Iconologie (Cesare Ripa, 1643)/I/Parsimonie
Parsimonie, ou Espargne. CXVI.
Cette Femme d’vn aage viril & modeſtement veſtuë, tient de la main droite vn Compas, & de la gauche vne Bourſe fermée pleine d’argent, auec vn Rouleau, où ſont eſcrites ces paroles, In melius servat, comme qui diroit, Elle le garde pour le mieux.
Il faut bien que la moderation ſoit le princial but de l’Eſpargne, puis qu’elle conſiſte principalement à fuir les deſpenſes ſuperfluës, en ſe tenant dans les bornes d’vne iuſte mediocrité ; C’eſt elle auſſi qui des quatre parties de la Prudence, neceſſaires à la conſeruation des biens du monde en poſſede trois : Car, ſelon Plutarque, elle ſçait l’art d’agir prudemment dans le meſnage, d’accroiſtre ſes commoditez, & de les conſeruer auec honneur. Eſchinez ſouloit dire à ce propos, Que de la façon qu’il viuoit il n’empruntoit rien à vſure que de ſoy-meſme, pource qu’au lieu de la deſpenſe qu’il pouuoit faire, il ſe reſſeroit eſtroittement dans l’vſage de ſon bien ; en quoy veritablement il ſe regloit par le conſeil d’Ariſtote, qui recommandant l’eſpargne aux Communautez, ou aux Republiques ; Il faut, dit-il, que châque ville ſçache premierement l’eſtat de ſon reuenu, puis celuy de ſa deſpenſe, afin de la retrancher, ſi elle eſt ſuperfluë. Car pour ſe maintenir riche, il n’eſt pas moins neceſſaire d’eſpargner ſon bien, que de l’accroiſtre par ſa propre induſtrie. A cét aduis d’Ariſtote ſe rapporte encore celuy de Seneque, quand il dit, Qu’il n’y a point de richeſſes aſſez grandes, ny qui ſoient capables de nous aſſouuir, ſi pour en vſer comme il faut nous ne ſçauons recourir à l’Eſpargne.
Or ce qu’elle eſt peinte en l’aage viril, eſt pour faire voir qu’en ce temps-la l’homme eſt rendu capable de raiſon, & de joindre également l’vtile à l’honneſte.
Son habillement eſt ſimple & ſans aucune parure, pour monſtrer qu’elle eſt ennemie de toute deſpenſe ſuperfluë : Car elle ſe plaiſt à profiter de cette leçon de ſainct Ambroiſe, Qu’il n’y a rien ſi neceſſaire à la vie, que de bien ſçauoir connoiſtre ce dequoy elle a beſoin.
Le Compas qu’elle a en la main droite, ſignifie l’ordre & la meſure qu’il faut tenir en toutes choſes. Car comme cét inſtrument de Mathematique ne s’eſloigne point de ſa circonference, l’Eſpargne de meſme ne ſort iamais des limites de la raiſon, ny de celles de l’honneſteté.
Quant à la Bourſe qu’elle porte en l’autre main, auecque ces mots, In melivs servat, cela veut dire, Que ce nous eſt vn honneur beaucoup plus grand de conſeruer ce que nous auons, que d’acquerir ce qui nous manque.