Iconologie (Cesare Ripa, 1643)/I/Logique
Logiqve. LXXXIV.
Es principales operations ſe voyent icy ſous la figure
d’vne ieune fille, qui a les cheueux eſpars &
aſſez longs, vn bouquet de fleurs en la main droite,
auec ce mot au deſſus, Vervm est falsvm ;
Et en la gauche vn Serpent.
Sont teint paſle eſt vn effet de ſes veilles, & de l’eſtude qu’elle employe à s’acquerir cette noble connoiſſance ; d’où s’enſuit d’ordinaire que pour s’y trop adonner, les hommes de Lettres ſont ſujets aux maladies.
Ses cheueux eſpars et meſlez, monſtrent que l’homme qui vaque à la ſpeculation des matieres intelligibles, oublie toutes autres choſes pour celle-là, & qu’il neglige meſme le ſoin de ſon corps.
Les fleurs qu’elle porte, nous aduiſent, Que par le moyen de cette profeſſion la Verité eſt miſe en euidence, & le Menſonge eſtouffé ſous elle ; comme par vn effet de nature, de l’herbe naiſſent les fleurs, qui la couurent depuis quand elles ſont grandes.
Pour le regard du Serpent, il nous enſeigne deux choſes ; La premiere, Que la Prudence eſt neceſſaire à cette profeſſion, comme à toutes les autres, veu que le plus grand effort de l’humaine induſtrie, eſt de ſçauoir diſcerner le vray d’auecque le faux, & d’operer ſelon cette diſtinction, auec vne proportion conforme à la verité qu’on a reconnuë.
La ſeconde, Que la Logique eſt priſe pou vne matiere venimeuſe & inacceſſible, par ceux qui n’ont pas l’eſprit aſſez fort pour la conceuoir ; bien que toutesfois elle leur apprenne le contraire, & qu’elle detruiſe ceux qui par vne temerité trop grande s’oppoſent à ſa doctrine.
L’on en fait encore vne ſeconde peinture, qui eſt celle d’vne ieune Femme veſtuë de blanc, le viſage de laquelle teſmoigne vne merueilleuſe viuacité. Elle porte vne longue eſtocade en la main droite, quatre clous en la gauche, vn morion en teſte, & pour Cimier un Faucon.
La Logique, par qui l’on conſidere la nature & la proprieté des operations de l’entendement, eſt peinte auec vne eſtocade à la main, pour monſtrer la merueilleuſe ſubtilité de ſon eſprit à former diuers argumens, qui nous font diſtinguer le vray d’auecque le faux : Et auec vn morion en teſte, pour marquer la force de ſes raiſons, qui la portent aux plus hautes connoiſſances. Car comme le Faucon fond dans les nuës apres l’oyſeau qu’il pourſuit ; Le Logicien tout de meſme, diſpute hautement des choſes les plus ſublimes, pour ſe donner en proye les diſcours d’autruy, & les aſſujettir à ſon raiſonnement.
Les quatre clous qu’elle porte ſignifient, Qu’en chaque figure ſyllogiſtique, il y a quatre moyens de deſcouurir le Vray, qui ſont enſeignez par les Profeſſeurs de cét Art ; Et par ſa robe blanche, Qu’elle ne ſe propoſe pour but que la Verité. Car comme cette couleur eſt la plus parfaite de toutes, la Logique de meſme eſt la connoiſſance la plus capable d’effacer les nuages d’vne ame, afin de luy faire comprendre le Vray, pourueu que celuy qui l’entreprend s’en acquitte en bon Logicien, & non pas en mauuais Sophiſte.