Iconologie (Cesare Ripa, 1643)/II/Democratie

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 92-93).

Democratie.

CEtte Femme couronnée de Pampres & modeſtement veſtuë, tenant de la main droite vne Pomme de Grenade, de la gauche des Serpens, auec des grains dont elle a deux ſacs remplis, repreſente la Democratie.

Par elle s’entend vn Eſtat populaire, c’eſt à dire qui eſt gouuerné par le Peuple, en forme de Conſeil & d’Aſſemblée, où chacun peut donner ſa voix, pour deliberer des affaires publiques.

On la couronne de Pampre & de fueilles d’Ormeau, pour monſtrer que comme ces deux plantes s’vniſſent enſemble, le Peuple en fait de meſme.

Son habit modeſte s’accomode à la condition du Peuple, qui pour n’auoir aſſez de moyens, ne peut mettre en euidence le deſir ambitieux qu’il a d’aller du pair auecque les autres, qui ſont de plus grande condition que luy.

Elle tient en la main droite vne Pomme de Grenade, à cauſe Hierogliph. l. 54 que ce fruit-là, comme le remarque Pierius Valerian, eſt le Symbole d’vn Peuple aſſemblé dans vn lieu, & qui ſe gouuerne ſelon ſa condition & les moyens qu’il en peut auoir.

Les Serpens qu’elle tient en main, ſignifient que comme le Peuple n’eſt ordinairement touché d’aucune conſideration de vraye gloire, ſon gouuernement de meſme ne fait que ramper.

Pour ce qui eſt des grains qui ſont dans les ſacs, ils figurent les prouiſions qu’on accouſtumé de faire les Communautez, qui ont plus d’ambition pour les viures que pour les honneurs.