Iconologie (Cesare Ripa, 1643)/I/Prudence

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 160-165).

Prvdence. CXXXVII.

ELle eſt repreſentée par vne Femme à deux viſages, qui a ſur la teſte vn Heaume doré, enuironné d’vne Guirlande de fueilles de Meurier, vn Cerf auprés d’elle, vn Miroir en la main gauche, & en la droite vne Fléche, auec vne Remore tout à l’entour.

La Prudence, ſelon Ariſtote, eſt vne habitude actiue, accompagnée d’vne vraye raiſon, qui agit ſur les choſes poſſibles, pour atteindre à la felicité de la vie, en ſuiuant le bien, & fuyant le mal.

Son Heaume doré ſignifie, Que l’homme prudent preuoit l’aduenir, & ſe deſueloppe ſagement des embuſches de ceux qui luy veulent nuire :

La Guirlande de fueilles de Meurier, Qu’vne perſonne aduiſée ne doit iamais faire les choſes auant le temps, mais bien les regler en leur ſaiſon, & les executer auec iugement :

Le Cerf qui rumine, Qu’il ne faut iamais entreprendre aucune affaire ſans y penſer, afin que la reſolution en ſoit meilleure, & le ſuccez plus fauorable :

Le Miroir qu’elle tient en main, Qu’il eſt neceſſaire que pour regler ſes actions, l’homme prudent examine ſes deffauts : Ce qu’il ne peut faire ſans la connoiſſance de ſoy-meſme :

Et par la Remore qui eſt autour d’vne Fléche, Que nous ne deuons point tarder à faire du bien, quand nous en ſçauons les moyens, & lors que le temps nous le permet.