Iconologie (Cesare Ripa, 1643)/II/Patience

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 139).

Patience.

CEtte pauure Deſolée aſſiſe ſur vne Pierre, enuironnée d’eſpines, ayant des Fers aux mains, & vn Ioug ſur ſes eſpaules, nous repreſente la Patience. Elle eſt aſſiſe ſur vne Pierre parmy des Eſpines, pour monſtrer que c’eſt vne choſe bien dure que de ſe reſoudre aux ſouffrances de cette vie ; mais que neantmoins quelques rudes & picquantes qu’elles ſoient, l’on en peut venir à bout par le moyen de cette Vertu. Quant aux Fers, & au Ioug qu’on luy fait porter, l’vn & l’autre ſignifient la captiuité d’vne Ame affligée, qui ne laiſſe pas toutesfois d’auoir de grandes conſolations, en impetrant l’aſſiſtance Diuine par ces paroles, Miserere mei Devs.