Iconologie (Cesare Ripa, 1643)/II/Les quatre Elemens
Les qvatre elemens
ES quatre Elemens, par la compoſition
deſquels ſe font les generations naturelles,
participent en vn ſouuerain degré aux quatre
premieres qualitez, à l’eſgard deſquelles
ſe trouuent auſſi en l’homme quatre complexions,
quatre vertus, quatre ſciences principales,
quatre arts les plus nobles, quatre
ſaiſons de l’année, quatre ſcituations, quatre vents, quatre
differences locales, & quatre cauſes, ou ſujets de Sciences humaines.
Ces Elemens peuuent eſtre agreablement repreſentez
auec leurs viſibles effets ſans aucun Hyerogliphe methaphorique ;
ce qui ne me ſemble pas hors de propos, afin d’eſtaller
aux yeux toutes les choſes qui peuuent tomber ſous la
veuë, les Anciens en ayant ainſi vſé auec beaucoup de raiſon,
ce me ſemble.