Iconologie (Cesare Ripa, 1643)/I/Tutele

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 184-191).

Tvtele. CLXII.

C’Est vne Femme veſtuë de rouge, qui de la main gauche tient vn Liure de compte au deſſous d’vne Balance, auecque le mot Compvta, & de la gauche le bord de ſa Robe, dont elle ſemble vouloir couurir la nudité d’vn Enfant qui dort à ſes pieds, au deſſus duquel ſe voit vn petit Lezard, & vn Coq de l’autre coſté.

Il y a deux ſortes de Tuteles, l’vne generale, que les Egyptiens ont dépeinte de la maniere que la deſcrit Orus Apollo, Paul. l. I. tit. de Tut. & l’autre particuliere, qui eſt de finie vne puiſſance que donne le Droit ciuil à vn homme libre, de prendre la protection de celuy qui n’eſt pas en aage de ſe pouuoir deffendre.

Elle tient vne Balance & vn Liure, pour monſtrer, Que le Tuteur eſt obligé en conſcience de rendre vn fidelle compte du bien des Pupiles ; n’y ayant point de Loy qui n’impoſe de grandes peines à ceux qui les oppriment. Suetone loüoit fort à ce propos l’Empereur Galba, de ce qu’ayant condamné à eſtre pendu vn meſchant Tuteur, qui auoit empoiſonné vn Pupil dont il deuoit heriter ; comme il ſceut que pour s’exempter d’vne mort ſi honteuſe, il ſe diſoit eſtre Citoyen Romain, il luy fit dreſſer vn gibet blanchy exprés, & plus haut que l’ordinaire, afin qu’on le peuſt voir de plus loing.

Elle eſt veſtuë de rouge, pource que dans la ſaincte Eſcriture cette couleur eſt vn ſymbole d’Amour & de Charité, qualitez extremement neceſſaires à ceux qui ont charge des mineurs. L’on en peut dire autant de la Vigilance, qui eſt icy denotée par le Coq, ſans laquelle il eſt difficile que le Tuteur ſe puiſſe deſuelopper de l’embarras des affaires, & les mettre au poinct où il les deſire.

Le ſoin qu’elle prend de couurir l’Enfant qui eſt à ſes pieds, eſt une marque de ſon bon naturel enuers luy ; Ce que repreſente encore le petit Lezard qui eſt au deſſus, comme ayant cela de propre, à ce que l’on tient, de veiller à la conſeruation de l’homme quand il dort à la campagne.

I’adiouſteray icy, Que les curieux de Medailles en peuuent auoir remarqué quelques-vnes ſur la matiere dont nous parlons ; Comme celle que Veſpaſian fit battre en ſon troiſieſme Conſulat, auecque ce mot, Tvtela Avgvta, & ces deux autres de Nerua, qui ont pour reuers deux petis Enfans, auecque cette inſcription, Tvtela Italiæ.