Wikisource

Iconologie (Cesare Ripa, 1643)/I/Ame courtoise

< Iconologie (Cesare Ripa, 1643)


Ame covrtoise. VII.


CEtte nouueauté n’eſt pas bien grande, de voir la peinture d’vn Enfant, à qui vn Dauphin fait le meſme office ſur la mer, que le cheual rend à l’homme ſur la terre. L’ancienne Hiſtoire nous en fournit d’aſſez curieux Cap. 17. 21. exemples. Teſmoin celuy que Solin rapporte dans ſon Liure, à ſçauoir, qu’aupres d’Hippone il ſe treuua vn de ces animaux ſi amy de l’homme & ſi appriuoiſé, qu’il s’en alloit fort ſouuent au prochain riuage, où il tendoit l’eſchine aux vns, & ſe laiſſoit manier aux autres : Ce que le meſme Autheur dit eſtre arriué à Flauianus Proconſul d’Afrique, auquel il prit fantaiſie vn iour de le frotter de quelques onguents ; mais pource que la ſenteur en eſtoit trop forte, le pauure Dauphin faillit d’en mourir, & fut pluſieurs mois ſans reuenir à la riue. I’obmets Pln. I. 9. c. 8 qu’au temps de l’Empereur Auguſte, il y en euſt vn autre ſi priué, qu’vn petit garçon ayant pris l’aſſeurance de luy donner du pain l’apprit auſſi de monter ſur luy, & fut porté de Bajes à Pouzzol : Ce qui continue iuſques à la mort de l’enfant, qui fut ſuiuie de celle du Dauphin, au grand eſtonnement de ceux qui le virent. Ces deux exemples preuuent aſſez bien à mon aduis ce que ie pretends par cette figure, qui eſt, d’en faire l’Embleme d’vne Ame courtoiſe, ou, ſi vous voulez, officieuſe & bien née. Toute la raiſon que i’en puis donner eſt, que le Dauphin ayme l’homme, & qu’il le careſſe, par inſtinct pluſtoſt que par intereſt, ny pour aucun bien qu’il en reçoiue. Pierius le croit ainſi, lors qu’alleguant à ce propos le iugement qu’en fait vn Ancien ; Plutarque, dit-il, admire à bon droict ce genereux naturel que les Dauphins ont pour les hommes. Car ce n’eſt ny pour la nourriture qu’ils les aiment, comme font les chiens & les cheuaux, ny par autre neceβité ; ou pour auoir eſté deliurez de leur joug, comme l’on pourroit dire des Elephans, des Lyons, & des Pantheres, mais par ie ne ſçay quelle tendreſſe qui les y porte, & qui leur eſt ordinaire. Puis qu’ils tiennent donc de leur propre nature ces bons mouuemens qu’ils ont pour les creatures raiſonnables, ils meritent bien ſans doute d’eſtre le ſymbole des courages nobles, qui ſont nais pour obliger autruy. A quoy certes ne les pouſſe pas tant la recompenſe qu’ils en attendent, que leur inclination propre, qui ſe laiſſe aller d’elle-meſme à des actions officieuſes & charitables.

Récupérée de « https://fr.wikisource.org/w/index.php?title=Iconologie_(Cesare_Ripa,_1643)/I/Ame_courtoise&oldid=9093069 »