| ◄ Laisse CCCCXC | Laisse CCCCXCI | Laisse CCCCXCII ► |
Aprés parole li ardis Salemon,
Cil de Bertaigne, qe mout ama Carlon.
« Seignor », dist il, « ci a male raixon,
« Quand tuit vos oi parler sor une entencion.
« Se un home plus d’un autre ne fust saje e prodom,
« Ensi ne vaudroit ja cist siegle un boton.
« Nel dirai por blasmer Rolland, li fil Milon
« (Bien sevons qe il est nos meilor campion),
« Mais au tamps qe il estoit meschins e valeton,
« Ains q’il aüst apris ni sauter ni Caton,
« Revient Karles de Espagne, qe fist en Aragon
« Tantes riches proeces, cum por certain savon,
« Qe il oncis Braibant e son niés Gallion ;
« Coronés fu a Rome tot sols, sens compagnon
« (Non i avoit qe Morand, car de fis le savon),
« Pois en France torna, maugrés de dos fellon :
« Lor n’i estoit Rolland ; dond bien gran tort avon
« Quand ne conoison Karle ensi cum nos devon,
« Car n’i a nul de nos, ni noir ni blon,
« Da lui ni teigne sa tere e sa maixon.
« Karles est nostre syr e fa droit e raixon.
« Se il a feru son niés, de qoi s’entremeton ?
« Sachiés qe bien tenroie a fol et a bricon
« Nul qe moi deveast castoier ma maixon.
« Se li roys a mesfeit, repentis le veon,
« Si n’est mie droit q’il en qere pardon.
« Se ire l’a conduit a nule mesprison,
« Devons nos segunder ? Se Deu pleis, non feron,
« Anceis amenderomes au miels qe nos porons,
« Qe mantendrons la guere a force et a bandon
« E mostreromes bien au roy Marxilion,
« Quand Rolland ne fust neç ne venus en le mon,
« Ne li voilon laixer dou nostre un esperon.
« Je vos pri dou bien fer, a ma conclusion ;
« En autremant, il n’a ou paveilon
« N’en tote l’ost nus de si aut renon
« Qe se voile partir sens le congié Karlon,
« En mei leu dou chemin, armeis sor li Aragon
« Me troverai e moi e mon Berton :
« Sor le tail de ma spie trepaser i stovron. »
Adonques n’i oit quens ni duc ni aut baron
Qil desdixist, pour ce q’il dit raixon.
Al roy s’acordent, tuit i quirent perdon ;
Karles lui perdona, n’i convint reançon.