ;
« Quand il s’en veit mon signor et mon frer,
« Aler m’en voil ; le congié vos requer.
« Droit a Vïene m’en alerai primer
« A dam Gerard e Bel’Aude au vis cler
« Ces doloroses noveles anuncier.
« Vestirai moi a guise de palmer,
« Tant qirerai e paserai la mer,
« O je morai en voie o en senter,
« O troverai cil qi est mon esper. »
Lor comença si fort a larmoier
Qil en a feit plus de dou cent plorer.
E dit Hestos : « Plus non pois endurer. »
Lor en apelle som mestre çamberler.
« Va moi », dist il, « mon trief a destirer
« E tuit mes homes me comande a munter ;
« Tost me verais cist païs ci vouder.
« Mais une riens sai bien au roy nuncer :
« Por tot sun reigne o je devrai passer
« N’i ert esparagné ni meisons ni clocher
« Qe ne soit arse, qi qe s’en doie irer,
« Si qe de l’ovre i rendrai le loer. »