Iconologie (Cesare Ripa, 1643)/I/Genie
Genie. LXVIII.
Syntag. 2.
L y a dans les eſcrits de Vincent Cartary, quantité
d’images du Genie, qu’il a priſes de Lilius Garaldus.
Mais celle-cy me plaiſt par deſſus toutes, tirée d’vne
ſtatuë de marbre de bas relief, qui fut trouuée à
Rome il y a quelques années. Elle repreſente vn Enfand nud,
& d’vn viſage riant, auec vne Guirlande de pauot ſur la teſte,
des Eſpics en vne main, & vne grappe de raiſin en l’autre ; à
quoy ſert d’explication l’Epigramme qui ſe void au deſſous,
par où il eſt monſtré
Que la blonde Cerés, Bacchus, & le Sommeil,
Font gouſter aux mortels vn plaiſir nompareil ;
S’il aduient qu’à leurs dons ſoit puiſſamment vnie
La faueur du Genie.
Et d’autant que les Anciens le prenoient, pour la cõmune conſeruation des choſes du monde, il ne faut pas s’eſtonner ſi chez eux non ſeulement les creatures humaines, mais les inſenſibles meſme auoient leur Genie, comme il ſe void par diuerſes Medailles, qui luy attribuent la garde des threſors & des greniers.
Mais quant à cét autre Genie, qui ſe prend d’ordinaire pour l’inclination que nous auons à quelque choſe, & pour le plaiſir qui en reuient ; on luy peut donner des aiſles, pour vn ſymbole de la choſe qui nous plaiſt, & qui nous reuient touſiours en la fantaiſie. Par exemple, ſi quelqu’vn eſt porté aux Lettres, qu’on luy mette des Liures en main ; Si à la Muſique, des Luths, & autres tels inſtruments ; Si à la Guerre, des Armes, & ainſi du reſte. Par meſme moyen qu’on le couronne de fueilles de Plane, arbre Genial, & qui pour n’eſtre pas moins beau qu’il eſt commode, pour la grande ombre qu’il fait, fut l’vn des plus agreables ornemens de l’Academie d’Athenes.
En quelques Medailles, le Genie des Romains eſt couronné de laurier, pource que ce peuple ne ſe plaiſoit qu’à la guerre & aux triomphes. En d’autres on luy fait porter des Eſpics, des fleurs, & des branches d’Oliuier, comme en celles de Trajan, & de Marc-Aurelle Antonin. Mais la plus remarquable de toutes eſt celle de Neron, tenant de la main droite vne Couppe à ſacrifier deuant vn Autel, & de la gauche vne Corne d’abondance. Et il faut bien croire que par vn excez de flatterie l’on frappa cette Medaille en ſa faueur, puis qu’il est certain que le Genie de ce Prince, c’eſt à dire ſon humeur, ſe portoit au mal pluſtoſt qu’au bien ; à l’impieté, non pas à la Religion, & à la ruine des biens plus volontiers qu’à leur accroiſſement.