Iconologie (Cesare Ripa, 1643)/I/Seureté


Sevreté. CLIII.


LA peinture que nous en faiſons icy eſt copiée ſur vne ancienne Medaille de Macrin, où elle eſt repreſentée par vne Femme, qui de la main droite s’appuye ſur vne Picque, & de la gauche ſur vne Colomne.

L’on appelle Seureté vne force d’eſprit ineſbranlable dans les affaires du monde ; ou ſi vous voulez, vne ferme confiance que l’homme ſe donne, quand il ſe void à couuert de tout danger. C’eſt pour cela qu’elle eſt appuyée ſur vne Colomne, qui eſt vn ſymbole de fermeté, comme la Picque en eſt vn autre de commandement & de preéminence.

On la peut encore couronner d’vne Guirlande de Betoine, à cauſe que cette plante a cela de propre, d’aſſeurer ceux qui la portent contre la morſure des Serpens, animaux contagieux & nuiſibles par deſſus tous les autres : Et voila pourquoy, ſi ie ne me trompe, ceux qui ont expliqué Theocrite, diſent, qu’en ces contrées de la Grece, où il y avoit le plus de ces venimeux Reptiles, les Payſans par maniere de precaution ſouloient remplir leurs licts de Betoine. Il ſe treuue quelques Medailles où la Seureté ſe void à peu prés repreſentée de meſme que nous venons de la deſcrire ; Comme en celle de l’Empereur Gordien, par vne Femme qui ſe tient debout deuant un Autel, auec vn Sceptre à la main : En celle d’Othon, par vne Reine, qui porte vne Lance & vne Couronne, auecque ces mots, Secvritas P. R. Et en celle d’Op. Macri, par vne autre Femme, qui de la main droite s’appuye ſur vne Maſſuë, & de la gauche ſur vn gros Pilier, auecque cette inſcription, Secvritas temporvm.