Iconologie (Cesare Ripa, 1643)/II/Le Gouſt

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 61-63).

Le govst.

IL eſt repreſenté par vne Femme, qui de la main gauche tient vne Peſche, & de la droite vn Pannier remply de toutes ſortes de fruicts.

Le Gouſt eſt celuy des cinq Sens du corps, qui ſe laiſſe le plus ſouuent tromper par vne fauſſe image des choſes bonnes en apparence, mais mauuaiſes en effet, quand on y apporte de l’excez. Teſmoin les Epicuriens qui vouloient que l’on creuſt qu’il eſtoit ſalutaire au corps de s’abandonner entierement à l’yurongnerie & à la gourmandiſe, ſans ſe picquer dans le monde d’aucun aiguillon d’honneur & de vertu.

On le peint portant diuers fruicts, pource que les Anciens le prenoient pour vn Symbole du Gouſt, & particulierement la Peſche qu’on luy fait tenir pour cette meſme raiſon.