Iconologie (Cesare Ripa, 1643)/I/Perſeuerance
![](http://upload.wikimedia.org/wikipedia/commons/thumb/e/e5/Ripa_-_Iconologie_-_1643_-_p._152_-_perseverance.jpg/250px-Ripa_-_Iconologie_-_1643_-_p._152_-_perseverance.jpg)
Perseverance. CXXX
Lle eſt icy peinte de meſme qu’au Palais du Cardinal
Bourgheſe, à ſçauoir en ieune Femme, qui
tient d’vne main vne méche allumée, & de l’autre
vn Serpent qui mort ſa queuë : Ce qu’il n’eſt pas
difficile d’expliquer, puis qu’on ſçait aſſez que le mouuement
du Temps, que les Egyptiens ont denoté par le Serpent, qui
ſe plie en cercle, roulle ſans diſcontinuer, tout de meſme que
la méche ne ceſſe de bruſler iuſques au bout.
Elle eſt figurée encore par vn Enfant eſleué en l’air, & qui ſe tient ferme d’vne main à vne branche de Palme.
Par l’Enfance, ſont denottées les premieres inclinations qu’a l’eſprit au bien, lors qu’il s’attache à la Palme, c’eſt à dire à la Vertu ; Car les branches de cét arbre ont cela de propre, de s’eſleuer au deſſus du fardeau qu’on leur oppoſe pour les abaiſſer. A cét effet remarquable eſt pareil celuy de la Vertu, qui n’eſt iamais ſi forte que dans les occaſions de reſiſter au Vice : Mais il faut neceſſairement que la Perſeuerance y ſoit iointe ; Autrement il eſt à craindre que le Vertueux qui ſe relaſche, ne ſoit comme l’Enfant dont il eſt icy queſtion, qui s’expoſe apparemment au hazard d’vne cheute mortelle, s’il abandonne tant ſoit peu la branche qu’il tient.