Iconologie (Cesare Ripa, 1643)/II/Mars
Mars.
L eſt peint en ieune Guerrier, qui porte vn habillement
de couleur tannée, ayant des aiſles au dos,
en la main droite le ſigne du Mouton, & en la gauche
vne taſſe pleine des fruicts de la ſaiſon.
Nous repreſentons icy les mois ieunes, pource qu’ayant à diuiſer le temps, en heures, en iours, en mois, & en années, nous preſuppoſons que les heures ſont en enfance, les iours en adoleſcence, les mois en leur ieuneſſe, l’année en ſa virilité, & le Temps qui les comprend tous enſemble, dans vne extreme vieilleſſe.
L’on feint que ce mois a la mise ſeuere, & ſur la teſte vn heaume, pour auoir eſté dedié par Romulus à ſon pere Mars, qui luy donna ce meſme nom.
Il eſt veſtu de tanné, dautant que cette couleur eſt compoſée de noir & de rouge, tellement que par l’vn eſt denotée la couleur de la terre, & par l’autre en ce mois là, fortifiée de la chaleur du Soleil, fait pouſſer les plantes, & reſchauffe tous les animaux.
Ses aiſles demonſtrent la courſe continuelle des mois exprimée par ce vers de Petrarque dans ſon Triomphe du temps.
Les ans, les mois, les iours, les heures,
Paſſent viſte comme vn eſclair,
Et tels que les broüillas de l’air
N’ont point de certaines demeures.
Il tient de la main droite le Signe du Mouton enuironné de diuerſes fleurs, dautant qu’en ce mois-là, qui donne naiſſance au Printemps, la terre commence de s’eſmailler. Car alors, comme dit l’Arioſte,
L’Aſtre du iour par ſa chaleur
Fait rire icy bas toute choſe,
Et renouuelle la couleur
Des Lys, des Oeillets, & des Roſes.
Par où il eſt encore monſtré que comme le Mouton eſt foible derriere, & fort par deuant, ainſi le Soleil, commençant d’entrer dans ce Signe, eſt encore foible, à cauſe du froid qui diminuë beaucoup de ſa vigueur ; mais qu’allant plus auant dans l’Eſté, il accroiſt inſenſiblement ſa chaleur.
La Taſſe pleine de fruicts eſt le Symbole de ceux que cette ſaiſon commence à produire, & que le Peintre iudicieux peut diuerſifier ſelon la qualité des lieux où ils naiſſent. Car aux climats chauds, il vient pluſtoſt, & plus lentement aux pays froids.