Iconologie (Cesare Ripa, 1643)/II/Muſique
Mvsiqve.
Lle eſt couronnée d’vne Guirlande de fleurs, & veſtuë
d’vne Robe toute ſemée de diuerſes Notes,
dont on ſe ſert ordinairement pour apprendre à
chanter ; Outre qu’elle iouë d’vne Harpe, & qu’à
ſes pieds ſe voyent pluſieurs autres Inſtrumens, & qu’à
ſes pieds ſe voyent pluſieurs autres Inſtrumens, qui la font d’abord
connoiſtre à ceux qui la conſiderent tant ſoit peu ; ce qui
me garentit de la peine d’en donner icy l’explication. Mais cela
n’empeſche pas que ie ne rapporte deux autres Figures, dont
quelques Anciens ſe ſont ſeruis à la repreſenter.
La premiere eſt celle d’vne ieune Fille, qui ſe void aſſiſe ſur vn Globe d’azur, ayant vne plume à la main, les yeux comme attachez ſur vn Liure de Muſique poſé ſur vn Enclume ; & à ſes pieds des Balances, dans les baſſins deſquelles ſont remarquables pluſsieurs marteaux.
Ce qu’elle eſt aſſiſe eſt pour monſtrer que ce diuertiſſement eſt grandement propre à delaſſer l’eſprit.
Le Globe d’azur ſignifie que toute l’Harmonie de la Muſique ſenſible ſe fonde ſur l’Harmonie des Cieux, que les Pythagoriciens ont connuë. À quoy i’adiouſte cette commune opinion de quelques-vns d’entre les Anciens, Que l’intelligence de ce bel Art peut ſeruir en quelque façon à deſcouurir les moyens de mettre d’accord les paſſions de l’Ame, & meſme, cõme diſent les Grecs, à trouuer la Symmetrie des vertus. Auſſi eſt-ce pour cela que les Poëtes, qu’on peut nõmer à bon droit les myſterieux Secretaires de la vraye Philoſophie, ont feint iudicieuſement qu’apres que les Corybantes & les Curetes eurent deliuré Iupiter encore enfant du cruel traitement que luy faiſoit Saturne ſon pere, ils le menerent en Candie pour y eſtre nourry ; & qu’en l’y accompagnant, ils ſe mirent à iouër des Cymbales, & de quelques autres inſtrumens d’airain : où il eſt à remarquer, à le prendre moralement, que par là ſe doit entedre la vraye ſageſſe qui ne peut s’eſleuer ny prendre accroiſſemẽt en nous, ſans cette parfaite Harmonie, qui eſt neceſſairement requiſe pour accorder les mouuemẽs deſreiglez de nos paſſions. Surquoy l’on peut dire encore, que par le meſme Iupiter ſauué des mains de Saturne eſt ſignifiée ceſte plus pure partie du Ciel incorruptible, contre laquelle ne peut ſe preualoir aucunement l’Empire du temps, bien que d’ailleurs il deuore tous les Elemens, & reduiſe inſenſiblement à neant toutes les compoſitions materielles.
I’obmetz que parmy les Anciens il s’en eſt trouué quelques-vns, qui ont dit que les Dieux eſtoient compoſez de Nombres & d’Harmonie, de meſme que l’Homme eſt compoſé d’Ame & de Corps. A raiſon dequoy en leurs Sacrifices ils oyoient tres-volontiers la Muſique, & ſes Concerts agreables : De toutes leſquelles choſes eſt vn Symbole cette miſterieuſe Figure, repreſentant, comme ie viens de dire, vne Fille aſſiſe ſur vn Ciel.
D’ailleurs par le Liure de Muſique eſt enſeignée la reigle qu’il faut tenir, pour apprendre par la veuë ce merueilleux Art à ceux qui ne le ſçauent pas ; comme par les Balances eſt démonſtrée la iuſteſſe requiſe en la voix, de laquelle on iuge par l’oreille. Quant à l’Enclume, il n’eſt pas mis icy ſans vne grande raiſon, quelques-vns ayant eſcrit que c’eſt de luy dont cét art a pris ſon origine, & que par le frappement des marteaux ſur cette lourde piece de fer, Auicenne s’acquit la connoiſſance de la diuerſité des Tons, dont il ſe mit à eſcrire.
La ſeconde Figure de la Muſique ſe démonſtre par vne Femme tenãt en main vne Lyre, dont l’vne des cordes eſt rompuë, & au deffaut de laquelle ſupplée vne Cygale ; Outre qu’elle a ſur ſa teſte vn Roſſignol, à ſes pieds vn grand vaſe plein de vin, & a ſon coſté vne Viole auec ſon archer.
La Cygale qui ſe void poſée ſur la Lyre, ſignifie la Muſique, à cauſe de ce qui aduint à vn certain Eunomius, qui joüant vn iour de cét inſtrument à l’enuy du fameux Ariſtoxene, eut tant de bonne fortune, qu’au point le plus charmãt de ſa piece vne corde s’eſtant rompuë, vne Cygale ſe vint poſer ſur ſa Lyre, & ſupplea ſi bien par ſon chant au manquement de la corde, qu’il demeura victorieux : D’où il aduint que pour memoire de cette action, les Grecs dreſſerent vne ſtatuë au meſme Eunomius, tenant vne Lyre, où ſe voyoit vne Cygale ; ce qui fut pris pour vn vray Hyeroglife de la Muſique.
Le Roſſignol en eſt auſſi vn Symbole, pour ſa merueilleuſe melodie, où ſe treuue naturellement, comme les Anciens l’ont remarqué, tout ce qu’il y a de plus excellent & de plus parfait en ce bel Art.
Quant au Vaſe plein de vin, il ſignifie que la Muſique a eſté inuentée pour reſiouïr les Hommes, comme fait cette precieuſe liqueur, de laquelle ceux de cette profeſſion ne ſont pas amoureux ſans cauſe, puiſqu’au iugement des plus Anciens eſcriuains, les Muſiciens & les Poëtes ſe plaiſent fort en la compagnie du bon pere Bacchus.