Iconologie (Cesare Ripa, 1643)/I/Gloire
![](http://upload.wikimedia.org/wikipedia/commons/thumb/3/35/Ripa_-_Iconologie_-_1643_-_p._79_-_gloire.jpg/250px-Ripa_-_Iconologie_-_1643_-_p._79_-_gloire.jpg)
Gloire. LXIX.
Ette Image eſt tirée des anciennes Medailles, où
elle eſt peinte de meſme qu’icy. Car auec ce que le
haut de ſon corps eſt preſque tout nud, elle porte
vne Sphere où ſont les douze ſignes du Zodiaque,
& vne petite Figure qui tient vne Palme d’vne main, & de
l’autre vne Guirlande.
Sa nudité ſignifie, Qu’il n’y a iamais de fard dans les actions glorieuſes, pource qu’elles paroiſſent à deſcouuert en quelque temps que ce ſoit. La Sphere qu’elle porte, Que les conſiderations d’icy bas ne l’obligent pas tant à des exploits héroïques, que celles du Ciel, où elle ſe promet la recompenſe de ſes trauaux ; Et l’Image qu’elle ſouſtient de la main droite, qui eſt celle de la Victoire, Qu’elles ſont toutes deux inſeparables, puiſque l’vne aſſeurément eſt la creature de l’autre.
Il y en a qui luy mettent ſur le chef vne Couronne d’or, auec vne Trompette en la main gauche, & en la droite vne Corne d’Abondance. Que ſi ie ne m’abuſe, par la premiere de ces choſes, ils pretendent monſtrer, Que le prix de la Gloire eſt toûjours illuſtre, puis qu’elle poſſede les plus precieuſes marques d’honneur que l’on puiſſe auoir, qui ſont les Sceptres & les Couronnes. Par la ſeconde, Que ſes hautes entrepriſes ne manquent iamais d’eſtre publiées par la bouche de la Renommée ; Et par la troiſieſme, Qu’eſtant legitime & fondée sur la Vertu, elle ne peut manquer de vrais biens, ny d’eſtre victorieuſe en pluſieurs façons de la mauuaiſe fortune.