Iconologie (Cesare Ripa, 1643)/I/Conversation
Conversation. XXXIII.
Lle paroiſt icy ſous la forme d’vn ieune Homme
de fort bonne mine, & d’vn viſage riant. Il porte
vn habillement verd, vne Guirlande de Laurier
ſur la teſte, & en la main gauche vn Caducée, à
l’entour duquel ſont enlacez en lieu de ſerpens, deux rameaux
differens, l’vn de Myrthe, & l’autre de Grenadier, auec deux
langues humaines au deſſus.
En la poſture où il eſt, il ſemble vouloir accueillir quelqu’vn, tenant pour cét effet le bras gauche ouuert, & en la main droite vn rouleau, où ſont eſcrits ces deux mots, Veh ! ſoli. C’eſt à dire, Malheur à celuy qui eſt ſeul.
La Conuerſation, que l’on peut appeller à bon droit, la choſe du monde la plus agreable & la plus douce, eſt une hantiſe de perſonnes qui s’entr’aiment, & qui ſe voyent ſouuent.
Voilà pourquoi elle eſt icy figurée par les deux branches de Myrthe & de Grenadier entrelacées, pource qu’il faut de neceſſité qu’vne vraye Conuerſation, ait pour fondement l’vnion & l’amitié mutuelle. Nous en auons vn exemple en ces deux Plantes, qui s’aiment ſi fort, que leurs racines bien qu’eſloignées s’approchent, & ſe vont ioindre naturellement. Ce qui ne peut tourner qu’à la honte de ces Thimons ennemis des hommes, qui en abhorrent la conuerſation, & qui appellent force d’esprit leur humeur reſveuſe, accouſtumée à ne voir perſonne.
La Langue qui eſt au deſſus de ces deux Plantes ſignifie, Que la Nature l’a donnée à l’homme pour exprimer ſes penſées dans les bonnes compagnies, & s’entretenir auec les perſonnes de ſa connoiſſance, ſoit pour inſtruire, ſoit pour eſtre inſtruit.
L’accortiſe qui ſe remarque dans ce tableau, monſtre que le bon accueil, les ciuilitez, & les complimens ſont ordinaires à ceux, dont la Conuerſation eſt vertueuſe, & qu’on les trouue touſiours en eſtat d’accueillir courtoiſement les honneſtes gens.
Auſſi ces deux mots, Veh ſoli, tirez de Salomon en ſes Prouerbes, declarent aſſez qu’il n’eſt pas moins mauuais & deſplaiſant d’eſtre ſeul, qu’il eſt bon & agreable de voir des hommes qui uiuent en freres par la conuerſation qu’ils ont enſemble.