Iconologie (Cesare Ripa, 1643)/II/Iuin
![](http://upload.wikimedia.org/wikipedia/commons/thumb/7/7a/Ripa_-_Iconologie_-_1643_-_II_-_p._24_-_ivin.jpg/250px-Ripa_-_Iconologie_-_1643_-_II_-_p._24_-_ivin.jpg)
Ivin.
N luy donne des aiſles comme aux autres mois, vn
habillement de verd jauniſſant, & vne guirlande
d’eſpics qui ne ſont point encore meurs. Outre qu’on
luy fait tenir pour enſeigne à la main droite, le Signe
de l’Eſcreuice, & de la gauche vne couppe pleine de toutes
ſortes de fruicts de la ſaiſon.
Les Latins l’appellent Iuin, pour la meſme raiſon que nous venons d’alleguer en parlant de May. Quelques-vns neantmoins en tirent l’ethymologie de Iunon, pource que le premier iour de ce mois fut dedié le Temple de cette Deeſſe ; ou de Iuius Brutus, qui ce meſme mois chaſſa Tarquin du Royaume.
Il eſt veſtu de verd jauniſſant, d’autant que le Soleil commence alors de faire jaunir les grains, & meſmes les herbes.
L’Eſcreuice ſignifie que le Soleil arriuant à ce Signe commence de rebrouſſer en arriere, & de s’eſloigner de nous, c’eſt à dire d’aller à recullons comme fait cét animal.