Iconologie (Cesare Ripa, 1643)/II/Nouembre

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 24-33).

Novembre.

SA peinture eſt celle d’vn ieune Garçon veſtu de couleur de fueille-morte, & couronné d’vne guirlande d’oliuier. Il porte de la main droite le Signe du Sagittaire, & de la gauche, vne Corne d’Abondance pleine de diuerſes racines que la terre produit en ce mois-là.

Le Signe Celeſte qu’on luy fait tenir eſt le Sagittaire, ainſi nommé tant de la figure des Eſtoiles, que de ſes effets : car en ce temps-là les pluyes & la greſle eſtant comme dardez du Ciel ſe rendent eſpouuentables.

La guirlande d’oliuier qu’il a ſur la teſte, nous fait ſouuenir qu’en ce mois-là l’on tire ordinairement des oliues meurres, l’excellente liqueur qu’elles produiſent, qui eſt extremément propre à l’vſage de la vie humaine.

Quant au nom que l’on donne à ce mois, il eſt appellé Nouembre, pour eſtre le neufieſme en ordre, comme le ſuiuant eſt dit de Decembre, à cauſe qu’il eſt le dixieſme.