Iconologie (Cesare Ripa, 1643)/II/l’Equinoxe de l’Automne
L’eqvinoxe de l’avtomne.
A Figure eſt celle d’vn Homme d’aage viril, veſtu
de meſme que le precedent, & qui a comme luy
pour ceinture vn Cercle de bleu Turquin parſemé
d’Eſtoiles. Il tient de la main droite le Signe de la
Balance, dans le baſſin de laquelle ſont deux globes d’eſgale
iuſteſſe ; vne moitié de chaque globe eſtant blanche & l’autre
noire ; & de la gauche il porte confuſément diuers fruicts,
auecque deux aiſles à ſes pieds.
L’explication que i’ay donnée du cercle, des aiſles & de l’habillement de la Figure precedente ſeruira pour celle-cy. Ie diray ſeulement que celuy qui repreſente cét Equinoxe eſt d’aage viril, pour monſtrer la perfection de ce temps-là, auquel pluſieurs tiennent que Noſtre Seigneur crea le Monde. Mais cette curioſité laiſſée à part, il nous ſuffit de ſçauoir qu’au vingt-troiſieſme de Septembre ſe fait l’Equinoxe qui nous amene l’Automne, auec la maturité des fruicts.
La Balance eſt vn des douze Signes du Zodiaque, où le Soleil entre au mois de Septembre. C’eſt alors que ſe fait l’Equinoxe, c’eſt à dire l’egalité du iour & de la nuict. Ce qui nous eſt demonſtré par les deux Globes moitié blanc, moitié noirs, tournez à rebours l’vn de l’autre, & balancez auec eſgale iuſteſſe.