Iconologie (Cesare Ripa, 1643)/II/Bonne Fortune

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 62-63).

La bonne fortvne.

DAns vne Medaille d’Anthonin Geta, elle ſe void peinte aſſiſe, & s’appuye du bras droit ſur vne roüe, tenant de la main gauche vne Corne d’Abondance. Ce qui n’a pas beſoin d’vne plus ample explication, puis qu’il ſe void clairement que l’vn eſt vne marque de ſa legereté, & l’autre des biens, dont elle eſt prodigue.

Il faut adjouſter icy qu’au lieu de la Roüe, quelques-vns luy mettent en main vn Globe celeſte, par où il eſt demonſtré que comme le Globe eſt dans vn continuel mouuement, la Fortune de meſme n’a iamais de repos, mais changeant de face à toute heure, tantoſt elle abaiſſe les vns, tantoſt elle prend plaiſir à eſleuer les autres.